លោកប្រធានាធិបតីអាមេរិកដូណាល់ ត្រាំ ប្រកាសនៅថ្ងៃទី៨ មករា ថា លោកនឹងមិនចូលរួមពិធីស្បថចូលកាន់តំណែងប្រធានាធិបតីរបស់លោកចូ បៃឌិន នៅថ្ងៃទី២០ មករាឡើយ។ ការលើកឡើងរបស់លោកត្រាំនេះ ធ្វើឡើងមិនដល់មួយថ្ងៃផង ក្រោយលោកសន្យាផ្ទេរអំណាចទៅលោកបៃឌិនដោយសន្តិវិធី។
«សម្រាប់អ្នកដែលបានសួរនាំ ខ្ញុំនឹងមិនចូលរួមពិធីស្បថចូលកាន់តំណែងនៅថ្ងៃទី២០ មករា ឡើយ»។នេះជាសំណេរ ក្នុងបណ្តាញសង្គមTwitter របស់លោកត្រាំ។ ចំណែកTwitter វិញបានសម្រេចលុបគណនីរបស់លោកត្រាំជារៀងរហូត ដោយសារតែរូបលោកប្រើប្រាស់បណ្តាញសង្គមនេះដើម្បីញុះញង់បង្ករហិង្សារ ដែលឈានដល់ការអុកឡុកវិមានសភាកាលពីថ្ងៃទី៦ មករា។
ការប្រកាសមិនចូលរួមក្នុងពិធីស្បថកាន់ចូលកាន់តំណែងរបស់ប្រធានាធិបតីថ្មី នឹងនាំឲ្យលោកត្រាំក្លាយជាប្រធានាធិបតីទីមួយក្នុងរយៈពេល១៥២ឆ្នាំ ដែលមិនចូលរួមក្នុងប្រពៃណីមួយនេះ។ អតីតប្រធានាធិបតីអាមេរិកAndrew Jackson ដែលចប់អាណ្តតិក្នុងឆ្នាំ១៨៦៩ ជាបុគ្គលដំបូងបង្អស់ដែលមិនចូលរួមពិធីប្រពៃណីនេះ។ ក្នុងនយោបាយអាមេរិក វត្តមានរបស់អតីតប្រធានាធិបតី និងប្រធានាធិបតីថ្មី នៅថ្ងៃស្បថកាន់តំណែងជានិមិត្តរូបនៃការផ្ទេរអំណាចដោយសន្តិវិធី ក៏ដូចជាការរួបរួមជាតិ។
តបទៅនឹងការប្រកាសរបស់លោកត្រាំ លោកបៃឌិន វិញនិយាយថាអវត្តមានរបស់លោកត្រាំ នៅថ្ងៃទី២០ មករា អាចជារឿងល្អ។ លោកបៃឌិន លើកឡើងថា លោកត្រាំ គឺជាសេចក្តីអាម៉ាស់សម្រាប់អាមេរិក។ ដូចគ្នានេះដែរ ក្រុមការងាររបស់លោក បៃឌិន អះអាងថាវត្តមានរបស់លោក ត្រាំ មិនមែនជារឿងអទិភាពដែលត្រូវគិតគូរនោះឡើយ។ យ៉ាងណាក្តី លោក បៃឌិន ស្វាគមន៍វត្តមានរបស់លោកអនុប្រធានាធិបតី ម៉ៃ ផែន។
ជុំវិញវត្តមានរបស់លោក ផែន និងភរិយា លោកDevin Malley អ្នកនាំពាក្យអនុប្រធាធិបតីអះអាងថា លោក ផែន មិនទាន់សម្រេចចិត្តយ៉ាងណានៅឡើយទេ។ ប៉ុន្តែប្រភពស្និទ្ធ នឹងអនុប្រធានាធិបតី អះអាងថាលោកនឹងចូលរួមពិធីខាងលើ។ នេះយោងតាមទីភ្នាក់ងារព័ត៌មានAFP។
លោកផែន និងលោកត្រាំ នាពេលនេះក៏មើលមុខគ្នាមិនចំដែរ ដោយសារតែលោកផែន គោរពតាមរដ្ឋធម្មនុញ្ញអាមេរិកដោយបញ្ជាក់ពីការជាប់ឆ្នោតរបស់លោកបៃឌិនក្នុងកិច្ចប្រជុំសភាពេញអង្គ និងបដិសេធការទាមទាររបស់លោកត្រាំ ឲ្យជំទាស់នូវលទ្ធផលបោះឆ្នោត។
អតីតប្រធានាធិបតីជាទូទៅតែងតែចូលរួមក្នុងពិធីស្បថចូលកាន់តំណែងរបស់ប្រធានាធិបតីថ្មី អតីតប្រធានាធិបតីអាមេរិកដែលកំពុងរស់រានមានជីវិតចំនួន៤រូបគឺលោកបារ៉ាក់ អូបាម៉ា លោកចច ប៊ូស និងលោកប៊ីល គ្លីនតុន បានបញ្ជាក់ថានឹងចូលរួមពិធីខាងលើ។ ប៉ុន្តែវត្តមានរបស់លោកអតីតប្រធានាធិបតីជីមី កាទ័រ ពុំទាន់ច្បាស់លាស់នៅឡើយទេ ដ្បិតអីក្នុងវ័យ៩៦ឆ្នាំលោកកាទ័រមិនអាចធ្វើដំណើរបានទៀតឡើយ។
ដោយមិនចូលរួមពិធីខាងលើ មន្ត្រីសេតវិមានមួយចំនួនអះអាងថាលោកត្រាំ នឹងចាកចេញពីសេតវិមាននៅថ្ងៃទី១៩ មករា ដោយអាចនឹងធ្វើដំណើរទៅកន្លែងកំសាន្តMar-a-Lago របស់លោកនៅរដ្ឋFlorida៕