អភិបាលស្រុកបន្ទាយស្រី បញ្ជាឲ្យបកស្លាកពាណិជ្ជកម្មខុសច្បាប់ចេញ ,អ្នកតាមដានសង្គម ចាត់ទុកជាគំរូដល់តំបន់ដទៃទៀត

ជាតិ

សង្គមជាតិ

អភិបាលស្រុកបន្ទាយស្រី បញ្ជាឲ្យបកស្លាកពាណិជ្ជកម្មខុសច្បាប់ចេញ ,អ្នកតាមដានសង្គម ចាត់ទុកជាគំរូដល់តំបន់ដទៃទៀត

09, Jan 2021 , 3:33 pm

រូបភាព

ដោយ:

ភ្នំពេញ៖ រដ្ឋបាលស្រុកបន្ទាយស្រី ចាប់ផ្ដើមអនុវត្តសកម្មភាព ដើរបកស្លាកពាណិជ្ជកម្មដែលគ្មានច្បាប់អនុញ្ញាតនៅតាមដើមឈើ និងបង្គោលផ្សេងៗ ក្នុងស្រុកបន្ទាយស្រី ដើម្បីរក្សាសោភ័ណភាពក្នុងស្រុកទេសចរណ៍មួយនេះ។ អ្នកតាមដានបញ្ហាសង្គមយល់ឃើញថា ការបិទស្លាកពាណិជ្ជកម្មខុសច្បាប់នេះ វាប៉ះពាល់ដល់សោភ័ណភាព និងបរិស្ថាន ដែលប្រជាជនគួរចាប់ផ្ដើមគិតគូរពីបញ្ហានេះ។

អភិបាលស្រុកបន្ទាយស្រី ចាប់ផ្ដើមរឹតបន្តឹងការបិទស្លាកផ្សព្វផ្សាយអាជីវកម្ម នៅលើដើមឈើក្នុងស្រុកបន្ទាយស្រី។ មូលហេតុដែលលោក ឃឹម ហ្វីណង់ អភិបាលស្រុកបន្ទាយស្រី អនុវត្តវិធានការបែបនេះ ដោយសារមើលឃើញថា ស្លាកសញ្ញាពាណិជ្ជកម្ម បានធ្វើឲ្យមានប៉ះពាល់ដល់សោភ័ណភាព យ៉ាងខ្លាំងដល់ស្រុករបស់ខ្លួន។ លោក ឃឹម ហ្វីណង់ សង្កត់ធ្ងន់ថា រដ្ឋបាលស្រុកបន្ទាយស្រី នឹងមិនអនុញ្ញាតឲ្យមានការបិទស្លាកសញ្ញាពាណិជ្ជកម្ម ដោយគ្មានច្បាប់អនុញ្ញាតនោះទេ។

អភិបាលស្រុកបន្ទាយស្រីរូបនេះ បានប្រាប់សារព័ត៌មានThmeyThmey25 តាមទូរស័ព្ទដូច្នេះថា៖ « ការបិទស្លាកសញ្ញាពាណិជ្ជកម្មទាំងនេះ គឺវាមានផលប៉ះពាល់ខ្លាំងដល់សោភ័ណភាព។ កាលណាមានភ្ញៀវទេសចរគាត់ថតរូបទៅគឺមានឃើញ ប្រតេកប្រតាក សក្បុស គ្រប់កន្លែង ណាមួយស្រុកបន្ទាយស្រីជាស្រុកទេសចរណ៍ផង» ។

ជុំវិញបញ្ហាស្លាកពាណិជ្ជកម្មតាមដើមឈើនេះ នាយកអង្គការសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ យល់ឃើញថា ការបិទស្លាកសញ្ញាប្លាស្ទិក ឬក្រដាសនៅតាមដើមឈើ ឬបង្គោលភ្លើង មិនត្រឹមតែមានផលប៉ះពាល់ដល់សោភ័ណភាពទេ ថែមទាំងប៉ះពាល់ដល់បរិស្ថានផងដែរ។ លោក សន ជ័យ លើកឡើងដូច្នេះថា៖ « ជាក់ស្ដែកដូចជាការបិទស្លាកបូមលូ រតែងរតោង ពេញមុខផ្ទះខ្ញុំ ពេលស្លាកទាំងអស់នោះធ្លាក់មកវានឹងក្លាយជាបញ្ហាបរិស្ថាន ដូច្នេះខ្ញុំយល់ថាយើងគួររកដំណោះស្រាយណាមួយកុំឲ្យការរកស៊ី ក្នុងពេលប្រកួតប្រជែងនេះប៉ះពាល់ដល់បរិស្ថាន »។

សម្រាប់អ្នកតាមដានបញ្ហាសង្គមរូបនេះ យល់ឃើញថា ការអនុវត្តវិធានការរបស់រដ្ឋបាលស្រុកបន្ទាយស្រីនេះ ជាសកម្មភាពមួយល្អ ដែលអាចជាគំរូដល់តំបន់ផ្សេងៗទៀត។ « សម្រាប់ស្រុកបន្ទាយស្រីដែលអនុវត្តវិធានការបែបនេះវាមិនមានអ្វីខុសទេ ផ្ទុយទៅវិញយើងឃើញថានៅស្រុកខ្មែរយើងកន្លែងណាក៏សំរាមដែរ។ សំរាមប្លាស្ទិកវាកើនឡើង យើងក៏បារម្ភពីសោភ័ណភាពរបស់ប្រទេសយើង ១០ឆ្នាំទៀតផងដែរ »។ នេះជាការបញ្ជាក់របស់លោក សន ជ័យ ដែលបានបន្ថែមថា ពលរដ្ឋគួរតែសហការ និងជាមួយអាជ្ញាធរក្នុងការការពារបរិស្ថាន និងសោភណ្ឌភាពទីសាធារណៈ។

បន្ថែមពីនេះលោក សន ជ័យ យល់ថា ការផ្សព្វផ្សាយ គួរមានការកាត់បន្ថយជាអតិបរមាក្នុងប្រើប្រាស់ប្លាស្ទិក និងសំរាមផ្សេងៗ ដោយងាកមកប្រើប្រាស់ឌីជីថលសម្រាប់ផ្សព្វផ្សាយវិញ។

សម្រាប់ការការពារសោភណ្ឌភាព និងបរិស្ថានក្នុងស្រុកបន្ទាយស្រីនេះ លោក ឃីម ហ្វីណង់ បានចាត់ចែងក្រុមការងារ ដើរបកស្លាកទាំងអស់នោះចោល ដោយផ្ដើមចេញពីទីប្រជុំជន នឹងបន្តទៅតាមតំបន់ដាច់ស្រយាលទៀត ដើម្បីលុបបំបាត់ស្លាកពាណិជ្ជកម្មយ៉ាងអនាធិបតេយ្យទាំងនោះ។ លោក ឃឹម ហ្វីណង់ បានរៀបរាប់ថា៖« ការដោះស្រាយបញ្ហាបរិស្ថានដែលបណ្ដាលមកពីការផ្សព្វផ្សាយទាំងនេះ វាមិនមានការលំបាកនោះទេសម្រាប់ស្រុកបន្ទាយស្រី»។

អភិបាលស្រុកបន្ទាយស្រី បានសង្កត់ធ្ងន់ថា បើម្ចាស់ក្រុមហ៊ុន និងអាជីវកម្មណា នៅតែបន្តបិទស្លាកសញ្ញាពាណិជ្ជកម្មនៅតាមដើមឈើទៀតនោះ អាជ្ញាធរនឹងកោះហៅក្រុមហ៊ុនទាំងនោះមកធ្វើកិច្ចសន្យា ឬអាចអនុវត្តតាមវិធានការច្បាប់តែម្ដង៕