COVID-19
ជាតិ
ភរិយាលោក ឆែម សាវុធ នៅមិនទាន់ជាសះស្បើយពីកូវីដ-១៩ ក្រោយព្រឹត្តិការណ៍២៨ វិច្ឆិកា បញ្ចប់
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល
×![]()
ភ្នំពេញ៖ ជាង១ខែហើយ ភរិយាលោក ឆែម សាវុធ ប្រធានពន្ធនាគារនៃក្រសួងមហាផ្ទៃ មិនទាន់ជាសះស្បើយពីជំងឺកូវីដ-១៩ ឡើយ ខណៈក្រុមគ្រួសារអ្នកស្រី និងអ្នកពាក់ព័ន្ធព្រឹត្តិការណ៍២៨ វិច្ឆិកាផ្សេងទៀត ត្រូវបានអនុញ្ញាតឱ្យចេញពីមន្ទីរពេទ្យ។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានបញ្ជាក់ថា រោគសញ្ញាជំងឺកូវីដ-១៩ របស់ភរិយាលោក ឆែម សាវុធ នេះ មិនទាន់មានអ្វីធ្ងន់ធ្ងរឡើយ។ ប៉ុន្តែលោកស្រី មិនបញ្ជាក់លម្អិតពីមូលហេតុនៃជំងឺរបស់ភរិយាលោក ឆែម សាវុធ ដែលបានអូសបន្លាយពេលនេះទេ។ ឆ្លើយតបនឹងសំនួរអ្នកសារព័ត៌មានតាមបណ្ដាញតេឡេក្រាម នៅថ្ងៃទី៩ មករានេះ លោកស្រី ឱ វណ្ណឌីន បានបញ្ជាក់ដូច្នេះថា៖«គាត់មិនមានអ្វីប្លែកនោះទេ គ្រាន់តែមិនទាន់ជា នៅបន្តការព្យាបាល ។ ហើយសុំកុំភ្លេចថា យើងក៏ធ្លាប់មានករណីឈឺយូរបែបនេះពីមុនៗមកដែរ»។
កន្លងមកក៏មានបុរសរស់នៅខេត្តសៀមរាបម្នាក់ សម្រាកព្យាបាលជំងឺកូវីដ-១៩ អស់រយៈពេល២ខែដែរ។ មូលហេតុដែលនាំឱ្យអូសបន្លាយពេលយូរនេះ ដោយសារបុរសនោះ មានជំងឺទឹកនោមផ្អែម និងជំងឺប្រចាំកាយ។
គួរបញ្ជាក់ថា ភរិយាលោក ឆែម សាវុធ ប្រធានពន្ធនាគារនៃក្រសួងមហាផ្ទៃ ត្រូវបានរកឃើញមានជំងឹកូវីដ-១៩ តាំងពីថ្ងៃទី២៨ វិច្ឆិកា ឆ្នាំ២០២០មក។ អំឡុងពេលនោះ ក៏មានមនុស្ស៤០នាក់ ឆ្លងជំងឺកូវីដ-១៩នេះជាបន្តបន្ទាប់ រហូតដល់រដ្ឋាភិបាលប្រសិទ្ធនាមថា «ព្រឹត្តិការណ៍ ២៨ វិច្ឆិកា»។ ប៉ុន្តែព្រឹត្តិការណ៍នេះ ត្រូវបានសម្ដេច ហ៊ុន សែន ប្រកាសបិទបញ្ចប់ហើយ កាលពីថ្ងៃទី២៩ ធ្នូ ឆ្នាំ២០២០។
គិតត្រឹមថ្ងៃទី៩មករា ក្រសួងសុខាភិបាល រកឃើញពលករខ្មែរចំនួន២២នាក់ហើយ ដែលត្រឡប់មកពីប្រទេសថៃវិញ មានជំងឺកូវីដ-១៩។ ពួកគេទាំងនោះ ត្រូវបានដាក់ឲ្យសម្រាកព្យាបាលនៅតាមមណ្ឌលសុខភាពនានា ក្នុងខេត្តប៉ៃលិន បាត់ដំបង និងបន្ទាយមានជ័យ។ បច្ចុប្បន្នកម្ពុជាមានអ្នកឆ្លងជំងឺកូវីដ-១៩ សរុប ៣៨៧នាក់ ដោយក្នុងនោះ មាន៣៦៥នាក់បានជាសះស្បើយ៕
© រក្សាសិទ្ធិដោយ thmeythmey.com
