អន្តរជាតិ
អាជ្ញាធរឥណ្ឌូណេស៊ី កំណត់បានទីតាំងប្រអប់ខ្មៅរបស់យន្តហោះដែលធ្លាក់ក្នុងសមុទ្រ
បំណែកកន្ទុយយន្តហោះដែលធ្លាក់។ រូបភាព៖ Bloomberg
×![]()
អាជ្ញាធរឥណ្ឌូណេស៊ី នៅថ្ងៃទី១០ មករា បញ្ជាក់ថា ខ្លួនកំណត់បានទីតាំងប្រអប់ខ្មៅរបស់យន្តហោះដែលធ្លាក់ទៅក្នុងសមុទ្រមិនឆ្ងាយប៉ុន្មានពីទីក្រុងហ្សាការតា។ ក្រុមអ្នកស្រាវជ្រាវ និងអាជ្ញាធរអាកាសចរណ៍ ក៏ប៉ាន់ប្រមាណថា យន្តហោះដែលផ្ទុកមនុស្សចំនួន៦២នាក់នេះ បាក់ជាបំណែកៗនៅពេលធ្លាក់បុកទៅក្នុងផ្ទៃទឹក ។
ក្នុងប្រតិបត្តិការស្វែងរកបំណែកយន្តហោះ និងអ្នកដែលអាចនៅមានជីវិត ក្រុមរុករកប្រទះឃើញបំណែកសាកសព សម្លៀកបំពាក់ អាវពោង ក៏ដូចជាបំណែកកន្ទុយយន្តហោះដែលធ្លាក់របស់អាកាសចរណ៍ Sriwijaya ។ អាជ្ញាធរអះអាង ថា ខ្លួនកំណត់បានទីតាំងប្រអប់ខ្មៅរបស់យន្តហោះ។ ប្រអប់ខ្មៅគឺជាឧបករណ៍ដែលរក្សាទុកទិន្ន័យនៃការហោះហើរ (FDR) និងសំឡេងនៅកន្លែងបើកបរ (CVR)។ ការស្រង់បានឧបករណ៍នេះ នឹងជួយឲ្យដឹងពីមូលហេតុនៃការធ្លាក់យន្តហោះ។
«យើងកំណត់បានទីតាំងប្រអប់ខ្មៅទាំងពីរ»។ នេះជាការលើកឡើងរបស់លោក Soerjanto Tjahjanto ប្រធានភ្នាក់ងារសុវត្ថិភាពដឹកជញ្ជូនឥណ្ឌូណេស៊ី។ លោកបន្ថែមថា ក្រុមមុជទឹកដែលបំពាក់ជាមួយឧបករណ៍ស្វែងរកត្រូវបានបញ្ជូនទៅទីតាំងដែលបានកំណត់នោះ ហើយថា ពួកគេអាចនឹងរកឃើញឧបករណ៍ទាំងពីរដោយសារតែទីកន្លែងដែលធ្លាក់មានជម្រៅប្រមាណ២៣ម៉ែត្រ និងមានពន្លឺគ្រប់គ្រាន់។ នេះបើតាមទីភ្នាក់ងារព័ត៌មាន Reuters។
ស្របពេលជាមួយគ្នានេះ ប៉ូលិសក៏បានស្នើសុំព័ត៌មានស្តីពីសុខភាពធ្មេញ និងសំណាក DNA ពីគ្រួសារអ្នកនៅលើយន្តហោះ ដើម្បីអាចកំណត់អត្តសញ្ញាណសាកសពដែលរកឃើញ។ កាលពីថ្ងៃទី១០ មករា ក្រុមសង្គ្រោះរកឃើញសាកសពចំនួនប្រាំ។
លោក Gerry Soejatman អ្នកវិភាគអាកាសចរណ៍ដែលមានទីតាំងនៅឥណ្ឌូណេស៊ី អះអាងថាអាកាសធាតុមិនល្អ កំហុសអាកាសយានិក ឬបញ្ហាបច្ចេកទេសអាចជាមូលហេតុនៃការធ្លាក់យន្តហោះ។ ប៉ុន្តែលោកះអាងថា វាជារឿងលឿនពេកក្នុងការសន្និដ្ឋានដោយគ្មានប្រអប់ខ្មៅ។ ចំណែកលោកSoerjanto លើកឡើងថា យន្តហោះនេះមិនផ្ទុះនៅកណ្តាលអាកាសឡើយ បើសិនជាយន្តហោះនេះផ្ទុះនៅលើមេឃ នោះបំណែកនឹងសាយភាយលើផ្ទៃទឹកធំជាងនេះ។
យន្តហោះBoeing 737-500 នៃក្រុមហ៊ុនអាកាសចរណ៍ Sriwijaya ជើងហោះហើរ SJ 182 ផ្ទុកមនុស្សចំនួន៦២នាក់ ដែលក្នុងនោះមានក្រុមការងារ១២នាក់ និងកុមារចំនួន១០នាក់ បាត់ខ្លួនពីរាដា ក្រោយពេលហោះចេញពីអាកាសយានដ្ឋានហ្សាការតារយៈពេល៤នាទីទៅកាន់តំបន់ Pontianak ភាគខាងលិចកោះកាលីម៉ាន់តាន់។ យន្តហោះនេះហោះឡើងទៅដល់រយៈកម្ពស់៣៣២២ម៉ែត្រក្នុងរយៈពេល៤នាទី បន្ទាប់មកយន្តហោះចាប់ផ្តើមដាំក្បាលចុះ និងឈប់បញ្ជូនទិន្ន័យហោះហើរនៅរយៈពេល២១វិនាទីបន្ទាប់ ហើយហោះចេញពីគន្លងដែលបានកំណត់ទុក។
វិស័យអាកាសចរណ៍ឥណ្ឌូណេស៊ី ពុំសូវមានកំណត់ត្រាសុវត្ថិភាពល្អប៉ុន្មានឡើយ។ ក្រុមហ៊ុនអាកាសចរណ៍ប្រទេសនេះ ត្រូវបានហាមមិនឲ្យហោះហើរក្នុងដែនអាកាសអឺរ៉ុប និងអាមេរិកពីឆ្នាំ២០០៧ ដល់ឆ្នាំ២០១៨។ ក្នុងរបាយការណ៍ស៊ើបអង្កេតឥណ្ឌូណេស៊ី មូលហេតុចម្បងនៃការធ្លាក់យន្តហោះក្នុងប្រទេសនេះ បណ្តាលមកពីបញ្ហាក្នុងការបញ្ជាទិសដៅយន្តហោះ ការថែទាំមិនបានល្អ និងការឆ្លើយតបមិនបានទាន់ពេល និងគ្រប់គ្រាន់របស់អ្នកបើកបរ៕
Tag:
ឥណ្ឌូណេស៊ី
© រក្សាសិទ្ធិដោយ thmeythmey.com
