COVID-19
អន្តរជាតិ
ជប៉ុន រកឃើញកូវីដ-១៩បំប្លែងខ្លួនថ្មីមួយទៀតលើអ្នកដំណើរមកពីប្រេស៊ីល
រូបថត Xinhua
×![]()
ដោយ៖ ឈួន ឈីវអ៊ីង
វីរុសកូរ៉ូណាប្រភេទថ្មីត្រូវបានរកឃើញលើអ្នកដំណើរចំនួន៤រូប មកពីរដ្ឋអាម៉ាហ្សូន ប្រទេសប្រេស៊ីល។ នេះបើយោងតាមរបាយការណ៍របស់ក្រសួងសុខាភិបាលជប៉ុននៅថ្ងៃអាទិត្យ ទី១០ មករា។ អ្នកជំនាញជប៉ុន កំពុងសិក្សាពីវីរុសបំប្លែងខ្លួន ដោយវាយតម្លៃលើល្បឿនចម្លង និងកម្រិតគ្រោះថ្នាក់។ 
កូវីដ-១៩ បំប្លែងខ្លួនមួយប្រភេទទៀត ត្រូវបានរកឃើញនៅជប៉ុន។ ទម្រង់ថ្មីនេះ គឺខុសពីទម្រង់បំប្លែងខ្លួនដែលរកអង់គ្លេស និងអាហ្វ្រិក។ ក្រសួងសុខាភិបាលជប៉ុនបញ្ជាក់ថា ទម្រង់ថ្មី ត្រូវរកឃើញលើអ្នកដំណើរមកពីប្រេស៊ីល។
ក្នុងសេចក្ដីប្រកាសថ្ងៃទី១០ ខែមករា ក្រសួងសុខាភិបាលជប៉ុនលើកឡើងថា ក្នុងចំណោមអ្នកធ្វើដំណើរទាំង ៤នាក់ ដែលបានមកដល់អាកាសយានដ្ឋាន Haneda នៅទីក្រុងតូក្យូ កាលពីថ្ងៃទី២ ខែមករា មានបុរសវ័យ ប្រហែល៤០ឆ្នាំម្នាក់មានបញ្ហាដកដង្ហើម ស្ត្រីក្នុងវ័យ៣០ឆ្នាំម្នាក់មានអាការៈឈឺក្បាលនិងឈឺបំពង់ក បុរសវ័យជំទង់មានសភាពគ្រុនក្តៅ រីឯក្មេងស្រីជំទង់ម្នាក់ មិនទាន់មានរោគសញ្ញាអ្វីទេ។។ អ្នកដំណើរទាំងអស់ដែលទៅជាមួយគ្នា ត្រូវធ្វើចត្តាឡីស័កក្រុងតូក្យូ។
លោក Takaji Wakita ប្រធានវិទ្យាស្ថានជាតិនៃជំងឺឆ្លងរបស់ជប៉ុន និយាយក្នុងសន្និសីទសារពត៌មានថា នៅពេលនេះ គេមិនមានព័ស្តុតាងណាអាចបង្ហាញថាវីរុសប្រភេទថ្មីដែលបានរកឃើញលើអ្នកដំណើរមកពីប្រេស៊ីលនោះមានសម្ថភាពក្នុងការឆ្លងខ្ពស់ជាងមុននៅឡើយទេ។
បើតាមទីភ្នាក់ងារព័ត៌មាន Reuters ក្រសួងសុខាភិបាលប្រេស៊ីល ក៏បានជូនដំណឹងទៅជប៉ុនពីកូវីដ-១៩ បំប្លែងខ្លួនថ្មីដែរ។ មន្ត្រីក្រសួងសុខាភិបាលជប៉ុនលើកឡើងថា ពួកគេកំពុងចាប់ផ្តើមសិក្សាទៅលើប្រសិទ្ធិភាពវ៉ាក់សាំងប្រឆាំងនឹងវីរុសប្រភេទថ្មី ដែលមានភាពខុសគ្នានឹងការឆ្លងរបស់វីរុសប្រភេទថ្មីរកឃើញនៅចក្រភពអង់គ្លេស និងអាហ្វ្រិកខាងត្បូងដែលបង្កឲ្យមានករណីឆ្លងច្រើននៅតំបន់នានាជុំវិញពិភពលោក។
វីរុសបំប្លែងខ្លួនថ្មី ត្រូវបានរាយការណ៍ដំបូងនៅអង់គ្លេស ដែលត្រូវបានគេហៅថា VUI 202012/01។ តមក នៅអាហ្វ្រិកខាងត្បូង ក៏រកឃើញវីរុសថ្មីនេះត្រូវបានគេហៅថា 501.V2 ដែលជាការលូតលាស់ បំបែកខ្លួនពីវីរុសចាស់ ហើយអាចចម្លងបានលឿន និងមានសមត្ថភាពខ្ពស់ផង។ ប៉ុន្តែគេនៅមិនទាន់មានការបញ្ជាក់ណាដែលថា វាអាចបង្កគ្រោះថ្នាក់ខ្លាំងជាងមុននោះទេ ឬក៏អាចទប់ទល់នឹងវ៉ាក់សាំងបានដែរ៕
Tag:
ជប៉ុន
កូវីដ-១៩
© រក្សាសិទ្ធិដោយ thmeythmey.com
