ស្នងការក្រុងភ្នំពេញ បញ្ជាឱ្យផ្អាកឃាត់ម៉ូតូធំ ច្នៃបំពងស៊ីម៉ាំងបង្កសំឡេងរំខានសិន ក្រោយរងការរិះគន់

ជាតិ

សង្គមជាតិ

ស្នងការក្រុងភ្នំពេញ បញ្ជាឱ្យផ្អាកឃាត់ម៉ូតូធំ ច្នៃបំពងស៊ីម៉ាំងបង្កសំឡេងរំខានសិន ក្រោយរងការរិះគន់

11, Jan 2021 , 6:04 pm

រូបភាព

រូបពីស្នងការដ្ឋាននគរបាលជាតិ

ដោយ: ឡាយ សុភាវតី

ភ្នំពេញ៖ ស្នងការនគរបាលរាជធានីភ្នំពេញ បានបញ្ជាឱ្យកងកម្លាំងទាំងអស់ ផ្អាកសកម្មភាពឃាត់ម៉ូតូធំ កែច្នៃបំពងស៊ីម៉ាំង ដែលបង្កសំឡេងរំខានដល់សាធារណជន ជាបណ្ដោះអាសន្នសិន។ ការផ្អាកចំណាត់ការសិននេះ ធ្វើឡើងក្រោយពីមានការរិះគន់ថា សមត្ថកិច្ចអនុវត្តខុសពីសេចក្តីណែនាំរបស់ថ្នាក់ដឹកនាំក្រសួងមហាផ្ទៃ។

តាមរយៈសារសំឡេង៣នាទី លោក ស ថេត បានបញ្ជាក់ថា អគ្គស្នងការនគរបាលជាតិ លោក នេត សាវឿន នឹងប្រជុំណែនាំជាថ្មី ចំពោះការអនុវត្តលើអ្នកបើកបរម៉ូតូធំ ដែលកែច្នៃបំពងស៊ីម៉ាំងបង្កសំឡេងឮខ្លាំង រំខានដល់អ្នកដទៃនេះ។ មិនតែប៉ុណ្ណោះលោក ស ថេត ក៏ហាក់ទទួលស្គាល់ថា មន្ត្រីសមត្ថកិច្ច ដែលចុះអនុវត្តតាមបញ្ជាថ្នាក់ដឹកនាំ គឺធ្វើផ្ទុយពីលក្ខខណ្ឌដើមទៅវិញ។ ត្រង់ចំណុចនេះ លោក ស ថេត បានព្រលយថា លោកបានប្រាប់ឱ្យសមត្ថកិច្ចចុះស្រង់ស្ថិតិអ្នកបើកម៉ូតូធំ នៅតាមមូលដ្ឋានប៉ុណ្ណោះ ប៉ុន្តែបែរជាមានសមត្ថកិច្ចខ្លះ ចុះឃាត់ម៉ូតូពលរដ្ឋទៅវិញ។

«តាមខណ្ឌទាំងអស់ផ្អាកធ្វើការឃាត់ម៉ូតូធំ ម៉ូតូដែលមានស៉ីម៉ាំងអត់មានសំបុកដែលមានសំឡេងលឺខ្លាំងសិន ផ្អាកសិនដើម្បីរង់ចាំបទបញ្ជាថ្មី…»។ នេះជាការលើកឡើងរបស់ស្នងការដ្ឋាននគរបាលជាតិ។

បន្ថែមពីនេះលោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បានអះអាងថា វិធានការតឹងរឹងលើម៉ូតូធំនេះ គឺផ្ដោតលើម៉ូតូណាច្នៃបំពងស៊ីម៉ាំង ដែលចរាចរណ៍លើដងផ្លូវបង្កការរំខានដល់ដទៃប៉ុណ្ណោះ ហើយក៏គ្មានករណីចុះឆែកដល់ផ្ទះដែរ។ ចំណែកម៉ូតូធំ ដែលមិនបានកែច្នៃ គឺគ្មានការឃាត់ពិន័យឡើយ ពោលគឺសមត្ថកិច្ចគ្រាន់តែណែនាំពួកគេ ប្រសិនបើកបរលើសល្បឿននៅទីប្រជុំជន។

លោកសីហា ថ្លែងយ៉ាងដូច្នេះថា៖ «ទាក់ទងនឹងរូបភាពមួយចំនួនដែលចែករំលែកឃើញមានសមត្ថកិច្ចចុះឆែកដល់ក្នុងផ្ទះដូចជាមិនមែន, ខ្ញុំកំពុងស្រាវជ្រាវបន្ថែមរកប្រភពនៃការចែកចាយរូប មានសមត្ថកិច្ចម្នាក់ពាក់អាវាស៊ីវិល ហើយថតម៉ូតូក្នុងផ្ទះ ថាតើមកពីណា? ជាក់ស្ដែងយើងស្រាវជ្រាវតាមប៉ុស្តិ៍គឺអស់ហើយគឺអត់មានទេ។ អត់មានបទបញ្ជាចុះចែករហូតដល់ក្នុងផ្ទះទេ គឺចាប់ឃាត់នៅពេលគាត់ប្រើប្រាស់ម៉ូតូក្នុងពេលបើកបរបង្កសំឡេង មិនមែនដល់ថ្នាក់ចុះឆែកក្នុងផ្ទះទេ ធម្មតាការឆែកឆេរដល់ផ្ទះពីសមត្ថកិច្ចទាល់តែមានការអនុញ្ញាតពីព្រះរាជអាជ្ញាបានយើងចុះទៅបាន...។

លោក ព្រីង សំរាំង ពលរដ្ឋរស់នៅសង្កាត់ទន្លេបាសាក់ ក្នុងរាជធានីភ្នំពេញ ក៏ត្រូវបានសមត្ថកិច្ចចុះស្រង់ទិន្និន័យពីម៉ូតូធំរបស់លោកដែរ។ ថ្លែងប្រាប់សារព័ត៌មានថ្មីៗថា លោក សំរាំង បាននិយាយយ៉ាងដូច្នេះថា៖ «សមត្ថកិច្ចប្រាប់ថា ចុះស្រង់ទិន្នន័យអ្នកមានម៉ូតូធំ ហើយខ្ញុំក៏សហការជួយផ្ដល់ព័ត៌មានជាមួយគាត់។ ខ្ញុំគ្មានអ្វីភ័យទេ ព្រោះម៉ូតូខ្ញុំមិនបានកែច្នៃ...»។

កាលពីពេលថ្មីនេះ សម្ដេច ស ខេង រដ្ឋមន្រី្តក្រសួងមហាផ្ទៃ បានលើកឡើងថា ម៉ូតូធំខ្លះ បានច្នៃបំពង់ស៊ីម៉ាំង ដែលបង្កសំឡេងដល់ពលរដ្ឋ។ ថ្លែងក្នុងកិច្ចប្រជុំពិភាក្សា គោលនយោបាយ ភូមិ ឃុំ សុវត្ថិភាពកាលពីថ្ងៃទី៨កមរា ឆ្នាំ២០២១ សម្ដេច ស ខេង បានបញ្ជាឱ្យសមត្ថកិច្ចត្រួតពិនិត្យលើករណីម៉ូតូធំទាំងនោះ។

ជុំវិញវិធានការនេះ លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិ ប្រាប់សារព័ត៌មានថ្មីៗថា អគ្គស្នងការនគរបាលជាតិ កំពុងរៀបចំតាក់តែងសេចក្តីណែនាំដល់សមត្ថកិច្ចនគរបាល និងពលរដ្ឋឲ្យយល់ច្បាស់សិន ដើម្បីចុះអនុវត្តន៍និងសហការណ៍គ្នាបានល្អ។

រយៈពេល៣ថ្ងៃនេះ សមត្ថកិច្ចបានឃាត់ម៉ូតូច្នៃបំពង់ស៊ីម៉ាំង ប្រមាណ៦០គ្រឿងហើយ។នេះបើតាមលោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ៕