ជាតិ
បទសម្ភាសន៍
វីដេអូ
ថតរូបនៅ «ផ្លូវបុប្ផាលាក់ខ្លួន» តែកុំភ្លេចទុកដាក់សំរាមឲ្យបានត្រឹមត្រូវ!
× ពោធិ៍សាត់៖ ផ្លូវបុប្ផាលាក់ខ្លួន មានសណ្ឋានពន់ពែនដូចអន្ទង់អាំង អមដោយភ្នំសងខាង អមដោយខ្យល់អាកាសបរិសុទ្ធ បានក្លាយជាទីតាំងថតរូបដ៏ទាក់ទាញមួយ ដែលទេសចរទៅដល់ទីនោះកម្រនឹងរំលង។ ធម្មជាតិដ៏ស្រស់បំព្រងនៅតំបន់ អារម្មណ៍ត្រជាក់លាយឡំជាមួយផ្សែងអ័ព្ទ បានធ្វើឲ្យអ្នកទេសចរដែលត្រូវធ្វើដំណើរឆ្ពោះទៅកាន់កំពូលភ្នំ ១៥០០ មានអារម្មណ៍ស្រស់ស្រាយ បាត់អស់ទុក្ខកង្វល់។
ដើម្បីជ្រាបកាន់តែច្បាស់ សូមអញ្ជើញលោក អ្នកនាង ទស្សនាបទសម្ភាសរវាងកញ្ញា ជឿន ស្រីណយ និងអ្នកទេសចរ នៅភ្នំ១៥០០ ដូចតទៅ៖
ផ្លូវបុប្ផាលាក់ខ្លួន ដែលស្ថិតស្រុកវាលវែង ខេត្តពោធិ៍សាត់ និងជាបណ្តោយផ្លូវឡើងទៅកាន់ភ្នំ១៥០០ កំពុងទទួលបានការចាប់អារម្មណ៍ជាខ្លាំង ពីសំណាក់ភ្ញៀវទេសចរជិតឆ្ងាយឲ្យឈប់ ដើម្បីគយគន់សម្រស់ជួរភ្នំក្រវាញ និងផ្ដិតយកទេសភាពធម្មជាតិដ៏ស្រស់ស្អាតនេះ។
លោក ម៉ៅ គីមតេង ទេសចរមួយរូបដែលបានកម្សាន្តលើកទី២ នៅភ្នំ១៥០០នេះ បានប្រាប់Thmeythmey25 ថាលោកពេញចិត្តនឹងទេសភាពដ៏មនោរម្យនៅផ្លូវបុប្ផាលាក់ខ្លួននេះណាស់។ លោក ម៉ៅ គីមតេង រៀបរាប់ដូច្នេះ៖« «ទេសភាពនៅទីនេះពិតជាទីមនោរម្យមែនទែន តាមដងផ្លូវមានព្រៃ ភ្នំ ពណ៌ខៀវស្រងាត់។ ពាក្យដែលគេប្រសិទ្ធនាមថាបុប្ផាលាក់ខ្លួន ពិតជាសាកសមមែន។ បរិស្ថានវិញ គឺមានការដាក់ធុងសំរាម បានត្រឹមត្រូវ ប៉ុន្តែទន្ទឹមនឹងនេះ ក៏មានបងប្អូនខ្លះគាត់ មិនបានបោះសំរាមបានត្រឹមត្រូវដែរ»។
ធម្មជាតិដ៏បំព្រងគន់មិនណាយ ធ្វើឲ្យអ្នកទេសចររូបនេះស្រស់ស្រាយ ហើយថានឹងត្រឡប់មកកម្សាន្តជាបន្តបន្ទាប់។
ចំណែកលោក ដឺហ្វុង យ៉ាន ភ្ញៀវទេសចរបារាំងដែលរស់នៅកម្ពុជាយូរឆ្នាំមកហើយនោះ ទើបតែបានមកដល់ផ្លូវបុប្ផាលាក់ខ្លួននេះលើកដំបូង។ សម្រាប់ យ៉ាន ផ្លូវបុប្ផាលាក់ខ្លួន និងភ្នំ១៥០០ មានទេសភាពស្អាតប្លែក ប៉ុន្តែទេសចររូបនេះ បារម្ភពីការបំផ្លាញបរិស្ថានដោយសារវត្តមានមនុស្សរស់នៅកាន់តែច្រើន ហើយទេសចរក៏កើនឡើង។ «ទីតាំងនេះ កាលពីមុនមិនសូវមានមនុស្សរស់នៅ ហើយពេលនេះ ចាប់ផ្ដើមមានមនុស្សរស់នៅច្រើនបណ្ដើរៗ ដែលអាចប៉ះពាល់ខ្លះៗដល់ព្រៃឈើ និងសត្វព្រៃ»។ នេះជាការរៀបរាប់របស់ យ៉ាន ដែលបានសំណូមពរដល់អ្នកទេសចរណ៍ដែលទៅកម្សាន្តនៅទីនេះ ជួយថែរក្សាបរិស្ថានឲ្យនៅស្រស់បំព្រង។
សូមជម្រាបផងដែរថា ផ្លូវជាតិលេខ៥៥ ឆ្ពោះទៅកាន់ភ្នំ១៥០០នេះ មានប្រវែងសរុប ១៨២.១៦គីឡូម៉ែត្រ តភ្ជាប់ពីផ្លូវជាតិលេខ៥ ក្នុងទីរួមខេត្តពោធិ៍សាត់ ឆ្ពោះទៅព្រំដែនថ្មដា ជាប់ជាមួយខេត្តត្រាត ប្រទេសថៃ។ ផ្លូវនេះ ពីមុនមានឈ្មោះជាផ្លូវអន្ទង់អាំង ហើយបានប្តូរទៅជាឈ្មោះ «បុប្ផាលាក់ខ្លួន» វិញ កាលពីថ្ងៃទី៩ ខែមីនា ឆ្នាំ២០២០៕
Tag:
ផ្លូវបុប្ផាលាក់ខ្លួន
ភ្នំ១៥០០
ពោធិ៍សាត់
© រក្សាសិទ្ធិដោយ thmeythmey.com