អន្តរជាតិ
លោកស្រី Kelly Craft អគ្គរដ្ឋទូតអាមេរិកប្រចាំអង្គការសហប្រជាជាតិ។ រូបថត AFP
×![]()
ដោយ: តន ចាន់រិទ្ធារ៉ា
ដំណើរទស្សនកិច្ចរបស់លោកស្រី Kelly Craft អគ្គរដ្ឋទូតអាមេរិកប្រចាំអង្គការសហប្រជាជាតិ (UN) ត្រូវលុបចោលវិញ។ បើតាមមន្ត្រីអាមេរិក ការលុបចោលដំណើរទស្សនកិច្ចនេះ ជាការអនុវត្តតាមគោលការណ៍របស់ក្រសួងការបរទេសដែលតម្រូវឲ្យលុបចោលដំណើរទស្សនកិច្ចទាំងអស់មុនការចូលកាន់តំណែងប្រធានាធិបតីថ្មី។ តៃវ៉ាន់សោកស្ដាយចំពោះការលុបចោលដំណើរទស្សកិច្ចដែលចិនគំរាមចាត់វិធានការតបវិញនេះ។
តាមគម្រោងដែលប្រកាសពីសប្ដាហ៍មុន អគ្គរដ្ឋទូតអាមេរិកប្រចាំ UN លោកស្រី Kelly Craft ត្រូវធ្វើដំណើរទស្សនកិច្ចនៅតៃវ៉ាន់នៅថ្ងៃទី១៣ ដល់ទី១៥ ខែមករា។ ប៉ុន្តែដំណើរទស្សនកិច្ចនេះ ត្រូវលុបចោលវិញ ដោយមន្ត្រីអាមេរិកនិយាយថា ដើម្បីត្រៀមការស្បថការចូលកាន់តំណែងរបស់ប្រធានាធិបតី ចូ បៃឌិន ។
មិនមែនតែដំណើរទស្សនកិច្ចរបស់លោកស្រី Craft ឡើយ សូម្បីតែដំណើរទស្សនកិច្ចរបស់ប្រមុខការទូតអាមេរិក ម៉ៃ ប៉ុមប៉េអូ នៅអឺរ៉ុប ក៏ត្រូវលុបចោលដែរ។ លោក ប៉ុមប៉េអូ និយាយនៅថ្ងៃទី១២ ខែមករា ថា ការលុបចោលនេះជាផ្នែកមួយនៃរយៈពេលអន្តរកាលសម្រាប់ការមកដល់រដ្ឋបាលលោក បៃឌិន ។ ប៉ុន្តែមន្ត្រីអឺរ៉ុប និងលុបសំបួទីដែលលោក ប៉ុមប៉េអូ ត្រូវធ្វើទស្សនកិច្ចនោះ អះអាងថា សមភាគីលុចសំបួ និងមន្ត្រីអឺរ៉ុប បដិសេធមិនជួបលោក ប៉ុមប៉េអូ ។
តៃវ៉ាន់ឯណោះវិញ ក៏ខកចិត្តចំពោះការលុបចោលដំណើរទស្សនកិច្ចនេះ តែក៏យល់ និងគោរពការសម្រេចចិត្តរបស់អាមេរិកដែរ។ ក្នុងសេចក្ដីប្រកាសថ្ងៃទី១៣ ខែមករា ក្រសួងការបរទេសតៃវ៉ាន់ បញ្ជាក់ថា ខ្លួនសោកស្ដាយដែលអគ្គរដ្ឋទូតអាមេរិកប្រចាំ UN មិនអាចដឹកនាំប្រតិភូធ្វើទស្សនកិច្ចនៅតៃវ៉ាន់បានដូចការគ្រោងទុក ប៉ុន្តែនៅតែស្វាគមន៍លោកស្រី Craft នៅពេលវេលាសមរម្យណាមួយនៅថ្ងៃអនាគតដដែល។
ការលុបចោលទស្សនកិច្ចនេះ ទំនងធ្វើឲ្យចិនត្រជាក់ចិត្តបន្តិចដែរ។ នេះក៏ព្រោះតែពេលក្រសួងការបរទេសអាមេរិកប្រកាសគម្រោងទស្សនកិច្ចរបស់លោកស្រី Craft ភ្លាម បេសកកម្មចិនប្រចាំ UN ក៏ចេញមុខជំទាស់ភ្លាមរហូតប្រើពាក្យថា អាមេរិកប្រលែងលេងនឹងភ្លើងទៀតផង។
កន្លងមក ពេលមន្ត្រីជាន់ខ្ពស់អាមេរិកទៅតៃវ៉ាន់ ចិនក៏បញ្ចេញសាច់ដុំយោធារបស់ខ្លួន ដោយបញ្ជូនយន្តហោះចម្បាំងទៅកៀកកោះតៃវ៉ាន់។ ចិនក៏តែងប្រកាសមិនដាច់ពីមាត់ពីការជម្រើសប្រើយោធាដើម្បីសង្គ្រប់យកតៃវ៉ាន់មកគ្រប់គ្រងវិញ បើនិន្នាការឯករាជ្យរបស់មេដឹកនាំតៃវ៉ាន់ Tsai Ing-wen នៅតែមិនថមថយនោះ៕
Tag:
អាមេរិក
តៃវ៉ាន់
UN
© រក្សាសិទ្ធិដោយ thmeythmey.com
