ជាតិ
សង្គមជាតិ
លោក គន់ គីម ចូលរួមរំលែកទុក្ខជាមួយរដ្ឋាភិបាលឥណ្ឌូណេស៊ី ចំពោះឧបទ្ទវហេតុធ្លាក់យន្តហោះ
កងទ័ពជើងទឹកជំនាញមុជទឹក កំពុងបំពេញបេសកកម្មរុករកយន្តហោះផ្ទុកមនុស្ស៦២នាក់ ដែលធ្លាក់ចូលសមុទ្រចាវ៉ា (Java) ជិតទីក្រុងហ្សាកាតា កាលពីថ្ងៃទី៩ ខែមករា ឆ្នាំ២០២១។ រូបពី AFP
×![]()
ដោយ: សារព័ត៌មានថ្មីៗ
ទេសរដ្ឋមន្ត្រី គន់ គីម អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយកម្ពុជា បានសរសេរលិខិតជូនទៅលោក ដូនី ម៉ូណាដូ (Doni Monado) ប្រធានអាជ្ញាធរជាតិគ្រប់គ្រងគ្រោះមហន្តរាយឥណ្ឌូណេស៊ី ដើម្បីបង្ហាញសមានចិត្តនិងចូលរួមរំលែកទុក្ខជាមួយរដ្ឋាភិបាលឥណ្ឌូណេស៊ី ក៏ដូចជាជាមួយប្រជាជនឥណ្ឌូណេស៊ីទាំងមូល ដែលជួបឧបទ្ទវហេតុដ៏រន្ធត់មួយ គឺយន្តហោះដឹកអ្នកដំណើរ ធ្លាក់ចូលសមុទ្រនាពេលថ្មីៗនេះ។ 
តាមរយៈលិខិតរំលែកទុក្ខ ដែលធ្វើឡើងនៅថ្ងៃទី១១ ខែមករា ឆ្នាំ២០២១ ទេសរដ្ឋមន្ត្រី គន់ គីម បង្ហាញជំនឿយ៉ាងមុតមាំថា ការដឹកនាំរបស់រដ្ឋាភិបាលឥណ្ឌូណេស៊ីនិងភាពខ្លៀវក្លារបស់ប្រជាជនឥណ្ឌូណេស៊ី នឹងអាចយកជម្នះបានលើការលំបាកនេះ។ លោក មានប្រសាសន៍ដូច្នេះថា៖«ក្នុងស្មារតីសាមគ្គីភាពរបស់សហគមន៍អាស៊ាន ព្រះរាជាណាចក្រកម្ពុជា ឈរនៅជាមួយរដ្ឋាភិបាលនិងប្រជាជនឥណ្ឌូណេស៊ីដោយសាមគ្គីភាព ក្នុងស្ថានភាពលំបាកនេះ។ សតិអារម្មណ៍និងក្តីស្រឡាញ់របស់យើង គឺស្ថិតនៅជាមួយជនរងគ្រោះនិងក្រុមគ្រួសាររបស់ពួកគេ»។
សូមរម្លឹកថា កាលពីថ្ងៃទី៩ ខែមករា យន្តហោះរបស់ឥណ្ឌូណេស៊ីមួយ ដែលផ្ទុកមនុស្សទាំងអស់៦២នាក់ បានហោះចេញពីទីក្រុងហ្សាកាតា ហើយក៏បានធ្លាក់ចូលសមុទ្រចាវ៉ា (Java Sea) ដែលស្ថិតនៅមិនឆ្ងាយប៉ុន្មានពីទីក្រុងហ្សាកាតា។ អាជ្ញាធរឥណ្ឌូណេស៊ី កំពុងបន្តស្រាវជ្រាវពីករណីធ្លាក់យន្តហោះនេះ ប៉ុន្តែមកដល់ពេលនេះ អាជ្ញាធរឥណ្ឌូណេស៊ី នៅមិនទាន់អាចកំណត់បានជាក់លាក់ឡើយថា មានអ្នកស្លាប់ចំនួនប៉ុន្មាននាក់៕
Tag:
គន់ គីម
ធ្លាក់យន្តហោះនៅឥណ្ឌូណេស៊ី
© រក្សាសិទ្ធិដោយ thmeythmey.com
