COVID-19
អន្តរជាតិ
ចិន មានអ្នកស្លាប់ដោយសារកូវីដ-១៩ ដំបូងក្នុងពេល៨ខែ ខណៈក្រុមជំនាញ WHO ទៅដល់វូហាន
គ្រូពេទ្យ យកសំណាកពីកុមារចិននៅទីក្រុងស៊ីចាងឆ័ង ខេត្តហឺប៉ី ដើម្បីពិនិត្យរកមើលកូវីដ-១៩ ។ រូបថត Xinhua
×![]()
ដោយ: ធៀន ភារិន្ទ
អាជ្ញាធរសុខាភិបាលចិន នៅថ្ងៃទី១៤ ខែមករា បានរាយការណ៍ពីការស្លាប់ដោយសារកូវីដ-១៩ មួយករណី ដែលនេះជាករណីស្លាប់ក្នុងរយៈពេល៨ខែចុងក្រោយ។ ករណីស្លាប់នេះ កើតឡើងស្របពេលចិន មានករណីឆ្លងហក់ឡើងដល់កំណត់ត្រាថ្មីផងដែរ។ 
ក្រុងវូហាន ប្រទេសចិន គឺជាកន្លែងដែលផ្ទុះកូវីដ-១៩ មុនដំបូងគេ។ បន្ទាប់ពីមានករណីឆ្លងផ្ទុះបែបនេះ រដ្ឋាភិបាលចិន បានចាត់វិធានការបិទក្រុង ផ្អាកមធ្យោបាយដឹកជញ្ជូន បិទហាងទំនិញមិនចាំបាច់ និងវិធានការផ្សេងទៀតជាដើម។ ដោយសារវិធានការទាំងនោះ ចិនបានធ្វើឲ្យករណីឆ្លងកូវីដ-១៩ ជាច្រើនពាន់ករណី ធ្លាក់មកស្ថិតក្រោមការគ្រប់គ្រង។ យ៉ាងណាមិញ មួយរយៈចុងក្រោយនេះ ករណីឆ្លងកូវីដ-១៩ នៅចិន បានងើបឡើងវិញ។
នៅថ្ងៃទី១៤ ខែខែមករា អាជ្ញាធរសុខាភិបាល បានរាយការណ៍ពីករណីឆ្លងថ្មីចំនួន ១៣៨ករណី ដោយ ១២៤ករណី គឺជាករណីឆ្លងក្នុងស្រុក។ នេះជាតួលេខឆ្លងប្រចាំថ្ងៃដ៏ច្រើនគិតតាំងពីខែមីនា ឆ្នាំ២០២០ មក។ ជាមួយគ្នា ចិនក៏កត់ត្រាករណីស្លាប់លើកដំបូងក្នុងពេល៨ខែមកផងដែរ ដោយករណីស្លាប់មាននៅខេត្តហឺប៉ី ជាប់រដ្ឋធានីប៉េកាំង ដែលជាទីតាំងផ្ទុះករណណីឆ្លងថ្មី។ ករណីនេះ មិនត្រូវបានអាជ្ញាធរ បញ្ជាក់ពីព័ត៌មានលំអិតអ្វីឡើយ។
តួលេខសរុបរបស់ចិន មានចំនួន ៨៧៨៤៤ករណី អ្នកស្លាប់មានចំនួន ៤៦៣៥នាក់។ ចំណែកអ្នកជាសះស្បើយមានចំនួន ៨២៣២៤នាក់។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ជាផ្នែកមួយនៃវិធានទប់ស្កាត់ការរាតត្បាតកូវីដ-១៩ អាជ្ញាធរចិន នៅសប្តាហ៍មុន បានធ្វើតេស្តទ្រង់ទ្រាយធំ បិទប្រព័ន្ធដឹកជញ្ជូន និងហាងលក់ទំនិញជាច្រើន ក្នុងក្រុងស៊ីចាឆ័ង ដែលជាទីក្រុងធំជាងគេក្នុងខេត្តហឺប៉ី។ ក្រុងស៊ីងថាយ និងឡាងហ្វាង របស់ខេត្តនេះ ក៏ត្រូវបានបិទដែរ។ ដោយឡែកខេត្តហីឡុងជាំង នៅភាគឦសានវិញ ស្ថិតក្រោមការប្រកាសអាសន្នផងដែរ បន្ទាប់ពីករណីឆ្លងកើនឡើង។ ប្រជាជនក្នុងខេត្តនេះ មិនត្រូវបានអនុញ្ញាតឲ្យចេញពីខេត្តឡើយ។
ខណៈករណីឆ្លងផ្ទុះឡើងនៅចិន ក្រុមអ្នកវិទ្យាសាស្ត្រអន្តរជាតិ ដែលដឹកនាំដោយអង្គការសុខភាពពិភពលោក (WHO) ត្រូវទៅដល់ក្រុងវូហាននៅថ្ងៃទី១៤ ខែមករានេះដែរ ដើម្បីស៊ើបអង្កេតពីដើមកំណើតនៃកូរ៉ូណាវីរុស។ អ្នកជំនាញចំនួន១០រូប ដែលដឹកនាំដោយលោក Peter Ben Embarek អ្នកវិទ្យាសាស្ត្ររបស់ WHO ត្រូវដាក់ចត្តាឡីស័ករយៈពេល ១៤ថ្ងៃ មុនបើកការស៊ើបអង្កេត។
ចំណែកលោក Hung Nguyen អ្នកវិទ្យាសាស្ត្រជនជាតិវៀតណាម ដែលស្ថិតក្នុងក្រុមអ្នកវិទ្យាសាស្ត្រអន្តរជាតិទៅវូហាននោះដែរ បានបញ្ជាក់ថា អ្នកជំនាញនឹងប្រើប្រាស់ពេលវេលា រយៈពេល ១៤ថ្ងៃ ដើម្បីសម្ភាសប្រភពជាច្រើននៅវិទ្យាស្ថានស្រាវជ្រាវ, មន្ទីរពេទ្យ និងអ្នកលក់ដូរក្នុងផ្សារលក់គ្រឿងសមុទ្រ ក្នុងក្រុងវូហានដែលត្រូវបានសន្មត់ថា ជាប្រភពចម្លងមុនគេ។ បេសកកម្មនេះ អាចផ្តោតតែនៅក្នុងក្រុងវូហានមួយប៉ុណ្ណោះ។
កន្លងទៅ អាមេរិក បានអំពាវនាវឲ្យអង្គការសុខភាពពិភពលោក ស៊ើបអង្កេតលើដើមកំណើតកូរ៉ូណាវីរុស នៅក្នុងប្រទេសចិនឲ្យមានតម្លាភាព បន្ទាប់ពីចោទអង្គការអន្តរជាតិមួយនេះលម្អៀងទៅរកចិន៕
Tag:
ចិន
កូវីដ-១៩
© រក្សាសិទ្ធិដោយ thmeythmey.com
