ជាតិ
WWF និងអគ្គនាយកដ្ឋានកៅស៊ូ រួមគ្នាលើកកម្ពស់ខ្សែចង្វាក់ផ្គត់ផ្គង់កៅស៊ូធម្មជាតិ
×![]()
ដោយ: សារព័ត៌មានថ្មីៗ
អង្គការ WWF-កម្ពុជា និងអគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី១២ ខែមករា បានចុះអនុស្សារណៈយោគយល់ ដើម្បីលើកកម្ពស់ខ្សែចង្វាក់ផ្គត់ផ្គង់កៅស៊ូធម្មជាតិប្រកបដោយនិរន្តរភាព និងតម្លាភាពនៅកម្ពុជា ជាពិសេសកសិករកៅស៊ូគ្រួសារនៅមណ្ឌលគិរី។
កិច្ចសហប្រតិបត្តិការនេះ ធ្វើឡើងក្រោមជំនួយថវិការបស់ក្រសួងកិច្ចសហប្រត្តិបត្តិការសេដ្ឋកិច្ច និងអភិវឌ្ឍន៍ (BMZ) អាល្លឺម៉ង់ តាមរយៈអង្គការ Welthungerhilfe ដែលកំពុងត្រូវបានអនុវត្តផងដែរនៅថៃ និងមីយ៉ាន់ម៉ា។ នៅកម្ពុជា កិច្ចសហប្រតិបិត្តការរយៈពេលបីឆ្នាំនេះ ជំរុញការចូលរួម និងសហការពីភាគីពាក់ព័ន្ឋសំខាន់ៗរបស់រាជរដ្ឋាភិបាល វិស័យឯកជន អង្គការសង្គមស៊ីវិល និងកសិករកៅស៊ូគ្រួសារ ក្នុងខេត្តមណ្ឌលគិរី ព្រមទាំងលើកកម្ពស់ជីវភាពកសិករកៅស៊ូគ្រួសារ ជនជាតិដើមភាគតិច និងកម្មករកៅស៊ូ។
«ការលើកកម្ពស់ផលិតកម្មកៅស៊ូគ្រួសារប្រកបដោយនិរន្តរភាពនិងទំនួលខុសត្រូវខ្ពស់តាមរយៈការអនុវត្តការគ្រប់គ្រងបច្ចេកទេសបានយ៉ាងល្អត្រឹមត្រូវនៅកម្ពុជា មិនត្រឹមតែជួយបង្កើតការងារនិងចំណូលដល់សហគមន៍មូលដ្ឋានប៉ុណ្ណោះទេ វាក៏ជួយកាត់បន្ថយសម្ពាធលើធនធានធម្មជាតិផងដែរ»។ នេះជាការលើកឡើងរបស់ លោក សេង ទៀក នាយកអង្គការ WWF-កម្ពុជា។
បើតាម លោក ប៉ុល សុផា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយក នៃអគ្គនាយកដ្ឋានកៅស៊ូ ការកសាងសមត្ថភាព និងបណ្តុះបណ្តាលបច្ចេកទេសដល់កសិករដាំកៅស៊ូ និងមន្ត្រីជំនាញផ្នែកកៅស៊ូ បូករួមទាំងការចូលរួមយ៉ាងសកម្មពីគ្រប់ភាគីពាក់ព័ន្ធក្នុងវិស័យកៅស៊ូនេះ នឹងធ្វើឱ្យវិស័យកៅស៊ូក្នុងប្រទេសកម្ពុជាកាន់តែរីកចម្រើនទៅមុខប្រកបដោយចីរភាព។
បច្ចុប្បន្ននេះ កសិករកៅស៊ូគ្រួសារ ចំនួន ១០០ នាក់ ដែលរស់នៅជុំវិញសហគមន៍តំបន់ការពារចំនួន៥ នៅជិតដែនជម្រកសត្វព្រៃស្រែពកក្រោមការគាំទ្រដោយអង្គការ WWF បានចូលរួមក្នុងគម្រោងនេះរួចមកហើយ ហើយគម្រោងនឹងបន្តជំរុញការចូលរួមរបស់កសិករកៅស៊ូគ្រួសាររហូតដល់ ៣០០ គ្រួសារត្រឹមឆ្នាំ២០២២៕
Tag:
មណ្ឌលគិរី កសិកម្ម
© រក្សាសិទ្ធិដោយ thmeythmey.com
