លោក ឈុំ សុជាត៖ នាយទាហានលោតឆ័ត្រយោងម្នាក់ស្លាប់ និងរងរបួសម្នាក់ ដោយសារបញ្ហាខ្យល់

ជាតិ

លោក ឈុំ សុជាត៖ នាយទាហានលោតឆ័ត្រយោងម្នាក់ស្លាប់ និងរងរបួសម្នាក់ ដោយសារបញ្ហាខ្យល់

14, Jan 2021 , 4:18 pm

រូបភាព

រូបលោក លឹម សាយ ជាគ្រូហ្វឹកហ្វឺនយុទ្ធវិធីនៃកងទ័ពឆ័ត្រយោង ដែលស្លាប់បាត់បង់ជីវិត នៅថ្ងៃទី១៤ មករា ២០២១(រូបពីហ្វេសប៊ុកលោក លឹម សាយ)

ដោយ: រំដួល ចិត្រា (Romdoul Chetra)

ភ្នំពេញ៖ នាយទាហានលោតឆ័ត្រយោងម្នាក់ស្លាប់ និងម្នាក់ទៀតរងរបួស នៅថ្ងៃទី១៤ មករានេះ ដោយសារបញ្ហាខ្យល់ ។ ហេតុការណ៍នេះ កើតឡើងក្នុងការបិទវគ្គហ្វឹកហ្វឺនជំនាញកុម្ម៉ង់ដូ ជំនាន់ទី១០ ,វគ្គហ្វឹកហ្វឺនជំនាញឆត្រយោងជំនាន់ទី២៩ និងបើកវគ្គហ្វឹកហ្វឺនជំនាញឆត្រយោង ជំនាន់ទី៣០ នៅសាលាហ្វឹកហ្វឺនទ័ពពិសេស «តេជោសែនឱរ៉ាល់ » ខេត្តកំពង់ស្ពឺ។ នេះបើតាមលោក ឈុំ សុជាត អ្នកនាំពាក្យក្រសួងការពារជាតិ។

លោក ឈុំ សុជាតិ បានបញ្ជាក់ថា មូលហេតុដែលនាំឱ្យមានឧបទ្ទេវហេតុនេះ ដោយសារខ្យល់ខ្លាំង ទើបធ្វើឱ្យខ្សែឆ័ត្រយោង នាយទាហានទាំងពីរវ័ណ្តគ្នា ហើយធ្លាក់ពីកម្ពស់១០០ម៉ែត្រមកដី។ បើតាមលោក ឈុំ សុជាត អ្នកទាំងពីរនោះ ត្រូវបានបញ្ជូនមកមន្ទីរពេទ្យសង្គ្រោះបន្ទាន់ដែរ ប៉ុន្តែជាអកុសលនាយទាហាន មានឈ្មោះ លឹម សាយ ជាគ្រូហ្វឹកហ្វឺនយុទ្ធវិធីនៃកងទ័ពឆ័ត្រយោង បានស្លាប់នៅម៉ោង១២ ថ្ងៃត្រង់ ដោយសារស្ថានភាពធ្ងន់ធ្ងរពេក ។

ថ្លែងប្រាប់សារព័ត៌មានថ្មីៗ អ្នកនាំពាក្យរូបនេះ បានបញ្ជាក់ដូច្នេះថា៖«បញ្ហាមកពីខ្យល់គួច ទើបធ្វើនាំឱ្យប៉ះខ្សែ(ឆ័ត្រយោង)គ្នា ធ្លាក់ចុះមក »។

លោក ឈុំ សុជាត ចាត់ទុកការបាត់បង់ជីវិតគ្រូហ្វឹកហ្វឺនយុទ្ធវិធីរូបនេះ ជាការបាត់បង់ធនធានមនុស្សយ៉ាងសំខាន់ម្នាក់សម្រាប់ជាតិ។ «ខ្ញុំសូមចូលរួមមរណទុក្ខជាមួយគ្រួសារសព ហើយនឹងសោកស្ដាយចំពោះគ្រូនាយទាហានយើងដែលមានបច្ចេកទេសបាត់បង់ធនធានដ៏មានតម្លៃ ដែលបានបណ្ដុះបណ្ដាល(នាយទាហាន)កន្លងមក។ គាត់ជាធនធានមានតម្លៃរបស់ជាតិយើង»។ នេះបើតាមអ្នកនាំពាក្យក្រសួងការពារជាតិ។