COVID-19
អន្តរជាតិ
កន្លែងពិនិត្យកម្តៅ នៅអាកាសយានដ្ឋាន Wattay ក្នុងទីក្រុងវៀងចន្ទន៍ ឡាវ។ រូបភាព៖ AFP
×![]()
ដោយ: សារព័ត៌មានថ្មីៗ
អាជ្ញាធរឡាវ បានបិទតំបន់ចំនួនពីរនៅខេត្តភាគខាងជើង បន្ទាប់ពីមានជនជាតិចិនម្នាក់ធ្វើតេស្តមានលទ្ធផលវិជ្ជមានជំងឺកូវីដ-១៩ ពេលបញ្ជូនទៅដល់ទឹកដីចិនវិញ។ 
តាមការអះអាងរបស់អាជ្ញាធរឡាវ ពលករចិនម្នាក់ ដែលរស់នៅក្នុងតំបន់សេដ្ឋកិច្ចពិសេសត្រីកោណមាស បានចេញរោគសញ្ញាគ្រុនក្តៅ និងត្រូវបញ្ជូនទៅមន្ទីរពេទ្យស្រុក Ton Pheung ខេត្ត Bokeo នៅថ្ងៃទី៨ ខែមករា។ បន្ទាប់មក ជនជាតិចិននេះ ត្រូវយកទៅមន្ទីរពេទ្យខេត្ត Bokeo បន្តទៀត មុននឹងត្រូវដឹកទៅចិន។ ទៅដល់ចិន បុរសរូបនេះ ក៏ត្រូវបានធ្វើតេស្ត ហើយចេញលទ្ធផលវិជ្ជមាន។ នេះបើតាមសារព័ត៌មាន Laotian Times ។
ទាក់ទិននឹងបញ្ហានេះ អាជ្ញាធរ បានសម្រេចបិទស្រុក Ton Pheung និងតំបន់សេដ្ឋកិច្ចពិសេសត្រីកោណមាសបណ្តោះអាសន្ន ដោយមានសុពលភាពចាប់ពីថ្ងៃទី១២ ខែមករា រហូតដល់ ថ្ងៃទី២៥ ខែមករា។ អាជ្ញាធរឡាវ បានរឹតត្បិតលើការធ្វើដំណើរលើកលែងតែការធ្វើដំណើរក្នុងពេលមានកិច្ចការសំខាន់ ការជូនកូនទៅសាលារៀន និងទិញអាហារជាដើម។ ចំណែកអ្នកដែលពាក់ព័ន្ធជាមួយជនជាតិចិនរូបនេះ ត្រូវធ្វើតេស្ត និងដាក់ចត្តាឡីស័កទាំងអស់។
ទន្ទឹមគ្នានេះ ចិន និងឡាវ បានសហការជាមួយគ្នា ដើម្បីស្វែងរកជាមួយអ្នកដែលពាក់ព័ន្ធជាមួយជនជាតិចិនរូបនោះ ហើយអាជ្ញាធរខេត្ត បានបញ្ជាឲ្យធ្វើតេស្តលើប្រជាជនរូបណា ដែលសង្ស័យថា មានផ្ទុកកូវីដ-១៩ ឬចេញរោគសញ្ញាកូវីដ-១៩ ។
គិតមកត្រឹមថ្ងៃទី១៤ ខែមករា ឡាវ បានធ្វើតេស្តលើមនុស្សចំនួន ៩៦៩៣៩នាក់។ ចំណែកអ្នកផ្ទុកកូវីដ-១៩ សរុបមានចំនួន ៤១នាក់ និងមិនមានករណីស្លាប់។ កន្លងមក លោករដ្ឋមន្ត្រីសុខាភិបាលឡាវ Bounkong Syhavong បានអះអាងថា ក្រុមគ្រូពេទ្យ និងបុគ្គលិកសុខាភិបាល ដែលថែទាំអ្នកជំងឺកូវីដ-១៩ ចំនួន ២០០នាក់ ត្រូវបានចាក់វ៉ាក់សាំងរួចហើយ។
ជាមួយគ្នានេះ ឡាវអាចនឹងចាប់ផ្តើមយុទ្ធនាការចាក់វ៉ាក់សាំងរបស់ខ្លួនក្នុងខែមេសាខាងមុខ ស្របពេលរដ្ឋាភិបាល ទទួលបានវ៉ាក់សាំងពីក្រុមហ៊ុនឱសថចិន Sinopharm, ពីរុស្ស៊ី និងត្រៀមទទួលបន្ថែមតាមរយៈគម្រោង COVAX ដែលស្ថិតក្រោមការគ្រប់គ្រងរបស់អង្គការសុខភាពពិភពលោក។
នៅក្នុងខែធ្នូ ឆ្នាំ២០២០ កន្លងទៅ ស្រុក Ton Pheung ក៏ធ្លាប់ត្រូវបានអាជ្ញាធរឡាវ បិទម្តងហើយ បន្ទាប់ពីជនជាតិចិនចំនួន២រូប ដែលឆ្លងចូលមកឡាវខុសច្បាប់ មានផ្ទុកកូវីដ-១៩ ដែរ៕
Tag:
ឡាវ
កូវីដ-១៩
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
