អន្តរជាតិ
នាយករដ្ឋមន្ត្រីកាណាដា ជំរុញឲ្យប្រទេសទាំងអស់រួមគ្នាប្រឆាំងការឃុំខ្លួនជនបរទេសដោយចិន
លោកនាយករដ្ឋមន្រ្តីកាណាដា លោក ចាស្ទីន ទ្រូដូ។ រូបភាព៖ Reuters
×![]()
ដោយ: ធៀន ភារិន្ទ
នាយករដ្ឋមន្ត្រីកាណាដា លោក ចាស្ទីន ទ្រូដូ នៅថ្ងៃទី១៤ ខែមករា បានជំរុញឲ្យប្រជាជាតិនៅជុំវិញពិភពលោក រួបរួមគ្នាប្រឆាំងនឹងការឃុំខ្លួនជនបរទេសពីសំណាក់ចិន។ លោក ទ្រូដូ ព្រមានប្រទេសទាំងអស់ សុទ្ធតែអាចរងគ្រោះដោយសារទង្វើរបស់ចិនដែរ។ 
នៅក្នុងកិច្ចសម្ភាសនាកម្មវិធី Reuters Next លោក ចាស្ទីន ទ្រូដូ នាយករដ្ឋមន្ត្រីកាណាដា បានលើកឡើងថា កាណាដា មានការសម្របខ្លួនខ្ពស់ ពោលគឺមិនត្រឹមតែជាមួយអាមេរិកប៉ុណ្ណោះទេ ប៉ុន្តែជាមួយសម្ព័ន្ធមិត្តនៅជុំវិញពិភពលោក ដើម្បីតតាំងនឹងការទូតចាប់បង្ខំ ដែលចិនកាន់តែប្រើប្រាស់ខ្លាំងឡើង។
«យើងត្រូវតែក្រោកឈរទាំងអស់គ្នា ដោយសារយើងមិនដឹងប្រជាជនរបស់ប្រទេសណា នឹងត្រូវចិនចាប់ នាពេលខាងមុខទេ»។ លោក ទ្រូដូ បានលើកឡើងបែបនេះ ដោយទំនងចង់សំដៅការដែលចិនបចាប់ខ្លួនបុរសជនជាតិកាណាដាពីររូប នៅចុងឆ្នាំ២០១៨ ។ ការចាប់ខ្លួនបុរសពីររូបនេះ ត្រូវបានកាណាដា ចាត់ទុកជាទង្វើសងសឹករបស់ចិនក្រោយយកាណាដា បានចាប់ខ្លួន ប្រធានហិរញ្ញវត្ថុ លោកស្រី Meng Wanzhou តាមដីការចាប់ខ្លួនរបស់អាមេរិក។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ពេលនេះ លោក Meng Wanzhou កូនស្រីរបស់ប្រធានប្រតិបត្តិក្រុមហ៊ុន Huawei ត្រូវបានឃុំខ្លួននៅក្នុងផ្ទះ នៅក្នុងក្រុង Vancouver ប្រទេសកាណាដា។
ការលើកឡើងរបស់នាយករដ្ឋមន្ត្រីកាដាណា ធ្វើឡើងស្របពេលរដ្ឋាភិបាលក្រុងប៉េកាំង បើកផ្លូវកាន់តែធំឲ្យកាណាដាអាចទំនាក់ទំនងជាមួយបុរសទាំងពីររូបនោះ។ កន្លងទៅ លោកស្រី Syrine Khoury អ្នកនាំពាក្យក្រសួងការបរទេសកាណាដា បានអះអាងថា រដ្ឋាភិបាលបានធ្វើព្រមព្រៀងជាមួយចិនរួចហើយ ដែលពាក់ព័ន្ធក្រុមគ្រួសារ និងទំនាក់ទំនងជាមួយបុរសត្រូវឃុំខ្លួនទាំងពីរ។
ប្រភពជិតស្និទ្ធនឹងករណីចាប់ខ្លួនបុរសទាំងនោះ បានអះអាងថា កិច្ចព្រមព្រៀងជាមួយចិនលើការទាក់ទងជាមួយជនជាតិកាណាដា បានស្តារឡើងវិញតាំងពីខែតុលា ឆ្នាំ២០១៩ ឯណោះ។ អ្នកទាំងពីររូប ក៏បាននិយាយទូរសព្ទជាមួយក្រុមគ្រួសារផងដែរ។
ចំណែកភាគីកាណាដាវិញ រដ្ឋាភិបាល ក៏បានអនុញ្ញាតឲ្យគ្រួសាររបស់លោកស្រី Meng ចូលជួបផងដែរ ប៉ុន្តែស្ថិតក្រោមការវិធានរឹតបន្តឹង ដើម្បីទប់ស្កាត់កូវីដ-១៩។ យ៉ាងណាមិញ អ្នកនាំពាក្យរបស់រដ្ឋមន្ត្រីអន្តោប្រវេសន៍ បានបដិសេធ សុំមិនបញ្ចេញចម្លើយអ្វីទាំងអស់ ដែលថាតើ ការអនុញ្ញាតឲ្យក្រុមគ្រួសារលោកស្រី Meng ចូលជួបនោះ មានទាក់ទិននឹងការស្តារការទាក់ទងជាមួយបុរសត្រូវឃុំទាំងពីរដែរឬយ៉ាងណា។
សូមបញ្ជាក់ថា ទំនាក់ទំនងចិន និងកាណាដា បានធ្លាក់ចុះយ៉ាងខ្លាំង បន្ទាប់ពីករណីចាប់ខ្លួនប្រធានហិរញ្ញវត្ថុ Huawei នេះ។ កាណាដា និងចិន តែងតែប៉ះសម្តីគ្នាជាញឹកញាប់ ហើយឈានទៅដល់ចិន ហាមឃាត់ការនាំចូលផលិតផលរបស់កាណាដាមួយចំនួន ថែមទៀត៕
Tag:
កាណាដា
ចិន
© រក្សាសិទ្ធិដោយ thmeythmey.com
