អន្តរជាតិ
លោក ប្រាយុទ្ធ ថា ថៃនឹងមិនប្រើវ៉ាក់សាំងកូវីដ-១៩ ដែលមិនទាន់សាកល្បងចប់ឡើយ នាយករដ្ឋមន្រ្តីថៃ ប្រាយុទ្ធ ចន្ទអូចា ។ រូបថតពីហ្វេសហ៊ុកលោក ប្រាយុទ្ធ
× នាយករដ្ឋមន្ត្រីថៃ ប្រាយុទ្ធ ចន្ទអូចា បានប្រកាសនៅថ្ងៃទី១៧ ខែមករា ថា ថៃនឹងមិនប្រើប្រាស់វ៉ាក់សាំងកូវីដ-១៩ ដែលមិនមានសុវត្ថិភាពឡើយ ហើយវ៉ាក់សាំងដែលថៃនឹងប្រើ ត្រូវឆ្លងកាត់ការធ្វើតេស្តឱ្យចប់សព្វគ្រប់សិន។ សម្រាប់លោក ប្រាយុទ្ធ ប្រជាជនថៃមិនមែនជាសត្វជ្រូកដែលត្រូវប្រើដើម្បីសាកល្បងប្រសិទ្ធភាពវ៉ាក់សាំងឡើយ។
មកទល់ពេលនេះ ប្រទេសជាច្រើនហើយបានចាក់វ៉ាក់សាំងកូវីដកូវីដ-១៩ លើប្រជាជនខ្លួន។ ខណៈអ្នកទទួលវ៉ាក់សាំភាគច្រើនមិនមែនបញ្ហា គេក៏ឃើញមានករណីប្រតិកម្មមួយចំនួនដែរនៅអាមេរិក និងចុងក្រោយនៅន័រវេសដែលមានអ្នកស្លាប់ដល់ទៅ២៣នាក់ក្រោយចាក់វ៉ាក់សាំងក្រុមហ៊ុន Pfizer រួច ហើយដែលសុទ្ធសឹងជាមនុស្សចាស់ជរា។
ជាមួយនឹងផលប៉ះពាល់បែបនេះ នាយករដ្ឋមន្ត្រីថៃ ប្រាយុទ្ធ ចន្ទអូចា វិញ អះអាងថា ថៃនឹងរង់ចាំមើលការវាយតម្លៃរបស់អ្នកជំនាញថា តើរឿងហេតុនេះកើតមកពីវ៉ាក់សាំងផ្ទាល់ ឬដោយសារកត្តាផ្សេងដូចជាអាយុ ឬជំងឺប្រចាំកាយរបស់អ្នកដែលចាក់វ៉ាក់សាំងទាំងនោះ? ប៉ុន្តែលោក ប្រាយុទ្ធ បញ្ជាក់ថា រដ្ឋាភិបាលលោកនឹងមិនប្រើវ៉ាក់សាំងដែលមិនទាន់បញ្ចប់ការសាកល្បង ឬក៏ធ្វើដូចប្រទេសផ្សេងដែលប្រញាប់ផ្ដល់ការអនុញ្ញាតឲ្យវ៉ាក់សាំងដើម្បីការប្រើប្រាស់បន្ទាន់ដែរ។
ក្នុងសំណេរលើទំព័រហ្វេសប៊ុករបស់ខ្លួននៅថ្ងៃទី១៧ ខែមករា នាយករដ្ឋមន្ត្រីថៃរូបនេះ បន្តថា សម្រាប់ប្រជាជនថៃ លោកនឹងមិនឲ្យមានបញ្ហាប្រឈមបែបនេះឡើយ។ លោក ប្រាយុទ្ធ ប្រកាន់ជំហរថា នឹងមិនសម្រេចចិត្តលឿនខ្ជីខ្ជាក្នុងការប្រើប្រាស់វ៉ាក់សាំងដែលមិនទាន់ត្រូវបានបញ្ចប់ការធ្វើតេស្តឡើយ ហើយក៏មិនអនុញ្ញាតឲ្យថៃក្លាយជាកន្លែងពិសោធដែរ។
«ជាការប្រុងប្រយ័ត្ន ខ្ញុំដាក់ចេញគោលនយោបាយសំខាន់មួយ គឺយើងត្រូវច្បាស់់ថា វ៉ាក់សាំងត្រូវមានសុវត្ថិភាពមុនឲ្យប្រជាជនថៃប្រើប្រាស់។» នេះជាការបញ្ជាក់របស់លោកនាយករដ្ឋមន្ត្រីថៃដែលផ្សាយដោយកាសែតបាងកកប៉ុស្តិ៍។
ជាធម្មតា ការសាកល្បងវ៉ាក់សាំងមានបីដំណាក់កាល។ វ៉ាក់សាំងកូវីដ-១៩ ដែលត្រូវបានអនុញ្ញាតឲ្យប្រើប្រាស់បន្ទាន់ដូចជា Pfizer, Moderna, AstraZeneca និង CoroVac ជាដើម សុទ្ធតែឆ្លងផុតដំណាក់កាលទាំងបី។ រដ្ឋាភិបាលថៃ បានចុះកិច្ចព្រមព្រៀងជាមួយក្រុមហ៊ុន AstraZeneca រួចហើយក្នុងការទិញវ៉ាក់សាំងចំនួន២៦លានដូស ហើយត្រៀមទិញ៣០លានដូសទៀត។ ថៃក៏មានកិច្ចព្រមព្រៀងទិញវ៉ាក់សាំង CoroVac របស់ចិនដែរ។
លោកវេជ្ជបណ្ឌិត Tanarak Plipat នាយករងនាយកដ្ឋានជំងឺឆ្លងរបស់ថៃ និយាយថា វ៉ាក់សាំងទាំងនេះ បានចុះបញ្ជីនៅអាមេរិក និងអង់គ្លេសដែលមាននីតិវិធីចុះបញ្ជីតឹងរ៉ឹង៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com