អន្តរជាតិ
ក្រុមហ៊ុនធំៗរបស់ជប៉ុន ជំរុញរដ្ឋាភិបាលឱ្យបង្កើនការប្រើប្រាស់ថាមពលកើតឡើងវិញ
ផ្ទាំងសូឡាជាច្រើននៅជប៉ុន។ រូបថត AFP
×![]()
ដោយ ឈួន ឈីវអ៊ីង
ក្រុមហ៊ុនធំៗរបស់ជប៉ុនមាន Sony, Panasonic និង Nissan ជាដើម បានស្នើឱ្យរដ្ឋាភិបាលបង្កើនគោលដៅប្រើប្រាស់ថាមពលកកើតឡើងវិញឲ្យបានទ្វេដងនៅឆ្នាំ២០៣០ សំដៅក្លាយជាប្រទេសនាំមុខលើសាកលលោកចំពោះកិច្ចខិតខំប្រឹងប្រែងប្រឆាំងនឹងការប្រែប្រួលអាកាសធាតុ។
កាលពីឆ្នាំមុន នាយករដ្ឋមន្ត្រីជប៉ុន ស៊ូហ្កា យូស៊ីហ៊ីដេ បានប្រកាសគោលដៅរបស់ជប៉ុនដើម្បីក្លាយជាប្រទេសមានកម្រិតបញ្ចេញ និងស្រូបយកកាបូនស្មើគ្នានៅឆ្នាំ២០៥០ ។ ដើម្បីឈានដល់គោលដៅនេះ ជប៉ុនក៏មានផែនការរយៈពេលខ្លីទៀតក្នុងការកាត់បន្ថយការបញ្ចេញកាបូនិកតាមរយៈការបង្កើនការប្រើប្រាស់ថាមពលកកើតឡើងវិញដូចជាថាមពលព្រះអាទិត្យ ខ្យល់ និងថាមពលផ្សេងទៀតឱ្យបានចន្លោះពី២២ភាគរយទៅ២៤ភាគរយនៃប្រភពថាមពលរបស់ខ្លួន។
ការបង្កើនការប្រើប្រាស់ថាមពលនេះ ត្រូវបានកំណត់តាំងពីបីឆ្នាំមក ហើយត្រូវត្រួតពិនិត្យឡើងវិញនៅពេលខាងមុខ។ ចំពេលគ្នានេះ ក្រុមហ៊ុនសាជីវកម្មធំរបស់ជប៉ុន ក៏ស្នើឱ្យរដ្ឋាភិបាលបង្កើនគោលដៅរបស់ខ្លួនឲ្យបានពីរដង។ បើតាមភ្នាក់ងារពត៌មាន AFP សម្ពន្ធបណ្តាក្រុមហ៊ុនចំនួន៩២ ដែលស្គាល់ថា គំនិតផ្តួចផ្តើមគំនិតរក្សាអាកាសធាតុជប៉ុន បានចេញញត្តិជំរុញឲ្យបង្កើនការប្រើប្រាស់ថាមពលកើតឡើងវិញចន្លោះពី៤០ភាគរយទៅ៥០ភាគរយ។
ក្រុមហ៊ុន Sony, Fujifilm Panasonic និង Toshiba ជាដើម សុទ្ធតែមានឈ្មោះក្នុងញត្តិ។ ក្នុងសេចក្ដីថ្លែងការណ៍ថ្ងៃទី១៨ ខែមករា សម្ពន្ធខាងលើអះអាងថា ដើម្បីក្លាយជាអ្នកនាំមុខក្នុងសកលលោកចំពោះការប្រយុទ្ធនឹងការប្រែប្រួលអាកាសធាតុ ជប៉ុនត្រូវតែមានមហិច្ឆិតាដើម្បីសម្រេចគោលដៅ។ ការកំណត់មហិច្ឆតានេះ ក៏ជំរុញឱ្យក្រុមហ៊ុនទាំអស់បានចូលរួមចំណែកក្នុងកិច្ចការពារបរិស្ថានបានកាន់តែប្រសើរឡើងដែរ។
តាំងពីឆ្នាំ២០១៧ ជប៉ុនបានសម្រេចគោលដៅប្រើថាមពល ដែលអាចប្រើឡើងវិញបាន ១៧ភាគរយរួចមកហើយ និងបានចំណាយលុយប្រមាណ ១៦,៥ពាន់លានដុល្លារក្នុងគម្រោងការថាមពលនេះក្នុងឆ្នាំ២០១៩ដែរ។ ជប៉ុនស្ថិតនៅលំដាប់ទី៤ បន្ទាប់ពីចិន អាមេរិក និង អ៉ីរ៉ុបក្នុងនាមជាអ្នកវិនិយោគក្នុងវិស័យថាមពល ដែលអាចប្រើឡើងវិញ។ ប៉ុន្តែ ជប៉ុននៅតែជាប្រទេសពឹងផ្អែកយ៉ាងខ្លាំងលើការប្រើប្រាស់ឥន្ទនៈផូស៊ីល ដែលវាជាកត្តារារាំងក្នុងការកាត់បន្ថយការបំភាយកាបូនរបស់ប្រទេសនេះ៕
Tag:
ជប៉ុន
© រក្សាសិទ្ធិដោយ thmeythmey.com
