នាយករដ្ឋមន្ត្រីថៃ លោក ប្រាយុទ្ធ ចន្ទអូចា នៅថ្ងៃទី១៩ ខែមករា បានអះអាងថា លោកនឹងចាត់វិធានការលើបុគ្គលទាំងឡាយណា ដែលចែកចាយព័ត៌មានមិនពិត ទាក់ទិននឹងគម្រោងចាក់វ៉ាក់សាំងប្រឆាំងកូវីដ-១៩ របស់រដ្ឋាភិបាល។ ការលើកឡើងរបស់ប្រមុខរដ្ឋាភិបាលថៃរូបនេះ ធ្វើឡើងបន្ទាប់ពីការរិះគន់របស់មេដឹកនាំចលនាវឌ្ឍនភាពថៃ លោក Thanathorn Juangroongruangkit។
រដ្ឋាភិបាលថៃ នឹងចាប់ផ្តើមយុទ្ធនាការចាក់វ៉ាក់សាំងប្រឆាំងកូវីដ-១៩ នៅក្នុងខែកុម្ភៈខាងមុខ ដោយក្រុមគ្រូពេទ្យ ត្រូវចាក់មុន។ ទន្ទឹមនេះ រដ្ឋាភិបាល ក៏បានដាក់ចេញយុទ្ធការចំនួន ៣ដំណាក់កាលផងដែរ ដើម្បីចាក់វ៉ាក់សាំងឱ្យប្រជាជននៅទូទាំងប្រទេស។ យ៉ាងណាមិញ យុទ្ធនាការចាក់វ៉ាក់សាំងប្រឆាំងកូវីដ-១៩ និងការទិញវ៉ាក់សាំងប្រឆាំងកូវីដ-១៩ របស់ថៃ ត្រូវលោក Thanathorn Juangroongruangkitមេដឹកនាំចលនាវឌ្ឍនភាពថៃ រិះគន់ពីការយឺតយ៉ាវ។
ជាការឆ្លើយតបនឹងការរិះគន់នេះ លោកប្រាយុទ្ធ ចន្ទអូចា នាយករដ្ឋមន្ត្រីថៃ បានបញ្ជាឱ្យមន្ត្រីរបស់ខ្លួនចាត់វិធានការលើអ្នកនិយាយពីព័ត៌មានមិនពិតជុំវិញយុទ្ធនាការចាក់វ៉ាក់សាំងរបស់រដ្ឋាភិបាល។ «ខ្ញុំនឹងបញ្ជាឱ្យចាត់វិធានការផ្លូវច្បាប់លើព័ត៌មានមិនពិតទាំងឡាយណា ដែលត្រូវបានបោះពុម្ភ នៅលើបណ្តាញសង្គម និងប្រព័ន្ធផ្សព្វផ្សាយ»។ លោក ប្រាយុទ្ធ បានព្រមានបែបនេះ បន្ទាប់ពីកិច្ចប្រជុំគណៈរដ្ឋមន្ត្រីថៃតាមប្រព័ន្ធវីដេអូ។
បន្ទាប់ពីការលើកឡើងរបស់ប្រមុខរដ្ឋាភិបាលថៃបែបនេះ មន្ត្រីការិយាល័យនាយករដ្ឋមន្ត្រី ក៏ត្រៀមបញ្ជាឱ្យក្រុមអ្នកជំនាញសិក្សាលើបញ្ហានេះដែរ។ លោក Suporn Atthawong អនុរដ្ឋមន្ត្រីប្រចាំការិយាល័យនាយករដ្ឋមន្ត្រី និយាយថា លោកនឹងបញ្ជាឱ្យក្រុមអ្នកច្បាប់ ពិនិត្យលើពាក្យសម្តីរបស់លោក Thanathorn ថាតើមេដឹកនាំចលនាវឌ្ឍនភាពថៃរូបនេះ បានផ្សព្វផ្សាយព័ត៌មានខុស ប្រឆាំងនឹងនាយករដ្ឋមន្ត្រី ឬរដ្ឋាភិបាល ឬខុសនឹងក្រមព្រហ្មទណ្ឌមាត្រា ១១២ ដែលចែងពីការការពារព្រះមហាក្សត្រ។ នេះបើតាមការចុះផ្សាយរបស់កាសែតបាងកកប៉ុស្តិ៍។
ថ្លែងនៅក្នុងកម្មវិធីផ្សាយផ្ទាល់ ក្នុងបណ្តាញសង្គម Facebook នៅពេលថ្មីៗនេះ លោក Thanathorn មេដឹកនាំចលនាវឌ្ឍនភាពថៃ និងជាអ្នកប្រឆាំងរដ្ឋាភិបាលថៃមួយរូប បានរិះគន់ថា រដ្ឋាភិបាល បានធ្វើការយឺតណាស់ ក្នុងការទិញ និងទទួលវ៉ាក់សាំងប្រឆាំងកូវីដ-១៩ ឱ្យគ្រប់ចំនួនដូស និងចាក់ឱ្យប្រជាជន។
«ថៃ បានដាក់ក្តីសង្ឃឹមរបស់ខ្លួនតែលើក្រុមហ៊ុន AstraZeneca ដែលអនុញ្ញាតឱ្យក្រុមហ៊ុនឱសថក្នុងស្រុកថៃ Siam Bioscience ផលិតវ៉ាក់សាំងរបស់ខ្លួន»។ មេដឹកនាំចលនាវឌ្ឍនភាពថៃបានលើកឡើងបែបនេះ ដោយបន្ថែមថា រដ្ឋាភិបាលថៃមិនបានចរចាទិញវ៉ាក់សាំងជាមួយប្រទេសផ្សេងទៀតឡើយរហូតដល់ដើមខែមករា ឆ្នាំ២០២១ ទើបចុះកិច្ចព្រមព្រៀងទិញវ៉ាក់សាំងក្នុងបរិមាណដ៏តិចពី Sinovac សម្រាប់ប្រជាជន១,៥ភាគរយនៃប្រជាជនសរុប។
សូមបញ្ជាក់ថា ថៃបានដាក់គោលដៅចាក់វ៉ាក់សាំងឱ្យប្រជាជនខ្លួនចំនួន៥០ភាគរយ នៃចំនួនប្រជាជនសរុប ឱ្យបានត្រឹមដំណាច់ឆ្នាំ២០២១។ មកទល់ពេលនេះ ថៃបានចុះកុងត្រាទិញវ៉ាក់សាំងពីក្រុមហ៊ុន AstraZeneca និងចិន បានជាង៦០លានដូសរួចហើយ និងថែមទាំងចុះកុងត្រាជាមួយក្រុមហ៊ុន AstraZeneca ដើម្បីផលិតវ៉ាក់សាំងនៅក្នុងស្រុកថែមទៀត។ វ៉ាក់សាំងនឹងដឹកមកដល់ថៃ ក្នុងខែកុម្ភៈ និងខែក្រោយៗជាបន្តបន្ទាប់។
គិតមកត្រឹមថ្ងៃទី១៩ ខែមករា ថៃមានករណីឆ្លងសរុបចំនួន ១២៥៩៤ករណី និងអ្នកស្លាប់មានចំនួន ៧០នាក់។ ចំណែកអ្នកជាសះស្បើយមានចំនួន ៩៣៥៦នាក់៕