អាជ្ញាធរជាតិអប្សរា ចាប់ផ្ដើមជួសជុលស្ពានបុរាណអាយុកាលជិត ៩០០ឆ្នាំ ជាលើកដំបូង

ជាតិ

អាជ្ញាធរជាតិអប្សរា ចាប់ផ្ដើមជួសជុលស្ពានបុរាណអាយុកាលជិត ៩០០ឆ្នាំ ជាលើកដំបូង

21, Jan 2021 , 7:59 am

រូបភាព

ភ្នំពេញ៖ អាជ្ញាធរជាតិអប្សរា ចាប់ផ្ដើមគម្រោងជួសជុលស្ពានតាអោង ឬតាអុង អាយុកាលជិត៩០០ឆ្នាំ ស្ថិតក្នុងភូមិចុងស្ពាន ឃុំខ្វាវ ស្រុកជីក្រែង ខេត្តសៀមរាប ។ ការជួសជុលនេះ ដោយសារស្ពានចំណាស់មួយនេះ មានសភាពចាស់ទ្រុឌទ្រោមខ្លាំង ដែលកំពុងប្រឈមនឹងការខូចខាត ដែលបង្កដោយមនុស្ស និងធម្មជាតិ។ នេះបើតាមការចេញផ្សាយរបស់អាជ្ញាធរជាតិអប្សរា នៅថ្ងៃទី២០ មករា។

អ្នកជំនាញនៃអាជ្ញាធរជាតិអប្សរា ចាប់ផ្ដើមគម្រោងជួសជុលប្រាសាទតាអោង ជាលើកដំបូង ដោយសារផ្នែកជាច្រើននៃស្ពានបុរាណនេះ បានរលុះធ្លាក់ បានប្រេះញែកចេញពីគ្នា នៅផ្នែកកណ្ដាលនៃតួស្ពានសងខាង ព្រមទាំងផ្នែកមួយចំនួនកំពុងជួបប្រទះនឹងការរលុះធ្លាក់ផងដែរ។

លោក ពុទ្ធ សុទ្ធ ជាមន្ត្រីនាយកដ្ឋានអភិរក្សប្រាសាទក្រៅឧទ្យានអង្គរ និងជាប្រធានគម្រោងជួសជុលតាអោង បាននិយាយថា គម្រោងជួសជុលដំបូងលើស្ពានបុរាណនេះ ប្រព្រឹត្តទៅលើចំណុចចម្បងពីរគឺ នៅជញ្ជាំងស្ពានផ្នែកខាងជើងដែលបានរលុះធ្លាក់ និងចំណុចដែលមានរហែកធំចេញក្រៅ ប្រឈមការរលុះធ្លាក់។

រូបភាពពី ហ្វេសប៊ុកផេកអាជ្ញាធរជាតិអប្សរា

ដើម្បីជុសជុលស្ពានបុរាណនេះ ក្រុមការងារនឹងធ្វើសម្រង់ប្លង់ ចុះបញ្ជីថ្ម ការជួសជុលថ្ម ការរៀបចំពង្រឹងជើងសសរថ្ម ដែលរលុះធ្លាក់ឡើងវិញ ព្រមទាំងបង្ហាប់ដីកន្លែងច្រោះចំណុចគល់ស្ពានខាងលិច និងការរៀបចំបង្កាន់ដៃនាគដាក់ចូលទីតាំងដើមឡើងវិញ។ នេះបើតាម លោក ពុទ្ធ សុទ្ធ ដដែល។

ចំពោះគម្រោងជួសជុលស្ពានបុរាណនេះ អាជ្ញាធរជាតិអប្សរា ប្រើប្រាស់មូលនិធិថវិកាផ្ទាល់ ក្នុងការជួសជុលស្ពាននេះ ហើយគ្រោងនឹងបញ្ចប់នៅខែមិថុនា ឆ្នាំ២០២១ខាងមុខ។

សូមជម្រាបថា ស្ពានតាអោង ឬតាអុង ជាស្ពានបុរាណវែងជាងគេ ក្នុងចំណោមស្ពានបុរាណចំនួន ២៣ ផ្សេងទៀត លើផ្លូវបុរាណពីអង្គរទៅបាកាន ដែលកសាងឡើងពីថ្មបាយក្រៀម លម្អដោយបង្កាន់ដៃនាគក្បាល៩ និងមានព្រះពុទ្ធសមាធិធ្វើពីថ្មភក់ នៅចំកណ្ដាលក្បាលនាគ។ ស្ពានបុរាណនេះមានបណ្ដោយប្រវែង ៧០ម៉ែត្រ ទទឹងប្រវែង ១៣ម៉ែត្រ និង រន្ធត្រដេវចំនួន ១៤ ដោយរន្ធនីមួយៗមានកម្ពស់ប្រវែង ៦ម៉ែត្រ និងទទឹងប្រវែង ២ម៉ែត្រ។ ចំណែកកាលបរិច្ឆេទនៃស្ពាននេះពុំទាន់ដឹងច្បាស់នៅឡើយទេ ប៉ន្តែចម្លាក់បង្កាន់ដៃនាគ គេអាចដឹងថា ស្ពាននេះស្ថិតក្នុងរចនាបថបាយ័ន្ត ចន្លោះឆ្នាំ១១៨១ ដល់១២២០នៃគ្រិស្តសករាជ៕