ភ្នំពេញ៖ នៅអំឡុងដើមខែធ្នូ ដល់ខែមករា ជារដូវអំណោយផលចំពោះដំណាំស្ពៃក្ដោប ដូច្នេះកសិករភាគច្រើនបានជ្រើសដាំស្ពៃក្ដោប ព្រោះវាងាយថែទាំ និងឆាប់ទទួលផល។ បច្ចុប្បន្នតម្លៃស្ពៃក្ដោបក្នុងមួយគីឡូក្រាមមានតម្លៃត្រឹម ១ ០០០រៀលទៅ ១ ៥០០រៀលប៉ុណ្ណោះនៅតាមតំបន់នីមួយៗ។
បញ្ហាស្ពៃក្ដោបធ្លាក់ថ្លៃ បានធ្វើឲ្យកសិករដែលដាំស្ពៃក្ដោបជួបផលលំបាក និងប្រឈមការខាត ព្រោះតែតម្លៃ ទាប ត្រូវបានឈ្មួញកណ្ដាលទម្លាក់ថ្លៃ។ អ្នកស្រី ពៅ រ៉ាទី ជាកូនកសិករដាំស្ពៃក្ដោបក្នុងខេត្ត កំពង់ចាម បានបញ្ជាក់ថា តម្លៃស្ពៃក្ដោប ធ្លាក់ថ្លៃដល់ ១ ៣០០រៀលទៅ ១ ៥០០រៀលក្នុងមួយគីឡូក្រាម និងមានពេលខ្លះមិនមានអ្នកទិញផង។
«រដូវនេះភាគច្រើនគេដាំស្ពៃក្ដោប ព្រោះវាអំណោយផលទីផ្សារទូលាយ និងងាយថែទាំ តែក្រោយប្រមូលផលឈ្មួញកណ្ដាលបានដើរទម្លាក់ថ្លៃ កន្លែងនេះបន្តិច កន្លែងនោះបន្តិច»។ នេះបើតាមការរៀបរាប់របស់អ្នកស្រី ពៅ រ៉ាទី ប្រាប់សារព័ត៌មានThmeyThmey25 តាមទូរសព្ទ។
ដំណាំស្ពៃក្ដោបក្នុងផ្ទះសំណាញ់របស់កសិករនៅប៉ៃលិន រូបភាពពីលោក វេង សាខុន
អ្នកស្រី រ៉ាទី ប្រាប់ថា ក្នុងភូមិទី១០ ឃុំព្រៃតានង់ ស្រុកកោះសូទិន ខេត្តកំពង់ចាម ទីផ្សារស្ពៃក្ដោបទូលាយបន្តិចមែន តែពេលខ្លះក៏ពិបាកដែរ ព្រោះតម្លៃស្ថិតលើឈ្មួញកណ្ដាល។ អ្នកស្រី បន្តថា កសិករនៅតំបន់នេះភាគច្រើនជាអ្នករកទីផ្សារខ្លួនឯង ដោយមិនបានចូលជាសមាជិកបណ្ដុំកសិករក្នុងគម្រោងណាមួយឡើយ ហើយការមិនចូលជាសមាជិកក្នុងគម្រោងណាមួយ ព្រោះទាមទារលក្ខខណ្ឌ។
រីឯទីផ្សារស្ពៃក្ដោប ក្នុងខេត្តបាត់ដំបងឯណោះវិញ ក៏មិនសូវខុសគ្នាប៉ុន្មានដែរ។ អ្នកស្រី ឡោម សុភារ៉ា ប្រធានសមាគមកសិកម្ម ស្ថិតក្នុងភូមិស្វាយប្រកៀត ឃុំឈើទាល ស្រុកបាណន់ ប្រាប់សារព័ត៌មានThmeyThmey25 ថា ស្ពៃក្ដោបបច្ចុប្បន្នលក់បានតម្លៃ ២ ០០០រៀលក្នុងមួយគីឡូក្រាម ដែលតម្លៃនេះជាតម្លៃខ្ពស់បំផុត។ «កសិករក្នុងតំបន់នេះភាគច្រើនដាំបន្លែដូចគ្នាច្រើន ពិសេសស្ពៃក្ដោប ហើយរដូវនេះ ជារដូវសម្បូរស្ពៃក្ដោប អ៊ីចឹងហើយតម្លៃលក់បានត្រឹម ២ ០០០រៀលក្នុងមួយគីឡូក្រាម»។ នេះជាការបញ្ជាក់របស់អ្នកស្រី ឡោម សុភារ៉ា។
លោក ឈឹម វជិរា ប្រធានមន្ទីរកសិកម្មបាត់ដំបង បានប្រាប់ThmeyThmey25 ថា៖ «សម្រាប់តម្លៃបន្លែស្លឹកអាចលក់បានពី១ ០០០រៀលទៅ ១ ៥០០រៀលក្នុងមួយគីឡូក្រាម តែបើកសិករដែលស្ថិតក្នុងគម្រោងបណ្ដុំអាជីវករអាចលក់បាន ២ ០០០រៀលទៅ ៣ ០០០រៀលក្នុងមួយគីឡូក្រាម។ ដ្បិតតម្លៃនៅមានកម្រិតតែកសិករអាចទទួលយកបាន ព្រោះពួកគាត់យល់ពីស្ថានភាពទីផ្សារបច្ចុប្បន្ន»។
លោកប្រធានមន្ទីររូបនេះ បានបញ្ជាក់ទៀតថា៖ «ចាប់ពីដើមខែធ្នូ ដល់ចុងខែមករា ជារដូវប្រមូលផលស្ពៃក្ដោប ជាហេតុធ្វើឲ្យតម្លៃស្ពៃក្ដោប ក្នុងខេត្តបាត់ដំបង មានតម្លៃត្រឹម ១ ០០០រៀលដល់ ១ ៥០០រៀលក្នុងមួយគីឡូក្រាមប៉ុណ្ណោះ»។
ជុំវិញតម្លៃស្ពៃក្ដោបធ្លាក់ថ្លៃនៅរដូវប្រមូលផលនេះ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ស្រី វុទ្ធី លើកឡើងថា៖ «កាលណាផលច្រើន តម្លៃធ្លាក់ចុះ។ ដើម្បីដោះស្រាយបញ្ហានេះ ត្រូវចងក្រងជាបណ្តុំកសិករ សហគមន៍កសិកម្ម រួចអនុវត្តផលិតកម្មកសិកម្មតាមកិច្ចសន្យា»។
សូមបញ្ជាក់ថា កសិករដែលចូលរួមជាសមាជិកបណ្ដុំអាជីវកម្មជាមួយគម្រោងនានារបស់ក្រសួងកសិកម្ម នឹងទទួលបានឱកាសទីផ្សារ តម្លៃផលិតផលកសិកម្មមានស្ថិរភាព ទទួលបានការបណ្ដុះបណ្ដាលបច្ចេកទេសដាំដុះ ព្រមទាំងទទួលបានព័ត៌មានទាក់ទងកសិកម្មជាច្រើនទៀត៕