កីឡាអន្តរជាតិ
អន្តរជាតិ
Ronaldo ស៊ុតគ្រាប់ទី៧៦០ ដើម្បីជួយ Juventus លើកពាន Super Cup
× Cristiano Ronaldo រកបានគ្រាប់បាល់ទី៧៦០ក្នុងអាជីពដើម្បីជួយ Juventus លើកពានរង្វាន់ Super Cup ជាលើកទី៩ ក្នុងជ័យជម្នះ ២-០ លើក្រុម Napoli ក្នុងការប្រកួតវគ្គផ្តាច់ព្រ័ត្រ។ នេះជាពានដំបូងបំផុតសម្រាប់ Andrea Pirlo ក្នុងនាមជាអ្នកចាត់ការទូទៅ។
ក្នុងជំនួបវគ្គផ្តាច់ព្រ័ត្រ Super Cup នៅរាត្រីថ្ងៃទី២០ ខែមករា ខ្សែប្រយុទ្ធ វ័យ៣៥ឆ្នាំរូបនេះបានរកគ្រាប់បាល់បើកឆាកឲ្យក្រុមសេះបង្កង់នៅនាទី៦៤ ក្រោយបញ្ចប់ការប្រកួតនៅវគ្គទី១ដោយគ្មានគ្រាប់បាល់។ Alvaro Morata ដែលទើបប្តូរចូលជំនួស Dejan Kulusevski ជាអ្នកសម្រេចគ្រាប់ទី២នៅនាទី៩០+៥ ដើម្បីជួយក្រុមលោក Pirlo ទទួលជ័យជម្នះលើក្រុម Napoli ដែលមានលោក Gennaro Gattuso ជាគ្រូបង្វឹក ដោយលទ្ធផល ២-០។
មិនត្រឹមជួយ Juventus លើកពានដំបូងរដូវកាលនេះនោះទេ Ronaldo ថែមទាំងកើនចំនួនគ្រាប់បាល់ជាកំណត់ត្រាពិភពលោករបស់ខ្លួនដល់ ៧៦០គ្រាប់ក្នុងអាជីពទៀតផង។ បើតាមការចាត់ថ្នាក់របស់ FIFA ប្រធានក្រុមជម្រើសជាតិព័រទុយហ្គាល់ស្ថិតក្នុងចំណាត់ថ្នាក់ទី៣ ក្នុងនាមកីឡាកររកគ្រាប់បានច្រើនបំផុត បន្ទាប់ពី Josef Bican ដែលស៊ុតចូលទីច្រើនជាងគេចំនួន៨០៥គ្រាប់ និងលេខ២ Romário ចំនួន៧៧២គ្រាប់។
Pirlo ដែលទើបឡើងដឹកនាំ Juventus រដូវកាលនេះ រីករាយបំផុតតាមរយៈការទទួលបានពានលើកដំបូងក្នុងអាជីពអ្នកចាត់ការរបស់ខ្លួន។ អ្នកចាត់ការសញ្ជាតិអ៊ីតាលីបានប្រាប់ទូរទស្សន៍ Rai Sport ថា៖ «នេះជាពានដ៏អស្ចារ្យសម្រាប់ខ្ញុំ។ វាពិតជាលំបាកណាស់ក្នុងការមើលការប្រកួតផ្តាច់ព្រ័ត្រ។ វាពិតជាសំខាន់ណាស់ក្នុងការទទួលបានជ័យជម្នះនេះ។ យើងត្រូវតែបង្ហាញមោកនភាពរបស់យើង»។
នេះជាពានរង្វាន់ Super Cup ទី៩ហើយ ដែល Juventus ទទួលបាននិងច្រើនជាងគេក្នុងចំណោមក្រុមទាំងអស់នៅអ៊ីតាលី តាមពីក្រោយដោយ AC Milan ឈ្នះ៧លើក Inter Milan ៥លើក Lazio ៥លើក ហើយ Roma និង Napoli ឈ្នះ២លើកដូចគ្នា៕
Tag:
Cristiano Ronaldo
Super Cup
© រក្សាសិទ្ធិដោយ thmeythmey.com