ឥណ្ឌា បានចាប់ផ្តើមនាំចេញវ៉ាក់សាំងទៅប្រទេសជិតខាងពីរមានប៊ូតង់ និងម៉ាល់ឌី នៅថ្ងៃទី២០ ខែមករា។ នេះបើតាមការប្រកាសរបស់ក្រសួងការបរទេសឥណ្ឌា និងម៉ាល់ឌីវ។ ការដឹកជញ្ជូនវ៉ាក់សាំងនេះ គឺជាការទូតវ៉ាក់សាំងរបស់ឥណ្ឌា ដើម្បីពង្រឹងទំនាក់ទំនងជាមួយប្រទេសជិតខាង និងប្រទេសក្នុងតំបន់។
ប្រទេសកំពុងអភិវឌ្ឍមិនតិចទេ ដែលពឹងផ្អែកលើវ៉ាក់សាំងរបស់ឥណ្ឌា ដើម្បីយកទៅចាក់ឱ្យប្រជាជនខ្លួន ក្នុងការការពារការឆ្លងកូវីដ-១៩។ ឥណ្ឌាជាប់ឈ្មោះជាឱសថដ្ឋានពិភពលោក ព្រោះជាតែសមត្ថភាពផលិតវ៉ាក់សាំងដែលមានប្រសិទ្ធភាព និងតម្លៃសមស្របសម្រាប់ដែលដែលមិនសូវមានធនធាន។ ប្រទេសជិតខាងឥណ្ឌាចំនួនពីរមានប៊ូតង់ និងម៉ាល់ឌីវ ទទួលបានវ៉ាក់សាំងពីមហាអំណាចមួយនេះ។
«ការបញ្ជូនទំនិញលើកដំបូង ត្រូវបានដឹកចេញសម្រាប់ប៊ូតង់»។ អ្នកនាំពាក្យក្រសួងការបរទេសឥណ្ឌា លោក Anurag Srivastava សរសេរលើបណ្តាញសង្គម Twitter បែបនេះនៅថ្ងៃទី២០ ខែមករា។ វ៉ាក់សាំង បានដឹកទៅដល់ប៉ូតង់ហើយ។ ចំណែករដ្ឋមន្ត្រីការបរទេសម៉ាល់ឌីវ ក៏បានបង្ហោះរូបភាពទទួលវ៉ាក់សាំងពីឥណ្ឌាលើបណ្តាញសង្គមTwitter របស់ខ្លួននៅក្នុងថ្ងៃទី២០ ខែមករាផងដែរ។
បើតាមការបញ្ជាក់របស់អ្នកនាំពាក្យខាងលើ ឥណ្ឌា ចាប់ផ្តើមផ្គត់ផ្គង់វ៉ាក់សាំង ឱ្យប្រទេសជិតខាង និងប្រទេសដៃគូដ៏សំខាន់របស់ខ្លួនចាប់ពីថ្ងៃទី២០ ខែមករាតទៅ។ ក្រៅពីប៊ូតង់ និងម៉ាល់ឌីវ ការផ្គត់ផ្គង់វ៉ាក់សាំង ក្រោមរូបភាពជាការផ្តល់ជំនួយ ក៏នឹងត្រូវដឹកជញ្ជូនទៅបង់ក្លាដែស នេប៉ាល់ មីយ៉ាន់ម៉ា និងសីស្ហែល។ ចំណែកស្រីលង្កា អាហ្វហ្កានីស្ថាន និងម៉ូរីស ត្រូវរង់ចាំការអនុញ្ញាតនិយ័តករឱសថសិន មុនទទួលបានវ៉ាក់សាំង។
នៅក្នុងខែមករានេះ ឥណ្ឌា បានអនុញ្ញាតឱ្យប្រើប្រាស់វ៉ាក់សាំងចំនួនពីរ គឺវ៉ាក់សាំងក្រុមហ៊ុន AstraZeneca និងវ៉ាក់សាំងក្នុងស្រុករបស់ខ្លួន ដែលអភិវឌ្ឍដោយក្រុមហ៊ុន Bharat Biotech ។ នៅពេលដំបូង ឥណ្ឌា នឹងដឹកជញ្ជូនតែវ៉ាក់សាំងរបស់ក្រុមហ៊ុន AstraZeneca ដែលសហការផលិតជាមួយវិទ្យាស្ថាន Serum នៅក្នុងប្រទេសឥណ្ឌាប៉ុណ្ណោះ។ វ៉ាក់សាំងសហការផលិតនេះ ត្រូវបានដាក់យីហោថា COVISHIELD។ AstraZeneca ចុះកុងត្រាផលិតវ៉ាក់សាំង១ពាន់លានដូសជាមួយវិទ្យាស្ថាន Serum ។
ប្រទេសបង់ក្លាដែស ដែលជាប្រទេសជិតខាង រំពឹងថា ខ្លួនទទួលបាន វ៉ាក់សាំងCOVISHIELD ចំនួនពីរលានដូសពីឥណ្ឌា នៅថ្ងៃទី២១ ខែមករា។
នាពេលកន្លងមក វិទ្យាស្ថាន Serum បានអះអាងថា រដ្ឋាភិបាលឥណ្ឌា បានហាមឃាត់នាំចេញវ៉ាក់សាំងប្រឆាំងកូវីដ-១៩ ដោយសារតែតម្រូវការក្នុងស្រុក។ ប៉ុន្តែការអះអាងនេះ ត្រូវបានក្រសួងសុខាភិបាលឥណ្ឌា ចេញមុខបកស្រាយវិញថា ខ្លួនមិនបានហាមឃាត់ការនាំចេញវ៉ាក់សាំងទៅក្រៅប្រទេសឡើយ។
គិតមកត្រឹមពេលនេះ ឥណ្ឌាជាប្រទេសទីពីរ បន្ទាប់ពីអាមេរិក ដែលមានករណីឆ្លងកូវីដ-១៩ ច្រើនជាងគេ។ ករណីឆ្លងសរុបរបស់ឥណ្ឌា មានចំនួនជាង ១០,៦ លានករណី និងអ្នកស្លាប់មានចំនួនជាង ១៥ម៉ឺននាក់។ ចំណែកអ្នកជាសះស្បើយមានចំនួនជាង ១០,២លាននាក់៕