ជាតិ
(រាប់ពីឆ្វេង) លោក កា ម៉ាធុល អនុប្រធានវិទ្យាស្ថានទំនាក់ទំនងអន្តរជាតិកម្ពុជានៃរាជ្យបណ្ឌិតសភាពកម្ពុជា, លោកស្រី មូ សុខហួរ មន្ត្រីជាន់ខ្ពស់អតីតគណបក្សសង្គ្រោះជាតិ និងលោក ហ៊ុន ម៉ានី តំណាងរាស្ត្រគណបក្សប្រជាជននៃមណ្ឌលកំពង់ស្ពឺ
×![]()
ដោយ: សារព័ត៌មានថ្មីៗ
កាលពីពេលថ្មីៗនេះ លោកស្រី មូ សុខហួរ បានថ្លែងតាមរយៈឃ្លីបវីដេអូពីសហរដ្ឋអាមេរិកមកថាបែបអត្តនោម័តថា សហភាពអឺរ៉ុបនឹងដកប្រព័ន្ធអនុគ្រោះពីកម្ពុជាលើសពី ២០ភាគរយទៀតនៅក្នុងឆ្នាំ២០២១នេះ។ អ្នកវិភាគ និងអ្នកនយោបាយអធិប្បាយតបថា លោកស្រី មូ សុខហួរ គួរតែបានថ្លែងអ្វីដែលផ្តល់ប្រយោជន៍ដល់ជាតិ។
កាលដែលលោកស្រី មូ សុខហួរ និងលោក នុត រំដួល អតីតតំណាងរាស្ត្រគណបក្សសង្គ្រោះជាតិដែលត្រូវបានរំលាយដោយសេចក្តីសម្រេចរបស់តុលាការកម្ពុជា មិនអាចឡើងយន្តហោះមកកម្ពុជា បណ្ដាលឱ្យមានការអធិប្បាយថា នោះគឺគ្រាន់តែជា ការសម្តែង។ លោកស្រី មូ សុខហួរ ក៏បានថតផ្សាយវីដែអូឃ្លីប ដើម្បីច្រានចោលការចំអកទាំងនោះ ហើយបានធ្លោយមាត់ថា៖«បងប្អូនជឿជាក់ទៅ អ៊ីប៊ីអេ (EBA) នឹងមិនមែនប៉ះពាល់តែ ២០ភាគរយទេ។ គេនឹងដក អ៊ីប៊ីអេ លើសពី ២០ភាគរយទៀតក្នុងឆ្នាំនេះ (២០២១)។ ពីព្រោះរឿងនេះ រឿងធំ។ ហេតុអ្វីគេដកទៀត? ពីព្រោះវាទាក់ទងនឹងសិទ្ធិមនុស្ស។»។
នៅក្នុងឃ្លីបវីដេអូនោះ លោកស្រីបានចោទប្រកាន់រដ្ឋាភិបាលកម្ពុជាថា ជាអ្នករារាំង ដើម្បីមិនឱ្យលោកស្រី និងសហការីឡើងយន្តហោះមកប្រទេសកម្ពុជាវិញបាន ហើយថា សម្រាប់លោកស្រី នេះគឺជាការបំពានលើបញ្ហាសិទ្ធិមនុស្ស។
បើតាមការអត្ថាធិប្បាយរបស់លោកស្រីដដែល បើសិនជាលោកស្រី និងសហការីអាចមានវត្តមាននៅក្នុងប្រទេសកម្ពុជាឡើងវិញ នោះវានឹងធ្វើឱ្យស្ថានការណ៍នយោបាយធូរស្រាល ហើយសហភាពអឺរ៉ុបនឹងផ្តល់ប្រព័ន្ធអនុគ្រោះពន្ធ១០០ភាគរយមកវិញ។
សេចក្តីសន្និដ្ឋាននេះរបស់លោកស្រី មូ សុខហួរ មិនអាចធ្វើឱ្យលោក កា ម៉ាធុល ដែលជាអនុប្រធានវិទ្យាស្ថានទំនាក់ទំនងអន្តរជាតិកម្ពុជានៃរាជ្យបណ្ឌិតសភាពកម្ពុជា យល់ស្របឡើយ។ ទីមួយ លោក កា ម៉ាធុល អធិប្បាយថា ការដែលអតីតថ្នាក់ដឹកនាំគណបក្សសង្គ្រោះជាតិព្យាយាមបង្ហាញផែនការមាតុភូមិនិវត្តនោះ គឺគ្រាន់តែជាព្យាយាមបើកសន្លឹកបៀរបស់ខ្លួន ដែលត្រូវបានគេផ្កាប់ចោលនោះប៉ុណ្ណោះ។ ទីពីរ អ្នកជំនាញទំនាក់ទំនងអន្តរជាតិរូបនេះបញ្ជាក់ថា សហភាពអឺរ៉ុបមិនជ្រៀតជ្រែកបញ្ហាផ្ទៃក្នុងរបស់កម្ពុជា ហើយថា បើទាក់ទងនឹងសំណុំរឿងប្រព័ន្ធអនុគ្រោះពន្ធ EBAនោះទៀត អ្វីៗត្រូវបានអនុវត្តតាមនីតិវិធី។
«បើសិនជាពួកគាត់យល់ថា ពួកគាត់មានទឹកមាត់ប្រៃចំពោះបញ្ហា EBA នេះ ដែលអាចធ្វើឱ្យសហភាពអឺរ៉ុបដក EBA បន្ថែមទៀតមែន ដូច្នេះពួកគេគាត់គួរតែសុំ EBA ឱ្យបាន១០០ភាគរយមកវិញ ដើម្បីជួយជាតិ។»។ នេះគឺជាការអះអាងរបស់លោក កា ម៉ាធុល ដែលបញ្ជាក់បន្ថែមថា ថ្នាក់ដឹកនាំនៃអតីតគណបក្សសង្គ្រោះជាតិ មិនគួរប្រើប្រាស់តែបរទេសជាបង្អែកដាក់សម្ពាធមកលើរដ្ឋាភិបាលកម្ពុជាឡើយ។
ដូច្នេះ តើមេដឹកនាំនយោបាយត្រូវសន្ទនាគ្នាឡើងវិញ? លោក កា ម៉ាធុល ឆ្លើយតបថា៖«វប្បធម៌សន្ទនាមិនអាចមានជាលើកទី២ទេ បើសិនជាអតីតគណបក្សសង្គ្រោះជាតិគ្មានអ្វីនៅក្នុងដៃ។ អ្វីនៅក្នុងដៃ ខ្ញុំចង់និយាយថា តើគណបក្សសង្គ្រោះជាតិមានអ្វីសម្រាប់ជាតិខ្មែរ? ឧទាហរណ៍ គាត់ថា គាត់អាចនិយាយជាមួយសហភាពអឺរ៉ុប ដើម្បីសុំ EBA ២០ភាគរយមកវិញ។»។
ទំនងជាចង់ឆ្លើយតបដោយប្រយោលទៅលោកស្រី មូ សុខហួរ ដែរ លោក ហ៊ុន ម៉ានី អ្នកតំណាងរាស្ត្ររបស់គណបក្សកាន់អំណាចក៏បានសរសេរនៅលើគណនីហ្វេសប៊ុករបស់ខ្លួន ដែលគេអាចអានបានយ៉ាងដូច្នេះ៖«ហានិភ័យដ៏ធំមួយសម្រាប់អនាគតកម្ពុជាគឺការធ្វើនយោបាយដោយមិនទទួលខុសត្រូវ មិនខ្លាច ឬបារម្ភពីផលប៉ះពាល់ និងការខាតបង់ផលប្រយោជន៍ប្រទេសជាតិ។ នយោបាយបែបអត្មានិយម និងជាន់ពន្លិច។»៕
© រក្សាសិទ្ធិដោយ thmeythmey.com
