អន្តរជាតិ
ដោយសារកូវីដ-១៩ ការធ្វើអត្តឃាតនៅជប៉ុនកើនឡើងក្រោយថយចុះមួយទសវត្សរ៍ រូបថត Xinhua
×
ដោយ ឈួន ឈីវអ៊ីង
ក្នុងឆ្នាំ ២០២០ ករណីអត្តឃាតរបស់ប្រជាជនជប៉ុន មានការកើនឡើងបន្ទាប់ពីបានថយចុះ១០ឆ្នាំមកហើយ។ ករណីភាគច្រើន កើតឡើងស្ត្រីដែលមានវិបត្តិផ្លូវចិត្ត និងវិបត្តិហិរញ្ញវត្ថុក្នុងអំឡុងពេលការរីករាលដាលជំងឺកូវីដ-១៩។
នៅជប៉ុន ការធ្វើអត្តឃាតមានប្រវត្តិជាយូរណាស់មកហើយ ជាមួយគោលបំណងចៀសពីភាពអាម៉ាស់ ឬអាប់ឱនកិត្តិយសជាដើម។ នៅមួយទសវត្ស៍មុន ជប៉ុនមានអាត្រាអ្នកធ្វើអត្តឃាតយ៉ាងច្រើនប៉ុន្តែដោយមានការយកចិត្តទុកដាក់ខ្ពស់ពីរដ្ឋាភិបាល តួលេខនេះមានការធ្លាក់ចុះគួរឱ្យកត់សម្គាល់ គឺប្រមាណ៤០ភាគរយក្នុងរយៈពេល១៥ឆ្នាំចុក្រោយ។ បើរាប់ពីឆ្នាំ២០០៩ ករណីអត្តឃាតក៏ធ្លាក់ចុះរហូតមកដែរ។
យ៉ាងណាមិញ ករណីធ្វើអត្តឃាត ត្រូវមើលឃើញថា កើនឡើងវិញអំឡុងពេលការរាតត្បាតជំងឺកូវីដ-១៩ ។ បើតាមទីភ្នាក់ងារពត៌មាន Reuters អ្នកធ្វើអត្តឃាតក្នុងឆ្នាំ២០២០ មានសរុប ២០,៩១៩នាក់ ច្រើនជាងឆ្នាំ២០១៩ ចំនួន២៥០នាក់។ ខែតុលានៃឆ្នាំ ២០២០ ជាខែដែលមានករណីសម្លាប់ខ្លួនច្រើនជាងគេ គឺជាង២ពាន់ករណីឯណោះ។
តាមពិតទៅ នៅដើមឆ្នាំ២០២០ អត្រាអ្នកធ្វើអត្តឃាតនៅមានកម្រិតទាបនៅឡើយ ប៉ុន្តែចាប់ពីខែកក្កដាមក ចំនួនចាប់ផ្តើមកើនឡើងជាបន្តបន្ទាប់ដោយសារការរីករាលដាលកូវីដ-១៩ ផ្ទុះឡើងកាន់តែខ្លាំង។ នេះបើតាមសម្តីរបស់អ្នកជំនាញ។ លើសពីនេះ គេឃើញមានចំនួនស្ត្រីធ្វើអត្តឃាតកើនឡើងដែរ ដែលភាគច្រើនជាអ្នកបម្រើការក្នុងហាងលក់ដូរដែលប្រឈមនឹងការបាត់បង់ការងារអំឡុងពេលកូវីដ-១៩ នេះ។
ក្នុងសន្និសីទសារពត៌មានថ្ងៃទី២១ ខែមករា មន្ត្រីសុខាភិបាលជប៉ុនម្នាក់បាននិយាយថា ការធ្វើអត្តឃាតអាចជាលទ្ធផលនៃរឿងហេតុជាច្រើន។ វិបត្តិសេដ្ឋកិច្ច និងការរស់នៅក្នុងបរិបទសង្គមនាសម័យកូវីដ-១៩នេះក៏ជាបញ្ហាមួយក្នុងចំណោមបញ្ហាដទៃទៀតដែលជះឥទ្ធិពលដល់ការសម្រេចចិត្តធ្វើអត្តឃាតផងដែរ។
តាំងពីឆ្នាំ២០០៣ នៅពេលដែលករណីអត្តឃាតនៅក្នុងប្រទេសជប៉ុនបានកើនឡើងខ្លាំង ដល់ជាង ៣ម៉ឺនករណី។ រដ្ឋាភិបាលជប៉ុន ក៏ចាប់ផ្ដើមយកកចិត្តទុកដាក់បង្កើតជាកម្មវិធីអប់រំ និងឱ្យជាដំបូន្មានដល់ប្រជាជន ហើយក្រោយមកក៏មានការថយចុះមកនៅប្រមាណ២ម៉ឺនករណីប៉ុណ្ណោះក្នុងឆ្នាំ ២០១៩ មុនពេលជំងឺកូវីដ-១៩ ផ្ទុះឡើង។
© រក្សាសិទ្ធិដោយ thmeythmey.com