កញ្ញា ង៉ែត ស៊ីណែត ដែលធ្លាប់មានបទពិសោធន៍ឡើងភ្នំទំព័រ និងភ្នំតាក្រហមក បានរៀបរាប់ប្រាប់សារព័ត៌មានThmeyThmey25 ថាកញ្ញាត្រូវចំណាយពេល២ថ្ងៃ ៣យប់ ពេលឡើងភ្នំនីមួយៗ។ សម្រាប់ការឡើងភ្នំនេះ អ្វីដែលលំបាកសម្រាប់កញ្ញាគឺ កន្លែងដំណេក និងការផ្លាស់សម្លៀកបំពាក់។ 

 

កញ្ញា ស៊ីណែត លើកឡើងដូច្នេះថា៖ «ខ្ញុំជាកូនអ្នកស្រែស្រាប់អ៊ីចឹងសត្វទាក ខ្ញុំអត់សូវខ្លាចទេ។ អ្វីដែលលំបាកនោះ យើងជាមនុស្សស្រី ពិបាកក្នុងការផ្លាស់ខោអាវ ហើយយើងទៅសម្រាកក្នុងអង្រឹងផង។ មនុស្សស្រីបើដើរព្រៃ មានតង់សម្រាប់សម្រាកគឺងាយស្រួលជាង»។
 

ទោះជួបលំបាកយ៉ាងនេះក្ដីតែ កញ្ញា ស៊ីណែត យល់ថាកញ្ញាអាចទទួលបានបទពិសោធន៍ថ្មី និងមានអារម្មណ៍ខុសប្លែកពីការដើរកម្សាន្តតាមរមណីយដ្ឋាន។ កញ្ញាបញ្ជាក់ដូច្នេះថា៖ « ពេលដើរឡើងគឺវាហត់ ប៉ុន្តែពេលយើងឡើងទៅដល់កន្លែងដែលមានទេសភាពស្អាត គឺភ្លេចអស់ភាពនឿយហត់។ ពេលយើងឡើងភ្នំទំព័រគឺយើងអាចមើលឃើញទេសភាពស្រុកវាលវែងទាំងមូលតែម្ដង ហើយបើឡើងភ្នំតាក្រហមកយើងអាចមើលឃើញស្រុកក្រគរ និងស្រុកភ្នំក្រវាញ »។ 
 

កញ្ញា ង៉ែត ស៊ីណែត យល់ថាទេសចរដែលធ្លាប់តែទៅកម្សាន្តនៅតាមរមណីយដ្ឋាន គួរសាកល្បងឡើងភ្នំម្ដង ព្រោះទេសចរនឹងអាចមើលឃើញទេសភាពព្រៃភ្នំ ធម្មជាតិ ដែលមានភាពប្លែកភ្នែក និងអាចដកស្រង់បទពិសោធន៍ថ្មីផងដែរ៕