ជាតិ
ក្រសួងព័ត៌មាន បង្កើតគណៈកម្មការវាយតម្លៃ«ពានរង្វាន់ដឹងគុណចំពោះអ្នកសារព័ត៌មាន៥ទសវត្សរ៍»
×![]()
ដោយ: ធឿន បញ្ញាឬទិ្ធ
ភ្នំពេញ៖ ក្រសួងព័ត៌មាន បានសម្រេចបង្កើតគណៈកម្មការវាយតម្លៃ លើការផ្ដល់«ពានរង្វាន់ដឹងគុណចំពោះអ្នកសារព័ត៌មាន៥ទសវត្សរ៍ ចាប់ពីឆ្នាំ១៩៧០ ដល់២០១០»។ សមាសភាពគណៈកម្មការនេះ គឺមកពីស្ថាប័នព័ត៌មានផ្សេងៗគ្នានៅកម្ពុជា។ នេះបើតាមសេចក្តីចសម្រេចរបស់ក្រសួងព័ត៌មាន កាលពីថ្ងៃទី២២ មករា។
ក្រសួងព័ត៌មាន បានបញ្ជាក់ថា គណៈកម្មការវាយតម្លៃនេះ មានភារកិច្ចជ្រើសរើស និងកំណត់បញ្ជីឈ្មោះបេក្ខភាពសម្រាប់វាយតម្លៃ , កំណត់គោលការណ៍ លក្ខខណ្ឌសម្រាប់វាយតម្លៃ និងផ្ដល់ពិន្ទុសម្រាប់ជ្រើសរើសជ័យលាភី ផ្នែកលើគុណវុឌ្ឍិការងារ ប្រវត្តិការងារ ការបណ្ដុះបណ្ដាល និងបំពេញការងារកន្លងមក។
បន្ថែមពីនេះគណៈកម្មការ ត្រូវពិនិត្យ វាយតម្លៃ និងជ្រើសរើសជ័យលាភី៥រូប ក្នុងចំណោមអ្នកសារព័ត៌មានសម្រិតសម្រាំងរួច ចំនួន១២រូប ដោយមានប្រវត្តិសិក្សា និងការងារជាលាយលក្ខណ៍អក្សរជាដើម។ នេះបើតាមក្រសួងព័ត៌មាន។
សមាភាពគណៈកម្មការទាំងនោះរួមមាន លោក អ៊ុក គឹមសេង អនុរដ្ឋលេខាធិការក្រសួងព័ត៌មាន ជាប្រធានគណៈកម្មការ។ លោក គី សុខលីម ចាងហ្វាងការផ្សាយរបស់សារព័ត៌មានថ្មីៗ អនុប្រធាន។ ក្រៅពីនោះ ក៏មានលោក លាង ដឺលុច នាយកប្រតិបត្តិក្លិបអ្នកកាសែតកម្ពុជា លោក ទៀ សូផាត និពន្ធនាយកសារព័ត៌មានត្នោត TNAOT APP និងលោក ងួន ច័ន្ទមុនី ស្ថាបនិកអង្គភាពសារព័ត៌មាន Fresh News ជាសមាជិក។
កន្លងមកក្រសួងព័ត៌មាន បានបញ្ជាក់ថា កម្មវិធីផ្តល់«ពានរង្វាន់ដឹងគុណ»នេះ រៀបចំឡើងដើម្បីរម្លឹកគុណដល់ការលះបង់កម្លាំងកាយចិត្ត ប្រាជ្ញាស្មារតី របស់អ្នកសារព័ត៌មានដែលបានចូលរួមលើកកម្ពស់វិស័យសារព័ត៌មាននៅកម្ពុជា ចាប់ពីទស្សវត្សរ៍ ឆ្នាំ១៩៧០ ដល់បច្ចុប្បន្ន។
បើតាមលោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍ និង ជាអ្នកនាំពាក្យក្រសួងព័ត៌មាន «ពានរង្វាន់ដឹងគុណ» នឹងផ្ដល់ជូនអ្នកសារព័ត៌មាន នៅក្នុងឆ្នាំ១៩៧០ ឆ្នាំ១៩៨០ ឆ្នាំ១៩៩០ ឆ្នាំ២០០០ និងឆ្នាំ២០១០។ លោកបានបញ្ជាក់ថា សម្រាប់ទសវត្សរ៍នីមួយៗ នឹងត្រូវជ្រើសរើសអ្នកសារព័ត៌មានចំនួន២នាក់ ដោយមួយម្នាក់ទទួលពានរង្វាន់ដឹងគុណ និងម្នាក់ទៀតនឹងទទួលរង្វាន់កិត្តិយស។
សម្រាប់កម្មវីធីផ្តល់«ពានរង្វាន់ដឹងគុណ»ដល់អ្នកសារព័ត៌មាននេះ នឹងប្រព្រឹត្តិឡើងនៅចុងខែមីនា ឬដើមខែមេសា ឆ្នាំ២០២១។ នេះគឺជាកម្មវិធីលើកទី១ ដែលក្រសួងព័ត៌មានរៀបចំឡើង ហើយ គ្រោងនឹងរៀបចំកម្មវិធីនេះជារៀងរាល់ឆ្នាំ ផងដែរ។
Tag:
អ្នកសារព័ត៌មាន
ពានរង្វាន់
© រក្សាសិទ្ធិដោយ thmeythmey.com
