.png)
កូរ៉េខាងជើង បាញ់មីស៊ីលលើកទី៥ក្នុងឆ្នាំ២០២២ ទំនងជាមីស៊ីលប្រដេញ
- ថ្ងៃអង្គារ ទី២៥ ខែមករា ឆ្នាំ២០២២ ម៉ោង ៤:៥៩ នាទី រសៀល
រូបភាព៖ KCNA
កូរ៉េខាងជើង ទំនងជាបាញ់សាកល្បងមីស៊ីលប្រដេញចំនួនពីរគ្រាប់ និងបានធ្លាក់នៅក្នុងសមុទ្រខាងកើត។ យោធាកូរ៉េខាងត្បូង បានបញ្ជាក់បែបនេះ នៅថ្ងៃទី២៥ ខែមករា។ នេះជាលើកទី៥ ហើយ ដែលក្រុងព្យុងយ៉ាង បានបាញ់សាកល្បងមីស៊ីល ក្នុងឆ្នាំ២០២២។
Relate
បើទោះស្ថិតក្រោមទណ្ឌកម្មអន្តរជាតិ រួមទាំងក្រុមប្រឹក្សាសន្តិសុខអង្គការសហប្រជាជាតិក៏ដោយ កូរ៉េខាងជើង បានបន្តធ្វើតេស្តមីស៊ីលជាច្រើនលើក ដើម្បីពង្រឹងសមត្ថភាពយោធារបស់ខ្លួន។ កូរ៉េខាងត្បូង នៅថ្ងៃទី២៥ ខែមេសា បានរាយការណ៍កូរ៉េខាងជើង បានបាញ់សាកល្បងមីស៊ីលលើកទី៥ ចំនួនពីរគ្រាប់ ក្នុងឆ្នាំ ២០២២។
«យើង នៅតែស្វែងរកការវិភាគជាលម្អិត»។ មន្រ្តីយោធាកូរ៉េខាងត្បូងម្នាក់ បានប្រាប់អ្នកសារព័ត៌មានបែបនេះ មុនបន្តថា មីស៊ីលពីរគ្រាប់នោះ ទំនងជាបាញ់ចេញពីភាគខាងត្បូង ខណៈប្រព័ន្ធស្ទាក់ និងចាប់សញ្ញា មិនមានបញ្ហាក្នុងប្រឆាំងអាវុធទាំងនោះឡើយ។
យ៉ាងណាមិញ ការសាកល្បងបាញ់មីស៊ីលប្រដេញរបស់ក្រុងព្យុងយ៉ាង គឺមិនស្ថិតក្រោមការហាមឃាត់របស់សេចក្តីសម្រេចក្រុមប្រឹក្សាសន្តិសុខអង្គការសហប្រជាជាតិឡើយ។ តាមការចុះផ្សាយរបស់ទីភ្នាក់ងារព័ត៌មាន Yonhap កូរ៉េខាងជើង បានបាញ់សាកល្បងមីស៊ីលប្រដេញលើកចុងក្រោយ នៅក្នុងខែកញ្ញា ឆ្នាំ ២០២១។ កាលនោះ ក្រុងព្យុងយ៉ាង បានអះអាងថា ខ្លួនបានសាកល្បងមីស៊ីលប្រដេញប្រភេទថ្មីចម្ងាយឆ្ងាយ និងចាត់ទុកជាអាវុធយុទ្ធសាស្រ្ត។
សូមបញ្ជាក់ថា ការសាកល្បងមីស៊ីលើកចុងក្រោយនេះ ធ្វើឡើងបន្ទាប់ពីកូរ៉េខាងជើងរងទណ្ឌកម្មពីអាម៉េរិក ក្រោមហេតុផលបំពានច្បាប់អន្តរជាតិ៕
© រក្សាសិទ្ធិដោយ thmeythmey.com
Tag:
.gif)
