.jpg)
.jpg)
លោកតា Cooper ទទួលបានសញ្ញាបត្រមធ្យមសិក្សាក្នុងអាយុ១០១ឆ្នាំ
- ថ្ងៃអាទិត្យ ទី៣ ខែមេសា ឆ្នាំ២០២២ ម៉ោង ៧:៥៩ នាទី ល្ងាច
កាលពី៨៤ឆ្នាំមុន លោក Merrill Pittman Cooper បានបញ្ឈប់ការសិក្សាត្រឹមកម្រិតវិទ្យាល័យ ដើម្បីជួយរកលុយម្តាយរបស់ខ្លួន។ ទីបំផុតបុរសអាម៉េរិករូបនេះ បានសម្រេចក្តីសុបិនរបស់ខ្លួន ដោយបានទទួលសញ្ញាបត្រកម្រិតមធ្យមសិក្សាក្នុងអាយុ១០១ឆ្នាំ។ នេះបើតាមការផ្សាយរបស់កាសែត The Washington Post។
កើតក្នុងគ្រួសារក្រីក្រ ម្តាយដែលជាស្ត្រីមេម៉ាយ និងជាអ្នកបម្រើតាមផ្ទះ គ្មានលទ្ធភាពបង់ថ្លៃសិក្សានោះឡើយ ដូច្នេះកាលពីឆ្នាំ១៩៣៨ យុវជន Cooper បានសម្រេចបោះបង់ចោលការសិក្សានាឆ្នាំចុងក្រោយនៅវិទ្យាល័យ Storer College ក្រុង Harpers Ferry រដ្ឋ West Virginia។
លោក Cooper បានរំលឹកពីស្ថានភាពដ៏ពិបាករបស់យុវជនស្បែកខ្មៅដូចជារូបលោកនាអំឡុងទសវត្សរ៍ទី៣០ ជាពិសេសក្នុងវិស័យអប់រំ។ ក្រោយបោះបង់ការសិក្សា លោកបានទៅបម្រើការងារជាអ្នកបើកបររថភ្លើង Tramway នៅ Phialdelphia។
លោក Cooper បានអះអាងថា ពេញចិត្តនឹងអាជីពរបស់ខ្លួន ប៉ុន្តែលោកនៅតែមានរឿងដែលមិនសប្បាយ ព្រោះលោកនៅតែចង់រៀនសូត្រឲ្យបានចប់ចុងចប់ដើម ហើយទទួលសញ្ញាបត្រដូចគេឯង។
៨៤ឆ្នាំក្រោយ សុបិនបានក្លាយជាការពិតសម្រាប់លោកតា Cooper ដោយកូនចៅរបស់គាត់ បានសហការជាមួយសាលារៀបចំកម្មវិធីប្រគល់សញ្ញាបត្រដ៏ភ្ញាក់ផ្អើលមួយនៅសណ្ឋាគារក្នុងក្រុង Jersey City កាលពីថ្ងៃទី១៩ ខែមីនា កន្លងទៅ។
«យើងមិនមានលុយច្រើនឡើយ ប៉ុន្តែកាលណោះ សុបិនរបស់ខ្ញុំគឺចង់ក្លាយជាមេធាវី»។ នេះជាការរៀបរាប់របស់លោក Cooper តាមសម្តីដែលដកស្រង់ដោយ The Washington Post ដោយលោកបន្ថែមថា គ្រូមួយចំនួនបាននាំគាត់ទៅផ្សារដើម្បីទិញខោអាវ និងស្បែកជើងថ្មីផងដែរ។
ចាប់ប្រឡូកការងារជាអ្នកបើកបររថភ្លើង ក្រោយមកលោក Cooper បានតួនាទីជាបន្តបន្ទាប់ក្នុងសហជីពផ្នែកសេវាកម្មដឹកជញ្ជូន Southeastern Pennsylvania រហូតដល់ក្លាយជាប្រធានសហជីពថែមទៀតផង។ នៅឆ្នាំ១៩៧៨ គាត់បានរៀបការជាមួយស្ត្រីឈ្មោះ Marion Karpeh ដែលជាស្ត្រីមេម៉ាយកូនបី មោងជាឱសថការីមួយរូប។ ម្តាយរបស់គាត់បានស្លាប់នៅឆ្នាំ២០១៥។
កាលពីថ្ងៃទី១៩ ខែមីនា លោកបានទទួលសញ្ញាបត្រកិត្តិយពីសាលា Jefferson County School ដែលមានប្រវត្តិជាប់ពាក់ព័ន្ធនឹងសាលា Storer College ផងដែរ៕
© រក្សាសិទ្ធិដោយ thmeythmey.com
