.png)
ក្រសួងកសិកម្មឱ្យមន្រ្តីតាមមូលដ្ឋានចុះណែនាំកសិករ ត្រៀមលក្ខណៈថែទាំស្រូវ ក្នុងរដូវវស្សា
- ថ្ងៃសៅរ៍ ទី២៨ ខែឧសភា ឆ្នាំ២០២២ ម៉ោង ៤:០០ នាទី រសៀល
ភ្នំពេញ៖ ឆ្នាំនេះ ភ្លៀងធ្លាក់លឿនជាងបណ្តាឆ្នាំមុនៗ ដែលអំណោយផលដល់ដាំដុះដំណាំស្រូវ នៅតំបន់មួយចំនួន។ ដោយឡែក តំបន់ខ្លះ ក្នុងខេត្តបន្ទាយមានជ័យ និងខេត្តត្បូងឃ្មុំ បែរជាជន់លិច មិនអាចភ្ជួររាស់បាន បណ្តាលឱ្យការដាំដុះដំណាំស្រូវមានភាពយឺតយ៉ាវ។ ដូច្នេះ ដើម្បីបង្ការទុកមុននៅហានិភ័យទឹកជំនន់ និងអាចសម្រេចបានតាមផែនការផលិតកម្មស្រូវ ក្រសួងកសិកម្មបានចេញសេចក្តីណែនាំសម្រាប់កសិករថែទាំស្រូវ។
រដូវវស្សាបានឈានមកដល់ កសិករគ្រប់រូបចាប់ផ្តើមភ្ជួររាស់ដី ធ្វើស្រែចម្ការ និងបង្កបង្កើតផល ជាពិសេសដំណាំស្រូវ។ រដូវវស្សាឆ្នាំនេះ ទឹកភ្លៀងចាប់ផ្តើមធ្លាក់លឿនជាងបណ្តាឆ្នាំផ្សេងៗ និងរាយប៉ាយស្ទើរគ្រប់តំបន់ ដែលអាចឱ្យកសិករមួយចំនួន ដាំដុះដំណាំស្រូវដើមរដូវ។
ទោះការធ្លាក់ភ្លៀងលឿន និងជាសញ្ញាល្អសម្រាប់តំបន់មួយចំនួនក្តី ប៉ុន្តែការដាំដុះដំណាំស្រូវឆ្នាំនេះ មានភាពយឺតជាងឆ្នាំ២០២១។ ការណ៍នេះបណ្តាលមកពី តំបន់មួយចំនួនលិចទឹក និងជោកជាំពេក មិនអាចភ្ជួររាស់បាន។ ជាក់ស្តែង តំបន់មួយចំនួនក្នុងខេត្តបន្ទាយមានជ័យ និងខេត្តត្បូងឃ្មុំ បានជួបប្រទះគ្រោះទឹកជំនន់ ដោយសារទឹកភ្លៀងដើមរដូវ។
គ្រោះទឹកជំនន់នេះ បានប៉ះពាល់ដល់ដំណាំស្រូវប្រមាណ ៦ពាន់ហិកតា និងខូចខាត ជាង៣ពាន់ហិកតា។ ក្នុងនោះខេត្តបន្ទាយមានជ័យមានផ្ទៃប៉ះពាល់ប្រមាណ ៤ ៦៦៤ហិកតា និងខូចខាតចំនួន ២ ៣៨០ហិកតា។ ចំណែកខេត្តត្បូងឃ្មុំ ផ្ទៃដែលរងផលប៉ះពាល់មានចំនួន ១ ៣៣៧ហិកតា និងផ្ទៃដីខូចខាត ១ ១៣៣ហិកតា។
ក្រោយសង្កេតឃើញពីហានិភ័យនេះ ក្រសួងកសិកម្ម រុក្ខាប្រមាញ់ និងនេសាទ បានចេញសាចរណែនាំ ស្តីពី ការថែទាំស្រូវរដូវវស្សាឆ្នាំ២០២២ ដើម្បីធានានូវសន្តិសុខស្បៀង និងអាចសម្រេចតាមគោលនយោបាយជំរុញផលិតកម្មស្រូវ រួមទាំងការនាំចេញអង្កររបស់រដ្ឋាភិបាល។
អាជ្ញាធរ ត្រូវចុះណែនាំកសិករឱ្យយកចិត្តទុកដាក់ពិនិត្យស្រែ និងត្រៀមលក្ខណៈ រៀបចំដីស្រែ ជាពិសេសត្រូវបិទភ្លឺ និងបូមទឹកចេញពីស្រែ ក្នុងករណីមានការលិចលង់ ដោយជំនន់ទឹកភ្លៀងដើមរដូវ។ អាជ្ញាធរ ក៏ត្រូវជំរុញកសិករដាំដុះដំណាំស្រូវពឹងទឹកភ្លៀងនៅតំបន់ខ្ពស់។ ចំពោះ កសិករ ដែលទម្លាប់ដាំដុះក្នុងខែកក្កដា ឬខែសីហា ត្រូវប្រញាប់ប្រញាល់ដាំដុះ ព្រោះឆ្នាំនេះមិនមានកូនរដូវប្រាំងឡើយ។
ក្រៅពីនេះ អាជ្ញាធរមូលដ្ឋាន ត្រូវចុះណែនាំបច្ចេកទេសថែទាំដំណាំស្រូវ ដូចជា ការប្រើប្រាស់ជីបំប៉ន ថ្នាំកសិកម្ម និងការគ្រប់គ្រងសមាភាពចង្រៃ ឱ្យបានទាន់ពេលវេលា និងមានប្រសិទ្ធភាព។ ទន្ទឹមនឹងនេះ អាជ្ញាធរក៏ត្រូវណែនាំកសិករឱ្យត្រៀមឧបករណ៍ និងសម្ភារៈ។ កសិករ គប្បីត្រៀមគ្រាប់ពូជស្រូវ សម្រាប់ដាំដុះស្តារឡើងវិញ ក្នុងករណីដំណាំស្រូវខូចខាត ដោយសារទឹកជំនន់។
បើគិតត្រឹមថ្ងៃទី២៥ ខែឧសភា ឆ្នាំ២០២២នេះ កសិករសម្រេចដាំដុះស្រូវបានចំនួន ៥០២ ៧៩៩ ដែលស្មើនឹង ១៩,១៩ភាគរយ នៃផែនការ ២ ៦១៩ ៥០០ហិកតា។ ក្នុងនោះស្រូវស្រាលចំនួន ៣១៧ ៦៦៣ហិកតា ត្រូវកណ្តាលចំនួន ៩៩ ៣១១ហិកតា និងស្រូវធ្ងន់ចំនួន ៧៩ ០៤៥ហិកតា។ ក្រៅពីនេះមាន ស្រូវចម្ការចំនួន ៦៣៧ហិកតា និងស្រូវឡើងទឹកចំនួន ១៤៣ហិកតា៕
© រក្សាសិទ្ធិដោយ thmeythmey.com
Tag:
