កីឡាអន្តរជាតិ  អន្តរជាតិ 
AFC Futsal៖លោក Carlos Cesar មិនពេញចិត្តការកាត់សេចក្តីរបស់អាជ្ញាកណ្តាល ក្រោយថៃ ស្មើកូវ៉ែត
  • ថ្ងៃសុក្រ ទី៣០ ខែកញ្ញា ឆ្នាំ២០២២ ​​ ម៉ោង ១០:១៣ នាទី ព្រឹក
AFC Futsal៖លោក Carlos Cesar មិនពេញចិត្តការកាត់សេចក្តីរបស់អាជ្ញាកណ្តាល ក្រោយថៃ ស្មើកូវ៉ែត
គ្រូបង្វឹកក្រុមជម្រើសជាតិថៃ លោក Carlos Cesar ប្រតិកម្មចំពោះអាជ្ញាកណ្ដាលក្នុងជំនួបរវាងថៃ និងកូវ៉ែត។ រូបពី Thai Futsal
គ្រូជម្រើសជាតិថៃ មិនពេញចិត្តការកាត់សេចក្តីរបស់អាជ្ញាកណ្តាល ក្នុងជំនួបជាមួយកូវ៉ែត នៃពានរង្វាន់បាល់ទាត់ AFC Futsal Asian Cup2022 នាទីលាន Saad Al Abdullah Hall កាលពីថ្ងៃទី២៩ ខែកញ្ញា ។ ថៃ បានត្រឹមលទ្ធផលស្មើកូវ៉ែត ២-២។
TTN-Free-Banner-In-Article-PC

«វាជាការប្រកួតរបស់ក្រុមមកពីអារ៉ាប់ ប៉ុន្តែខ្ញុំមិនយល់ថាហេតុអ្វីបានជាត្រូវយកអាជ្ញាកណ្តាលអារ៉ាប់ទាំងពីរឱ្យកាត់សេចក្តីនៅទីលាន។ ក្រុមទាំងពីរមានការប្រកួតដ៏ល្អដូចគ្នា កូវ៉ែតក៏ល្អ ដូច្នេះយើងល្អដូចគ្នា តែក្រុមរបស់យើងបែរជាកម្រិតឱ្យលេងបែបតឹងតែង ហើយយើងចាំបាច់ត្រូវលេងយ៉ាងប្រុងប្រយ័ត្នដោយសារតែការសម្រេចរបស់អាជ្ញាកណ្តាល»។ លោក Caslos Cesar លើកឡើងដូច្នេះក្រោយបញ្ចប់ការប្រកួតរវាងក្រុមជម្រើសជាតិថៃ និងម្ចាស់ផ្ទះកូវ៉ែត ។


 ការប្រជែងបាល់រវាងកីឡាករកូវ៉ែត(ស) និងកីឡាករថៃ(ខៀវ)។ រូបពី Thai Futsal
គ្រូបង្វឹកក្រុមបាល់ទាត់ជម្រើសជាតិថៃ លោក Cesar បានប្រតិកម្មចំពោះការកាត់សេចក្តីរបស់លោក Husain Al Bahhar ជនជាតិបារ៉ែន ដែលជាអាជ្ញាកណ្តាលនៅលើទីលាន ក្រោយមើលឃើញថា មានភាពលម្អៀងក្នុងការប្រកួតនេះ។ 
 
សម្រាប់ការប្រកួតនេះ ក្នុងវគ្គទី១ នៅនាទី៧ ថៃនាំមុខមុន១គ្រាប់ដែលបញ្ចប់ទីដោយខ្សែប្រយុទ្ធ Sarawut Phalapruek ហើយនៅនាទី១៩ កូវ៉ែត តាមបានស្មើ ១-១ ដែលរកបានដោយខ្សែប្រយុទ្ធ Saleh Alfadhel។ ចូលដល់វគ្គទី២ នាទី២៨ កូវ៉ែត រកបានគ្រាប់ទី២ ក្រោយការស៊ុតជើងស្តាំរបស់ខ្សែប្រយុទ្ធ Abdulaziz Al Basam នាំមុខថៃ ២-១ បណ្តោះអាសន្ន ។ ថៃព្យាយាមសង្គ្រប់រហូតទម្លាយសំណាញ់ទីម្ចាស់ផ្ទះបានគ្រាប់ស្មើ ២-២ ដែលជាការលេងដ៏ល្អចេញពី Warut បញ្ជូនឱ្យ Samal ហើយ Krit Aransanyalak ជាអ្នកបញ្ចប់ទី នៅនាទី៣៦។
 
បញ្ចប់ការប្រកួតក្រុមទាំងពីរទទួលបានម្នាក់១ពិន្ទុ។ ចំណែកអ៊ីរ៉ាក់ យកបាន៣ពិន្ទុពីអូម៉ង់ បន្ទាប់ពីលត់៥-០ ក្នុងជុំទី២នេះ។ ខ្សែប្រយុទ្ធអ៊ីរ៉ាក់ Salim Faisal រកបាន៣គ្រាប់(៣,៣២,៣៥)ខ្សែការពារ Abdulhadi រកបាននៅនាទី៤ និងខ្សែបម្រើ Ghaith Riyadh ធ្វើបាននៅនាទី១៤។ បញ្ចប់ការប្រកួតពូល A កូវ៉ែត ឈរលេខ១ មាន៤ពិន្ទុស្មើថៃ ឈរលេខ២ ចាញ់ផលសងគ្រាប់បាល់ លេខ៣ អ៊ីរ៉ាក់ មាន៣ពិន្ទុ និងអូម៉ង់ ឈរលេខ៤។
 
ដោយឡែកពូល B តួកម៉េនីស្ថាន ស្មើបារ៉ែន ៤-៤។ តួកម៉េនីស្ថាន សម្រេចទីបានដោយខ្សែប្រយុទ្ធ Sahedow ៤គ្រាប់ម្នាក់ឯង(១៣,១៤,១៩,២៦) ខណៈបារ៉ែន រកបានដោយកីឡាករ Antar(១០), Abdulla(១៣), Yusuf(២៦), Al-Sandi(៤០)។
 
អ៊ូសបេគីស្ថាន ដណ្តើមបាន៣ពិន្ទុពីក្រុមតាហ្ស៊ីគីស្ថាន ដែលបញ្ចប់ក្នុងលទ្ធផល ៣-២។ ៣គ្រាប់របស់ អ៊ូសបេគីស្ថាន រកបានដោយកីឡាករ Tolkinov(៣), Nishonov(៧), A.Rakhmatov (១៩) និងតាហ្ស៊ីគីស្ថាន ធ្វើបានដោយខ្សែប្រយុទ្ធ Sardorov (៤,៣៨)។ បញ្ចប់ការប្រកួតពូល B អ៊ូសបេគីស្ថាន ឈរលេខ១ មាន៦ពិន្ទុ ,លេខ២ តាហ្ស៊ីគីស្ថាន មាន៣ពិន្ទុ តាមពីក្រោយដោយ បារ៉ែន និងតួកម៉េនីស្ថាន មានម្នាក់១ពិន្ទុ៕
 
 
 
 
 
 
 
 
 
អ្នកសរសេរអត្ថបទ
© រក្សាសិទ្ធិដោយ thmeythmey.com
Tag:

ហៀក ឆក