.png)
.png)
.jpg)
.jpg)
ចំណងអាពាហ៍ពិពាហ៍៦០ឆ្នាំ! លោកយាយ តាត់ ឆេន ជាពន្លឺរបស់ព្រឹទ្ធាចារ្យ គង់ ណៃ
- ថ្ងៃព្រហស្បតិ៍ ទី១ ខែធ្នូ ឆ្នាំ២០២២ ម៉ោង ១២:១៩ នាទី រសៀល
អ្នកស្រី តាត់ ឆេន កំពុងអង្គុយសម្តែងជាមួយ សា្វម៉ី លោកព្រឹទ្ធាចារ្យកោសល្យវោហារ គង់ ណៃ លើវេទិកានៃបទចម្រៀង Time To Rise ក្នុងព្រឹត្តិការណ៍បិទកីឡាជាតិលើកទី៣ និងកីឡាជនពិការលើកទី១ នៅពហុកីឡដ្ឋានជាតិមរតកតេជោ នាយប់ថ្ងៃទី៣០វិច្ឆិកា។
«ខ្ញុំគិតពិចារណាក្នុងចិត្តថា ខ្ញុំអើយអីក៏មានសំណាងមាំ [ខ្លាំង] ម្ល៉េះ បានឡើងលើឆាកសម្តែងជាមួយតាក្នុងចំណោមមនុស្សរាប់ម៉ឺននាក់»។ លោកយាយ តាត់ ឆេន បានថ្លែងប្រាប់សារព័ត៌មានថ្មីៗ យ៉ាងដូច្នេះ ពាក់ព័ន្ធនឹងវត្តមានរបស់គាត់ជាមួយព្រឹទ្ធាចារ្យ គង់ ណៃ ដែលជាស្វាមី លើឆាកតន្ត្រីនាពិធីបិទកីឡាជាតិលើកទី៣ នៅពហុកីឡដ្ឋានជាតិមរតកតេជោ កាលពីរាត្រីថ្ងៃទី៣០ ខែវិច្ឆិកា។
ព្រឹទ្ធាចារ្យកោសល្យវោហារ គង់ ណៃ បានចូលរួមជាកិត្តិយសសម្រាប់ការសម្តែងបទ «Time To Rise» ជាមួយតារាចម្រៀងរ៉េបដ៏ល្បីល្បាញ វណ្ណដា នៅមុនពិធីប្រកាសបិទបញ្ចប់កីឡាជាតិ។ ក្រោមក្រសែភ្នែកអ្នកទស្សនាផ្ទាល់រាប់ម៉ឺននាក់ ដែលរួមទាំងសម្តេចនាយករដ្ឋមន្ត្រី ហ៊ុន សែន ផងដែរនោះ ព្រឹទ្ធាចារ្យ ត្រូវបានរៀបចំឲ្យអង្គុយទន្ទឹមគ្នាជាមួយឧត្តមភរិយា គឺលោកយាយ តាត់ ឆេន។
តើលោកយាយបាននិយាយអ្វីខ្លះទៅកាន់លោកតានៅអំឡុងពេលសម្តែង? វ័យ៨០ឆ្នាំ ភរិយាព្រឹទ្ធាចារ្យចាប៉ីដងវែងគង់ ណៃ ស្តាប់សំណួររបស់សារព័ត៌មានថ្មីៗ មិនច្បាស់នោះឡើយ ដោយសារតែលោកយាយរៀងធ្ងន់ត្រចៀកបន្តិច។
ក្រោយការពន្យល់បន្ថែម លោកយាយ តាត់ ឆេន បានរៀបរាប់ប្រាប់ថា៖ «ឯងហ្ហា! ចៅ [វណ្ណដា] ឡើងមកហើយ ស្ទាបដៃ ឯងស្ទាបដៃមើល៍។ ខ្ញុំខ្សឹបប្រាប់អ៊ីចឹង។ ខ្ញុំខ្សឹបប្រាប់តាទៀតថា តាឯងអើយមនុស្សមាំ [ច្រើន] ណាស់ តាឯងមើលមិនឃើញ។ មនុស្សច្រើននាំគ្នាហ៊ោ និងទះដៃ ហើយតានិយាយថា អូ! អញសប្បាយណាស់ ពេលលឺអ៊ីចឹង!។ យើងខ្សឹបគ្នាតែប៉ុណ្ណោះទេចៅ»។
សម្រាប់ការផ្តល់កិត្តិយសឡើងលើឆាកជាមួយស្វាមី លោកយាយ តាត់ ឆេន បង្ហាញពីអារម្មណ៍រំភើបរបស់ខ្លួន។ លោកយាយបញ្ជាក់ថា៖ «ខ្ញុំរំភើបនិយាយមិនចេញទេ ព្រោះគេអ្នកល្បីមានមុខមាត់ តែសម្តីគេមានការគោរពយើង ហើយគេនៅក្មេងក្មាង ដែលគេយកឯងជាមនុស្សចាស់នៅអង្គុយទន្ទឹមគេ។ ខ្ញុំគិតក្នុងចិត្តអ៊ីចឹងណាចៅ»។
រស់នៅស្រុកកំពង់ត្រាច ខេត្តកំពតដូចគ្នា លោកយាយ តាត់ ឆេន និងព្រឹទ្ធាចារ្យចាប៉ីដងវែង គង់ ណៃ បានរៀបអាពាហ៍ពិពាហ៍កាលពីអំឡុងឆ្នាំ១៩៦២ ដែលនៅកាលនោះ កូនកម្លោះ គង់ ណៃ មានអាយុ១៨ឆ្នាំ និងកូនក្រមុំ តាត់ ឆេន មានអាយុ២០ឆ្នាំ។
ពួកគាត់មានកូនបង្កើត១០នាក់ ក្នុងនោះកូនប្រុស៦នាក់ និងកូនស្រី៤នាក់។ ទោះបីជាភ្នែកមើលមិនឃើញ ប៉ុន្តែព្រឹទ្ធាចារ្យ គង់ ណៃ ដែលបានគោរមងារថ្នាក់ជាតិជាមត៌កមនុស្សរស់ តែងតែទទួលបានពន្លឺជានិច្ចពីលោកយាយតាត់ ឆេន ដែលជាឧត្តមភរិយា។ នាពិធីបិទកីឡាជាតិលើកទី៣ និងកីឡាជនពិការលើកទី១ គេក៏អាចឃើញទឹកមុខញញឹមរីករាយផងដែររបស់ព្រឹទ្ធាចារ្យ ក្រោយស្តាប់ការរៀបរាប់របស់ភរិយា។
«ខ្ញុំពិតជារំភើប និងមានមោទកភាពខ្លាំងណាស់ ដែលឪម៉ែខ្ញុំ បានចូលរួមព្រឹត្តិការណ៍ដ៏អស្ទារ្យ និងមានមនុស្សរាប់ម៉ឺននាក់ទះដៃគាំទ្រ និងលើកទឹកចិត្តដល់គាត់។ ខ្ញុំសប្បាយ និងរំភើបក្នុងចិត្តមែនទែន»។ លោក គង់ សម័យ ដែលជាកូនពៅបានរៀបរាប់ប្រាប់មកសារព័ត៌មានថ្មីៗយ៉ាងដូច្នេះ៕
© រក្សាសិទ្ធិដោយ thmeythmey.com
Tag:
