.png)
.jpg)
.jpg)
«ការពារអនាគត!» ជាពាក្យបំផុសគំនិតថ្មីចុងក្រោយមួយទៀតរបស់លោក ហ៊ុន ម៉ានី។ ក្នុងសេចក្តីថ្លែងការណ៍រយៈពេល៣០នាទី កាលពីយប់ថ្ងៃទី៣ខែធ្នូទៅកាន់សមាជិកសមាជិកា សហភាពសហព័ន្ធយុវជនកម្ពុជា គឺនៅផ្នែកចុងក្រោយឯណោះ ដែលទាញយកការពិចារណារបស់ខ្ញុំភា្លម ក្នុងនាមខ្ញុំជាអ្នកធ្លាប់តាមដានអ្នកនយោបាយបន្តវេនរូបនេះ។
លោក ហ៊ុន ម៉ានី ថ្លែងយ៉ាងដូច្នេះ ៖«ការពារអនាគតព្រះរាជាណាចក្រកម្ពុជា ដើម្បីធានាថា កម្ពុជាជាប្រជាជាតិដែលមានភាពសម្បូរសប្បាយ កម្ពុជាមានភាពរឹងមាំនៃខឿនការពារជាតិ និងសន្តិសុខជាតិ និងកម្ពុជាមានភាពធន់នៃខឿនសេដ្ឋកិច្ច និងពោរពេញដោយឱកាស។»។
ខ្ញុំមិនទាន់មានឱកាសសម្ភាសសួរអំពីជម្រៅនៃពាក្យចុងក្រោយមួយនេះទៅលោក ម៉ានី ដូចបណ្ដាពាក្យបំផុសគំនិតមុនៗឡើយ។ តែដោយសារតែខ្ញុំចាប់អារម្មណ៍នឹងពាក្យ «ការពារអនាគត» នេះ ខ្ញុំសាកល្បងបង្ហាញការយល់ឃើញរបស់ខ្ញុំជាមួយអ្នកទាំងអស់គ្នាចំពោះពាក្យនេះ។
អ្វីជាអនាគតកម្ពុជា?
ខ្ញុំពុំបានទៅចូលរួមស្ដាប់សេចក្តីថ្លែងការណ៍នេះ ដោយផ្ទាល់នៅទីតាំងរៀបចំកម្មវិធីរម្លឹកខួប៤៤ឆ្នាំ នៃការបង្កើតចលនាយុវជនសាមគ្គីសង្គ្រោះជាតិកម្ពុជា ដែលប្រព្រឹត្តទៅនៅវិមានឈ្នះឈ្នះនោះឡើយ។ ខ្ញុំបានតាមដានសេចក្តីថ្លែងការណ៍របស់លោក ម៉ានី តាមរយៈការផ្សាយផ្ទាល់នៅលើទំព័រហ្វេសប៊ុករបស់លោក។ លោក ម៉ានី ជាអ្នកនយោបាយដែលផ្តោតលើខ្លឹមសារ។ នៅផ្នែកបញ្ចប់នៃសេចក្តីថ្លែងការណ៍ដែលលោក ម៉ានី ចាប់ផ្តើមនិយាយអំពីអនាគតរបស់កម្ពុជានោះ កុមារា កុមារី មួយក្រុមបានឡើងលើវេទិកា ឈរជាជួរត្រង់ភ្លឹង នៅពីខាងក្រោយលោក ម៉ានី និងអនុប្រធានសហភាពសហព័ន្ធ៥រូបទៀត។ ទិដ្ឋភាពនេះ ត្រូវបានរៀបចំក៏ពិតមែន តែវាឆ្លុះបញ្ចាំងពីអ្វីដែលលោក ម៉ានី ចង់ប្រាប់ទៅប្រជាជាតិ ដែលធំជាងសហភាពសហព័ន្ធយុវជនកម្ពុជាទៅទៀត។ អនាគតកម្ពុជា គឺកុមារកម្ពុជាគ្រប់ជំនាន់។
ខ្ញុំយល់ថា ការថែរក្សាបាននូវភាពសម្បូរសប្បាយ រក្សារបាននូវខឿនការពារជាតិ និងខឿនសេដ្ឋកិច្ចរឹងមាំ នោះ គឺដើម្បីធានានិរន្តរភាព ឬអតិ្ថភាពនៃការបន្តជំនាន់នៃមនុស្សខ្មែរដែលកាន់តែខ្លាំង កាន់តែពូកែនោះឯង។
ហេតុអ្វីលោក ហ៊ុន ម៉ានី អំពាវនាវឱ្យមានការថែរក្សាការពារអនាគតនោះ?
«ការពារអនាគត» ហាក់ជាមធ្យោបាយ ឬជាវិធានដែលត្រូវបង្កើតឡើងជាចាំបាច់ដើម្បីឆ្លើយតបទៅនឹង «ក្ដីសង្ឃឹម ហ៊ុន ម៉ានី» ដែលខ្ញុំបានជ្រើសរើសធ្វើជាចំណងជើងនៃស្នាដៃសៀវភៅរបស់ខ្ញុំ។ «ក្ដីសង្ឃឹម ហ៊ុន ម៉ានី» គឺភាពសម្បូរសប្បាយរបស់ប្រជាជន និងការអភិវឌ្ឍទៅមុខជានិច្ចរបស់ប្រទេសជាតិ។ លោក ហ៊ុន ម៉ានី បង្កើត និងបំផុសបានហើយនូវក្តីសង្ឃឹមមួយដែលអាចក្លាយជាការពិតបាននៅថ្ងៃអនាគត។ តែលោក ម៉ានី ភ្លេចគិតថា គេត្រូវការពារក្ដីសង្ឃឹមក្នុងថ្ងៃអនាគតនោះ។ ប្រហែលជាយ៉ាងដូច្នេះហើយ បានជាលោកបញ្ចេញពាក្យនេះ នៅថ្ងៃរម្លឹកខួបប្រវត្តិសាស្ត្រលើកទី៤៤ នៃការបង្កើតចលនាយុវជនសាមគ្គីសង្គ្រោះជាតិកម្ពុជា និងលើកទី១០ នៃការប្ដូរឈ្មោះពីសមាគមយុវជនកម្ពុជា មកជាសហភាពសហព័ន្ធយុវជនកម្ពុជា។
បើគេស្ដាប់សេចក្តីថ្លែងការណ៍ទាំងមូល លោក ហ៊ុន ម៉ានី បាននាំអារម្មណ៍អ្នកស្ដាប់ ឱ្យទៅមើលអតីតកាលរបស់កម្ពុជា។ សង្គ្រាមស៊ីវិល របបប្រល័យពូជសាសន៍ ការជ្រៀតជ្រែករបស់បរទេសក្នុងកិច្ចការនយោបាយផ្ទៃក្នុងរបស់កម្ពុជា បានបំផ្លាញកម្ពុជា និងបន្ទុចបង្អាក់ការអភិវឌ្ឍរបស់កម្ពុជាយ៉ាងខ្លាំង។ អ្នកនយោបាយបន្តវេន ហាក់នៅបារម្ភនៅឡើយអំពីអនាគតរបស់កម្ពុជា។
បើគេស្ដាប់សេចក្តីថ្លែងការណ៍ទាំងមូល លោក ហ៊ុន ម៉ានី បាននាំអារម្មណ៍អ្នកស្ដាប់ ឱ្យទៅមើលអតីតកាលរបស់កម្ពុជា។ សង្គ្រាមស៊ីវិល របបប្រល័យពូជសាសន៍ ការជ្រៀតជ្រែករបស់បរទេសក្នុងកិច្ចការនយោបាយផ្ទៃក្នុងរបស់កម្ពុជា បានបំផ្លាញកម្ពុជា និងបន្ទុចបង្អាក់ការអភិវឌ្ឍរបស់កម្ពុជាយ៉ាងខ្លាំង។ អ្នកនយោបាយបន្តវេន ហាក់នៅបារម្ភនៅឡើយអំពីអនាគតរបស់កម្ពុជា។
អ្នកណាត្រូវការពារអនាគតនោះ?
ការអំពាវនាវឱ្យចូលរួម«ការពារអនាគត» ត្រូវបានធ្វើឡើងទៅកាន់សមាជិកសមាជិកា សហភាពសហព័ន្ធយុវជនកម្ពុជា ដែលត្រូវបានពង្រីកទៅដល់គ្រប់មជ្ឈដ្ឋានហើយ។ សម្រាប់ខ្ញុំ លោក ហ៊ុន ម៉ានី ទំនងជាយល់ឃើញថា អ្នកដែលអនុវត្តស្មារតី «ការពារអនាគត» នេះមុនគេ គួរតែជាសមាជិកសមាជិកាសហភាពសហព័ន្ធយុវជនកម្ពុជា។ បន្ទាប់មក គឺយុវជនដទៃទៀត និងមនុស្សគ្រប់ស្រទាប់វណ្ណៈផ្សេងទៀតដែលយល់ស្របគំនិតនេះដែរ។
ពិធីរម្លឹកខួបកំណើតចលនាយុវជនសាមគ្គីសង្គ្រោះជាតិកម្ពុជា ត្រូវបានរៀបចំធ្វើនៅលើទីធ្លានៃវិមានឈ្នះឈ្នះ ដែលជាទីតាំងនិមិត្តរូបដ៏មានអត្ថន័យ។ ទីនេះ ជាព្រំដែននៃសង្គ្រាម និងសន្តិភាព ដែលយុវជនបច្ចុប្បន្នត្រូវស្វែងយល់ដើម្បីធ្វើសេចក្តីសម្រេចចិត្តឱ្យបានត្រឹមត្រូវ។ ទីនេះ បង្ហាញពីការចាប់ផ្តើមនៃសន្តិភាពរបស់កម្ពុជា និងបង្ហាញថា យុវជនជំនាន់មុនបានកសាងកម្ពុជា បច្ចុប្បន្នសម្រាប់យុវជនបច្ចុប្បន្ន។
ចំពោះលោក ម៉ានី ការ «ការពារអនាគត» គឺជាកាតព្វកិច្ចរបស់យុវជនបច្ចុប្បន្ន ដែលត្រូវរួមចំណែកទទួលខុសត្រូវទាំងអស់គ្នា៕
© រក្សាសិទ្ធិដោយ thmeythmey.com
Tag:
