.png)
និស្សិតសាកលវិទ្យាល័យចំនួនពីរ ទទួលការបណ្ដុះបណ្ដាលអភិរក្សប្រាសាទពីអ្នកជំនាញអាជ្ញាធរអប្សរា
- ថ្ងៃសៅរ៍ ទី៤ ខែកុម្ភៈ ឆ្នាំ២០២៣ ម៉ោង ៨:៥៩ នាទី ព្រឹក
ក្រុមនិស្សិតសាលាបៀលប្រាយ កំឡុងពេលចុះការដ្ឋាននៅប្រាសាទបន្ទាយសំរែ។ រូបភាព៖ លោក ព្រំ សុភាណុច
សៀមរាប៖ ក្រុមនិស្សិតពីសាកលវិទ្យាល័យឯកជនចំនួនពីរក្នុងក្រុងសៀមរាប បានចាប់ផ្តើមទទួលការ បណ្ដុះបណ្ដាលផ្នែកអភិរក្សប្រាសាទពីអ្នកជំនាញអាជ្ញាធរជាតិអប្សរា។
មន្រ្តីដឹកនាំការបណ្ដុះបណ្ដាល លោក ឡុង ណារី ប្រាប់ថា ការបណ្ដុះបណ្ដាលនេះ ជាផ្នែកមួយបង្កើនធនធានយុវជនខ្មែរ ក្នុងការចូលរួមអភិរក្សសំណង់ប្រាសាទបុរាណ។ លោកបន្តថា ក្រុមនិស្សិតទាំងនោះ នឹងផ្តោតការសិក្សាលើការគូសប្លង់ និងសិក្សាប្លង់ប្រាសាទ។
លោក ឡុង ណារី (ពាក់មួកពណ៌ខៀវ) កំពុងពន្យល់ក្រុមនិស្សិតនៅការដ្ឋានប្រាសាទបន្ទាយសំរែ។ រូបភាព៖ លោក ព្រំ សុភាណុច
ពិធីសែនព្រេនតាមប្រពៃណីមួយត្រូវបានរៀបចំឡើងនៅចុងខែ មករា នៅការដ្ឋាននៃរាលហាល ប្រាសាទបន្ទាយសំរែ ដើម្បីសុំទឹកសុំទឹក ចាប់ផ្តើមគម្រោងអភិរក្ស និងជួសជុលប្រាសាទ តាមទំនៀម។ លោក ណារី ពន្យល់ថា ការសែនព្រេននេះដើម្បីបញ្ជៀសឧបសគ្គមួយចំនួនដែលអាចកើតឡើង ដូចជាគ្រោះថ្នាក់កម្មករ ឬជ្រុះធ្លាក់ថ្មជាដើម។ល។
នេះជាលើកទី១ហើយ ដែលអាជ្ញាធរជាតិអប្សរាបើកឱ្យមាននិស្សិតពីសាលាឯកជនក្នុងក្រុងសៀមរាប ទទួលការបណ្ដុះបណ្ដាលផ្នែកអភិរក្សប្រាសាទបុរាណ។ លោក ឡុង ណារី ពន្យល់ថា ក្រៅពីចង់បង្កើនអ្នកជំនាន់ក្រោយ ក្នុងនោះក៏ចង់ពង្រីកវិស័យនេះឱ្យបានទូលំទូលាយផងដែរ ព្រោះបច្ចុប្បន្នផ្នែកនេះ កំពុងខ្វះខាតអ្នកជំនាញ។
ក្រុមនិស្សិតសាលាបៀលប្រាយ កំឡុងពេលចុះការដ្ឋាននៅប្រាសាទបន្ទាយសំរែ។ រូបភាព៖ លោក ព្រំ សុភាណុច
លោក ណារី លើកឡើងយ៉ាងដូច្នេះថា៖« អនាគតទៅប្រសិនបើគាត់រៀនចប់ ប្រសិនបើអប្សរាត្រូវការ អាចរើសពួកគាត់ចូលធ្វើការនៅអប្សរាបានខាងផ្នែកគូសប្លង់ ព្រោះពេលខាងមុខយើងអាចខ្វះខាតអ្នកជំនាញទាំងនេះ ព្រោះយើងធ្វើការច្រើន»។
ក្រុមអ្នកជំនាញអាជ្ញាធរជាតិអប្សរា បានសម្រេចយកការដ្ឋានជួសជុលរាលហាលខាងលិចឈៀងខាងជើង នៃប្រាសាទបន្ទាយសំរែ ប្រវែង២០ម៉ែត្រ សម្រាប់ការបណ្ដុះបណ្ដាលក្រុមនិស្សិតចំនួន២០នាក់ នៃសាកលវិទ្យាល័យបៀលប្រាយ និងសាកលវិទ្យាល័យអង្គរ។ ការយកទីតាំងនេះ ត្រូវបានលោក ណារី បកស្រាយថា ព្រោះវាមានទីតាំងទាប មិនត្រូវការប្រើរន្ទាខ្ពស់ និងមិនត្រូវការប្រើសម្ភារច្រើន។ល។
ទោះបីធ្លាប់ជួសជុលនៅសម័យបារាំងក៏ពិតមែន តែរាលហាលនេះរងការខូចខាតច្រើន ពិសេសបញ្ហាថ្ម ដែលមានប្រហោង។ល។
ក្រុមនិស្សិតសាលាបៀលប្រាយ កំឡុងពេលចុះការដ្ឋាននៅប្រាសាទបន្ទាយសំរែ។ រូបភាព៖ លោក ព្រំ សុភាណុច
និស្សិត ចាន់ត្រា កែវមុន្នី សិក្សាឆ្នាំទី៣ ផ្នែកស្ថាបត្យកម្ម និងនគរូបនីយកម្ម នៃសាកលវិទ្យាល័យ បៀលប្រាយ បានហៅការចូលរួមរបស់ខ្លួនថាជាផ្នែកមួយជួយអភិរក្ស និងជួសជុលប្រាសាទខ្មែរ។ កញ្ញា កែវមុន្នី បន្តថា វគ្គបណ្ដុះបណ្ដាលនេះរៀងថ្មីសម្រាប់ខ្លួន ព្រោះបានទៅសិក្សា និងអនុវត្តន៍ដោយផ្ទាល់នៅការដ្ឋានជួសជុល ដែលជាឱកាសល្អសម្រាប់ខ្លួន ក៏ដូចជាក្រុមនិស្សិតឯទៀត ឱ្យស៊ីជម្រៅលើសពីអ្វីដែលបានរៀននៅសាលា។
ទៅថ្ងៃខាងមុន និស្សិត កែវមុន្នី មានក្ដីប្រាថ្នាថា នឹងមានឱកាសរួមការងារជួយអភិរក្សសំណង់ប្រាសាទបុរាណក្នុងតំបន់អង្គរ និងរៀនសូត្រពីអ្នកជំនាញនៃអាជ្ញាធរជាតិអប្សរា។
លោក ឡុង ណារី បានលើកឡើងថា ការបង្រៀនក្រុមនិស្សិតពីសាកលវិទ្យាល័យឯកជននេះ ពុំមានអ្វីលំបាកទេ តែពួកគេត្រូវយល់ពីការងារជាមួយសំណង់បុរាណ ខុសពីសំណង់ថ្មី។ លោក ណារី៖« យើងគ្រាន់តែប្រាប់គាត់ឱ្យធ្វើការថ្នម មិនដូចធ្វើការសំណង់សម័យទេ ឱ្យប៉ះពាល់ថ្មតិចតួច ប្រុងប្រយ័ត្ន ព្រោះថ្មខ្លះពុកផុយ និងត្រូវការថែទាំដូចមនុស្សចាស់ដូច្នោះដែរ»៕
© រក្សាសិទ្ធិដោយ thmeythmey.com
Tag:
