.png)
រុស្ស៊ី និងកូរ៉េខាងជើងរិះគន់ផែនការនុយក្លេអ៊ែររបស់អាម៉េរិកនិងកូរ៉េខាងត្បូង
- ថ្ងៃសៅរ៍ ទី២៩ ខែមេសា ឆ្នាំ២០២៣ ម៉ោង ៤:២៩ នាទី រសៀល
ក្រសួងការបរទេសរុស្ស៊ី នៅពីថ្ងៃទី២៨ ខែមេសា បានរិះគន់កិច្ចព្រមព្រៀងនុយក្លេអ៊ែររវាងអាម៉េរិក និងកូរ៉េខាងត្បូងថា នឹងធ្វើឱ្យមានអស្ថិរភាពក្នុងតំបន់ និងពិភពលោក។ ឯកូរ៉េខាងជើងបានព្រមានដែរថា ផែនការនេះ នឹងរឹតតែឱ្យប្រទេសទាំងពីរប្រឈមនឹងគ្រោះថ្នាក់ធ្ងន់ធ្ងរបន្ថែមទៀត។
អាម៉េរិក នៅពីថ្ងៃទី២៦ ខែមេសា បានសន្យាផ្តល់ឱ្យកូរ៉េខាងត្បូងនូវការយល់ដឹងបន្ថែមទៀតអំពីផែនការនុយក្លេអ៊ែររបស់ខ្លួនក្នុងកិច្ចសហប្រតិបត្តិការទប់ទល់ការគំរាមរបស់កូរ៉េខាងជើង។ យ៉ាងណាមិញ រុស្ស៊ី និងកូរ៉េខាងជើង បានប្រតិកម្មនឹងផែនការនេះយ៉ាងខ្លាំង។
«ការវិវត្តនេះពិតជាធ្វើឱ្យមានអស្ថិរភាព ហើយនឹងមានផលវិបាកអវិជ្ជមានយ៉ាងធ្ងន់ធ្ងរដល់សន្តិសុខតំបន់ដែលនឹងប៉ះពាល់ដល់ស្ថិរភាពពិភពលោក» ។ ក្រសួងការបរទេសរុស្ស៊ីបានលើកឡើងក្នុងសេចក្តីថ្លែងការណ៍មួយបែបនេះ រួចបន្តថា ការជំរុញរបស់អាម៉េរិក និងសម្ព័ន្ធយោធាណាតូនឹងនាំឱ្យមានភាពតានតឹងកើនឡើង និងអាចបង្កឱ្យមានការប្រណាំងសព្វាអាវុធផងដែរ។
ចំណែកឯកូរ៉េខាងជើងវិញ ប្អូនស្រីមេដឹកនាំរបបក្រុងព្យុងយ៉ាង លោកស្រី គីម យ៉ូចុង បាននិយាយថា កាលណាអាម៉េរិក និងកូរ៉េខាងត្បូងកាន់តែរៀបចំសមយុទ្ធនុយក្លេអ៊ែរ និងដាក់ពង្រាយសព្វាវុធនុយក្លេអ៊ែរនៅឧបទ្វីបកូរ៉េកាន់តែខ្លាំងឡើង វានឹងបង្កឱ្យមានគ្រោះថ្នាក់យ៉ាងធ្ងន់ធ្ងរមិនខាន។ នេះបើតាមទីភ្នាក់ងារព័ត៌មានរដ្ឋ KCNA ដែលចេញផ្សាយនៅថ្ងៃទី២៩ ខែមេសា។
បើតាមលោកស្រី គីម កូរ៉េខាងជើងនៅតែជឿជាក់ថា ការពង្រឹងនុយក្លេអ៊ែររបស់ខ្លួនគួរតែត្រូវបន្តទៅមុខបន្ថែមទៀត៕
© រក្សាសិទ្ធិដោយ thmeythmey.com
Tag:
.gif)
