អន្តរជាតិ 
UN មិនអញ្ជើញក្រុមតាលីបង់ចូលរួមកិច្ចប្រជុំស្ដីពីអាហ្វហ្កានីស្ថាននៅទីក្រុងដូហាឡើយ
  • ថ្ងៃសៅរ៍ ទី២៩ ខែមេសា ឆ្នាំ២០២៣ ​​ ម៉ោង ៨:២៩ នាទី យប់
UN មិនអញ្ជើញក្រុមតាលីបង់ចូលរួមកិច្ចប្រជុំស្ដីពីអាហ្វហ្កានីស្ថាននៅទីក្រុងដូហាឡើយ
អគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គូតេរ៉េស។ រូបភាព AFP
អ្នកនាំពាក្យអង្គការសហប្រជាជាតិ (UN) បានថ្លែងនៅថ្ងៃទី២៨ ខែមេសាថា អគ្គលេខាធិការ​ UN លោក អាន់តូនីញ៉ូ ហ្គូតេរ៉េសមិនបានអញ្ជើញរដ្ឋបាលតាលីបង់ឱ្យចូលរួមក្នុងកិច្ចប្រជុំជាមួយ បេសកជនពិសេសស្តីពីអាហ្វហ្កានីស្ថាក្នុងទីក្រុងដូហានៅសប្តាហ៍ក្រោយនេះទេ។
TTN-Free-Banner-In-Article-PC
 
ក្រោយអ្នកនាំពាក្យរង UN លោក Farhan Haq បញ្ជាក់ថា សន្និសីទទីក្រុងដូហានៅថ្ងៃទី១ និងទី២ខែឧសភា នឹងមិនផ្តោតលើការទទួលស្គាល់តាលីបង់ជារដ្ឋាភិបាលទេ។ អ្នកនាំពាក្យ UN ក៏បញ្ជាក់បន្ថែមពីលើទៀតថា ក្នុងកិច្ចប្រជុំនោះនឹងមិនមានវត្តមានរបស់ក្រុមតាលីបង់ឡើយ។
 
«អគ្គលេខាធិការ​មិន​បាន​បន្ត​ការ​អញ្ជើញ​ទៅ​អាជ្ញាធរក្រៅច្បាប់​ (អាជ្ញាធរតាលីបង់) នោះទេ​»។ អ្នកនាំពាក្យ UN លោក Stephane Dujarric​ បានថ្លែងបែបនេះអំឡុងពេលសន្និសីទកាសែតប្រ ចាំថ្ងៃនាថ្ងៃទី២៨ ខែមេសា។ 
 
លោក Dujarric​ ក៏បានសង្កត់ធ្ងន់ផងដែរថា ដូចបានបញ្ជាក់ គោលបំណងនៃកិច្ចប្រជុំគឺ ដើម្បីពង្រឹងការចូលរួមជាអន្តរជាតិឡើងវិញជុំវិញគោលបំណងរួមសម្រាប់មធ្យោបាយឆ្ពោះទៅមុខដ៏យូរអង្វែងនៅលើបញ្ហាអាហ្វហ្កានីស្ថាន និងដើម្បីឈានទៅដល់ការរួបរួម ឬភាព សាមញ្ញនៃសារដូចជាសិទ្ធិមនុស្ស ជាពិសេសលើបញ្ហាស្ត្រី និងក្មេងស្រី។​ បន្ថែមពីនេះ អភិបាលកិច្ចដែលរួមបញ្ចូលគ្រប់ភាគី ការប្រឆាំងភេរវកម្ម ការជួញដូរគ្រឿងញៀន​ក៏ជាចំណុច សំខាន់នៃកិច្ចប្រជុំនោះផងដែរ។
 
ចំពោះចំនួនរដ្ឋសមាជិកដែលនឹងត្រូវចូលរួមប្រជុំនាខែក្រោយនេះ លោក Dujarric​ មិន ទាន់អាចជម្រាបប្រាប់ថាមានប្រទេសណាខ្លះនោះទេ ប៉ុន្តែ លោកបញ្ជាក់ថា បញ្ជីប្រទេស ចូលរួមនឹងត្រូវបានចែករំលែកនៅពេលខាងមុខ។
 
ពាក់ព័ន្ធនឹងការចូលរួមរបស់តំណាងក្រុមការពារសិទ្ធមនុស្ស​ និងសិទ្ធស្ត្រីវិញ លោកមិនទាន់ថាយ៉ាងណាឡើយ តែលោកអះអាងថា ប្រព័ន្ធUN នៅតែមានទំនាក់ទំនងយ៉ាងជិតស្និទ្ធ នៅក្នុងការទំនាក់ទំនងជាទៀងទាត់ជាមួយក្រុមស្ត្រីអាហ្វហ្កានីស្ថាន ក្រុមតស៊ូមតិ មិនថានៅ ក្នុងអាហ្វហ្កានីស្ថានផ្ទាល់ ឬនៅក្រៅប្រទេសក៏ដោយ។
 
គួររំលឹកឡើងវិញថា ក្រុមតាលីបង់បានដណ្តើមអំណាចនៅខែសីហាឆ្នាំ២០២១ ខណៈដែល កងកម្លាំងដឹកនាំដោយអាមេរិកបានដកខ្លួនចេញបន្ទាប់ពីសង្គ្រាម ២០ ឆ្នាំ។ កាលពីខែធ្នូ ឆ្នាំ ២០២២ មហាសន្និបាតិ UN ដែលមានសមាជិក ១៩៣ នាក់បានអនុម័តការពន្យារពេល ជាលើកទីពីរដែលជាការសម្រេចចិត្តថាត្រូវទទួលស្គាល់រដ្ឋបាលតាលីបង់អាហ្វហ្កានីស្ថាន ដោយអនុញ្ញាតឱ្យពួកគេបញ្ជូនអគ្គរដ្ឋ UN ទៅទីក្រុងញូវយ៉កឬយ៉ាងណា៕ 
 
អ្នកសរសេរអត្ថបទ

ជា ពេជ្រដាឡែន គឺជាអ្នកសារព័ត៌មានក្រៅម៉ោង​នៃសារព័ត៌មានថ្មីៗ។ បច្ចុប្បន្ន ដាឡែន ជានិស្សិតឆ្នាំទីបី ផ្នែកសិក្សាអន្តរជាតិ នៅវិទ្យាស្ថានភាសាបរទេស សកលវិទ្យាល័យភូមិន្ទ ភ្នំពេញ។ ដាឡែន តាមដានព័ត៌មានទាក់ទង កិច្ចការអន្តរជាតិ ព្រមទាំងបញ្ហានយោបាយនៅក្នុងតំបន់អាស៊ីអាគ្នេយ៍។ CHEA Pichdalen is a part-time international news reporter at Thmey Thmey. Currently, she is also a junior student majoring in International Studies at Institute of Foreign Languages at Royal University of Phnom Penh. She covers current international affairs as well as ongoing political issues in the Southeast Asia region.

© រក្សាសិទ្ធិដោយ thmeythmey.com
Tag:

ជា ពេជ្រដាឡែន