កីឡាអន្តរជាតិ  អន្តរជាតិ 
FIFA ដំឡើងប្រាក់រង្វាន់៣ដង ក្នុងព្រឹត្តិការណ៍បាល់ទាត់ World Cup នារី ឆ្នាំ២០២៣
  • ថ្ងៃព្រហស្បតិ៍ ទី២៩ ខែមិថុនា ឆ្នាំ២០២៣ ​​ ម៉ោង ៨:២៩ នាទី យប់
FIFA ដំឡើងប្រាក់រង្វាន់៣ដង ក្នុងព្រឹត្តិការណ៍បាល់ទាត់ World Cup នារី ឆ្នាំ២០២៣
សហព័ន្ធកីឡាបាល់ទាត់អន្តរជាតិ (FIFA) ​បានដំឡើងចំនួនប្រាក់រង្វាន់ក្នុងព្រឹត្តិការណ៍ FIFA World Cup នារី ឆ្នាំ២០២៣ លើស៣ដងបើធៀបឆ្នាំ២០១៩។ FIFA នឹងផ្តល់ប្រាក់រង្វាន់ផ្ទាល់ផងដែរទៅកាន់កីឡាការិនី ដោយមិចាំបាច់ឆ្លងកាត់តាមសហព័ន្ធ ដែលមានក្រុមបង្ហាញខ្លួននៅអូស្ត្រាលី និងនូវេលសេឡង់។ Alex Morgan ខ្សែប្រយុទ្ធក្រុមម្ចាស់ការពារជើងឯកអាម៉េរិក សារទរចំពោះកំណែទ្រង់ថ្មីរបស់ FIFA ដែលនេះនឹងធ្វើឱ្យការប្រកួតប្រជែងរបស់ក្រុមនារីកើនមួយកម្រិតទៀត។
TTN-Free-Banner-In-Article-PC


Alex Morgan ជាកីឡាការិនីនៅលើវិស័យបាល់ទាត់ជើងចាស់មួយរូប ដោយនាងធ្លាប់បានបង្ហាញខ្លួនលេងឱ្យក្រុមជម្រើសជាតិនារីអាម៉េរិកចំនួន ៣លើករួចមកហើយក្នុងព្រឹត្តិការណ៍ World Cup។ Women’s World Cup 2023 ដែលធ្វើឡើងនៅក្នុងប្រទេសអូស្ត្រាលី និងនូវែលសេឡង់ នឹងក្លាយជាការបង្ហាញខ្លួនលើកទី៤ ក្នុងអាជីពរបស់ ​Alex Morgan ផ្ទាល់។
  


«FIFA ពិតជាបានធ្វើរឿងដ៏គួរឱ្យភ្ញាក់ផ្អើលយ៉ាងខ្លាំង នេះជាអ្វីដែលចេញពីមាត់ខ្ញុំផ្ទាល់ គឺវាពិតជាការងារដ៏ល្អបំផុតដែលបានបង្កើននូវតម្លៃនៃប្រាក់រង្វាន់។ យើងនៅតែមានផ្លូវត្រូវដើរទៅ តែការផ្តល់ប្រាក់រង្វាន់ដោយផ្ទាល់ទៅដល់កីឡាការិនីគឺពិតជារឿងធំ ខ្ញុំគិតថា វាគឺជាការផ្លាស់ប្តូរជីវិតសម្រាប់មនុស្សម្នាក់ៗ ក៏ដូចជាកីឡាការិនីម្នាក់ៗដែលបានចូលរួមការប្រកួត។

ដូច្នេះពួកគេយ៉ាងហោចណាស់ បើទោះមិនទទួលជ័យជម្នះក៏អាចរកបាន ៣ម៉ឺនដុល្លារដែរ វាច្រើនណាស់។»។ Alex Morgan បាននិយាយក្នុងសន្និសីទកាសែតបែបនេះមុនពេលក្រុមត្រូវបំពេញបេសកកម្មជំរុំហ្វឹកហាត់ត្រៀមខ្លួនប្រកួត។
  


កីឡាការិនីនៅក្នុងព្រឹត្តិការណ៍ Women’s World Cup ដែលការប្រកួតនឹងចាប់ផ្តើមពីថ្ងៃទី២០ ខែកក្កដា ក្នុងប្រទេសអូស្ត្រាលី និងនូវែលសេឡង់ ត្រូវបានធានានឹងទទួលបានប្រាក់រង្វាន់ក្នុងម្នាក់យ៉ាងហោចណាស់ ៣ម៉ឺនដុល្លារ នៅក្នុងថ្ងៃបើកប្រាក់បៀវត្សរ៍របស់ FIFA។ ការធ្វើបែបនេះ FIFA មានគោលបំណងចង់ផ្តល់ប្រាក់ដែលជាប្រាក់រង្វាន់ចែកចាយដល់បុគ្គលជាជាងតាមរយៈសហព័ន្ធនីមួយៗ។
 
ចំណែកសមាជិកនីមួយៗស្ថិតក្នុងក្រុមដែលគ្រងជើងឯក នឹងធ្វើដំណើរត្រឡប់ទៅផ្ទះវិញជាមួយប្រាក់រង្វាន់ក្នុងដៃប្រមាណ ២៧ម៉ឺន ដែលជាចំណែកនៃប្រាក់រង្វាន់សរុបក្នុងព្រឹត្តិការណ៍ទាំងមូលចំនួន ១១០លានដុល្លារ។ តម្លៃប្រាក់រង្វាន់នេះមានការកើនឡើងប្រមាណជាង ៣០០ភាគរយ បើធៀបទៅនឹងតម្លៃប្រាក់រង្វាន់ឆ្នាំ ២០១៩។
 
ទោះយ៉ាងណាតម្លៃសរុបនៃប្រាក់រង្វាន់ទាំងមូលនៅមានកម្រិតទាបជាងការប្រកួតព្រឹត្តិការណ៍បាល់ទាត់ World Cup ផ្នែកបុរស នៅប្រទេសកាតា ដែលមានតម្លៃប្រាក់រង្វាន់សរុបចំនួន ៤៤០លានដុល្លារ៕
អ្នកសរសេរអត្ថបទ

ជា ពេជ្រដាឡែន គឺជាអ្នកសារព័ត៌មានក្រៅម៉ោង​នៃសារព័ត៌មានថ្មីៗ។ បច្ចុប្បន្ន ដាឡែន ជានិស្សិតឆ្នាំទីបី ផ្នែកសិក្សាអន្តរជាតិ នៅវិទ្យាស្ថានភាសាបរទេស សកលវិទ្យាល័យភូមិន្ទ ភ្នំពេញ។ ដាឡែន តាមដានព័ត៌មានទាក់ទង កិច្ចការអន្តរជាតិ ព្រមទាំងបញ្ហានយោបាយនៅក្នុងតំបន់អាស៊ីអាគ្នេយ៍។ CHEA Pichdalen is a part-time international news reporter at Thmey Thmey. Currently, she is also a junior student majoring in International Studies at Institute of Foreign Languages at Royal University of Phnom Penh. She covers current international affairs as well as ongoing political issues in the Southeast Asia region.

© រក្សាសិទ្ធិដោយ thmeythmey.com
Tag:

ជា ពេជ្រដាឡែន