.jpg)
.jpg)
ជនជាតិថៃស្លាប់ក្នុងជម្លោះអ៊ីស្រាអែល-ហាម៉ាស កើនដល់២១នាក់
- ថ្ងៃព្រហស្បតិ៍ ទី១២ ខែតុលា ឆ្នាំ២០២៣ ម៉ោង ២:៥៩ នាទី រសៀល
នាយករដ្ឋមន្ត្រីថៃ សេដ្ឋា ថាវីស៊ីន បាននិយាយនៅថ្ងៃទី១២ ខែតុលា ថា ជនជាតិថៃ២១នាក់ហើយត្រូវបានសម្លាប់នៅក្នុងជម្លោះរវាងអ៊ីស្រាអែល និងក្រុមសកម្មប្រយុទ្ធហាម៉ាស។
ជនជាតិថៃ ស្ថិតក្នុងចំណោមជនរងគ្រោះបរទេសច្រើនជាងគេក្នុងជម្លោះប្រដាប់អាវុធរវាងអ៊ីស្រាអែល និងហាម៉ាសប ដែលចាប់ផ្ដើមក្រោយក្រុមសកម្មជនដែលគ្រប់គ្រងតំបន់ជ្រោយហ្កាងហ្សាវាយប្រហារយ៉ាងភ្ញាក់ផ្អើលលើអ៊ីស្រាអែលនៅថ្ងៃទី៧ ខែតុលា។ ជនជាតិថៃមួយចំនួន ក៏ត្រូវបានចាប់ជាចំណាប់ខ្មាំងដែរ។
នាយករដ្ឋមន្រ្តីថៃ សេដ្ឋ ថាវីស៊ីន អះអាងថា ជាមួយការព័ត៌មាននៅយប់ថ្ងៃទី១១ ខែតុលា ជនជាតិថៃម្នាក់ទៀតបានស្លាប់ ដែលធ្វើឱ្យចំនួនសរុបកើនដល់២១នាក់ហើយ។ យោងតាមក្រសួងការងាររបស់ប្រទេសថៃ ជនជាតិថៃប្រមាណ៣ម៉ឺននាក់ កំពុងរស់នៅ និងធ្វើការនៅអ៊ីស្រាអែល ដែលភាគច្រើនធ្វើការក្នុងវិស័យកសិកម្ម។
ជាមួយគ្នានេះ អាជ្ញាធរថៃ ក៏បានដឹកជញ្ជូនជនជាតិថៃខ្លះពីអ៊ីស្រាអែលដែរ។ ប្រជាជនថៃជាង៥ពាន់នាក់ កំពុងស្វែងរកការវិលត្រឡប់ទៅថៃវិញ ហើយអ្នកការទូតកំពុងរិះរកជម្រើសជម្លៀសពលរដ្ឋថៃតាមច្រកសមុទ្រ និងដីគោក។
ជើងហោះហើរធ្វើមាតុភូមិនិវត្តន៍របស់ថៃ គ្រោងចាកចេញពីអ៊ីស្រាអែលនៅចុងសប្ដាហ៍នេះ និងនៅសប្តាហ៍ក្រោយ។
ស្ថានភាពនៅអ៊ីស្រាអែល និងជ្រោយហ្កាហ្ដា នៅតែតានតឹងខ្លាំង ខណៈដែលយោធាអ៊ីស្រាអែល បានបន្តវាយលុកគោលដៅរបស់ក្រុមហាម៉ាសនៅតំបន់ជ្រោយហ្គាហ្សាសម្រាប់ថ្ងៃទី៥ ជាការសងសឹកការវាយប្រហាររបស់សកម្មប្រយុទ្ធប៉ាឡេស្ទីនមួយនេះ ដែលធ្វើឱ្យចំនួនអ្នកស្លាប់បានកើនឡើងដល់រាប់ពាន់នាក់ទៅហើយ។ នាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ បានប្តេជ្ញាថានឹងបំផ្លាញក្រុមហាម៉ាសទាំងស្រុង៕
© រក្សាសិទ្ធិដោយ thmeythmey.com
Tag:
