សេដ្ឋកិច្ចអន្តរជាតិ  អន្តរជាតិ 
អ៊ីតាលី ក្លាយជាប្រទេសទី១ ដែលចាកចេញពីគម្រោងខ្សែក្រវាត់និងផ្លូវរបស់ចិន
  • ថ្ងៃព្រហស្បតិ៍ ទី៧ ខែធ្នូ ឆ្នាំ២០២៣ ​​ ម៉ោង ៥:៣៩ នាទី ល្ងាច
អ៊ីតាលី ក្លាយជាប្រទេសទី១ ដែលចាកចេញពីគម្រោងខ្សែក្រវាត់និងផ្លូវរបស់ចិន
នាយករដ្ឋមន្រ្តីអ៊ីតាលី Giorgia Meloni ។ រូបភាព ៖ AFP
អ៊ីតាលីបានជូនដំណឹងជាផ្លូវការទៅចិនថា ខ្លួននឹងចាកចេញពីគំនិតផ្តួចផ្តើមខ្សែក្រវាត់ និងផ្លូវ (BRI) ។ នេះបើតាមទីភ្នាក់ងារព័ត៌មាន Reuters ទីក្រុងរ៉ូមបានច្រានចោលការព្រួយបារម្ភជុំវិញទំនាក់ទំនង និងការធ្វើឱ្យខាតបង់សេដ្ឋកិច្ចជាតិក្រោយការចាកចេញនេះដែរ។
TTN-Free-Banner-In-Article-PC

 
នៅឆ្នាំ២០១៩ អ៊ីតាលីក្លាយជាប្រទេសលោកខាងលិចដំបូងគេដែលបានចូលរួមក្នុងកម្មវិធីពាណិជ្ជកម្ម និងវិនិយោគរបស់គម្រោងខ្សែក្រវាត់ និងផ្លូវរបស់ចិន។ យ៉ាងណាមិញ ក្រោយជាប់ឆ្នោតជានាយករដ្ឋមន្ត្រីលោកស្រី Giorgia Meloni ចង់ដកខ្លួនចេញពីគម្រោង BRI របស់ចិនភ្លាមដោយយល់ថា មិនបាននាំផលចំណេញដល់អ៊ីតាលី។ 
 
កិច្ចព្រមព្រៀងគម្រោង BRI ក្នុងឆ្នាំ២០១៩ នឹងត្រូវផុតសុពលភាពនៅខែមីនា ឆ្នាំ២០២៤។ រដ្ឋាភិបាលអ៊ីតាលីបានប្រកាសថា ទីក្រុងរ៉ូមបានផ្ញើលិខិតមួយទៅកាន់ទីក្រុងប៉េកាំងនាពេលថ្មីៗនេះដោយបញ្ជាក់ជំហរមិនបន្តកិច្ចព្រមព្រៀងនេះទៀតទេ។
 
ជុំវិញរឿងនេះ សារព័ត៌មាន Reuters បានដកស្រង់ប្រភពពីមន្រ្តីរដ្ឋាភិបាលអ៊ីតាលីមួយរូបថា ៖ « យើងមានបំណងរក្សាទំនាក់ទំនងដ៏ល្អជាមួយចិន ទោះបីជាយើងលែងចូលរួមក្នុងគំនិតផ្តួចផ្តើមខ្សែក្រវាត់ និងផ្លូវក៏ដោយ ។ ប្រទេសសេដ្ឋកិច្ចរីកចម្រើនទាំង៧ (G7) ផ្សេងទៀតមានទំនាក់ទំនងជិតស្និទ្ធជាមួយចិនជាងយើង ទោះបីជាការពិតពួកគេមិនដែលបានចូលរួមជាមួយ BRI ក៏ដោយ »។ 
 
អ៊ីតាលីនឹងកាន់តំណែងជាម្ចាស់ផ្ទះកិច្ចប្រជុំ G7 នៅឆ្នាំ២០២៤។
 
យោងតាមទិន្នន័យពីរដ្ឋាភិបាលអ៊ីតាលី នៅឆ្នាំ២០២២ ការនាំចេញទៅកាន់ចិនមានចំនួនសរុប១៦,៤ពាន់លានអឺរ៉ូ (១៧,៧ពាន់លានដុល្លារ)។ តួលេខនេះកើនឡើងខ្ពស់បើធៀបចំនួន ១៣ពាន់លានអឺរ៉ូក្នុងឆ្នាំ២០១៩ ។ ចំណែកការនាំចេញរបស់ចិនទៅកាន់អ៊ីតាលីបានកើនឡើងដល់ ៥៧,៥ពាន់លានអឺរ៉ូ (៦១,៩៧ពាន់លានដុល្លារ) នៅក្នុងឆ្នាំ២០២២ ។
 
សម្រាប់ដៃគូពាណិជ្ជកម្មក្នុងតំបន់ចាយប្រាក់អឺរ៉ូធំៗរបស់អ៊ីតាលីមាន បារាំង និងអាល្លឺម៉ង់បាននាំចេញច្រើនជាងទៅកាន់ចិនកាលពីឆ្នាំមុន បើទោះបីជាមិនមែនជាផ្នែកនៃ BRI។ 
 
យ៉ាងណាមិញ ដើម្បីរក្សាទំនាក់ទំនងជាយុទ្ធសាស្ត្រ រដ្ឋមន្ត្រីការបរទេសអ៊ីតាលីលោក Antonio Tajani បានទៅបំពេញទស្សនកិច្ចនៅទីក្រុងប៉េកាំងក្នុងខែកញ្ញា ហើយប្រធានាធិបតី Sergio Mattarella នឹងបំពេញទស្សនកិច្ចនៅចិននៅឆ្នាំក្រោយ។
 
ទោះបីជាជាផ្នែកមួយនៃ BRI ប៉ុន្តែរដ្ឋាភិបាលអ៊ីតាលីតែងតែសង្ស័យពីគម្រោងចិន និងបានរឹតបន្តឹងក្រុមហ៊ុនចិនជារឿយៗ។ កាលពីខែមិថុនា គណៈរដ្ឋមន្ត្រីរបស់លោកស្រី Meloni បានកំណត់ឥទ្ធិពលរបស់ម្ចាស់ភាគហ៊ុនចិន Sinochem លើក្រុមហ៊ុនផលិតសំបកកង់អ៊ីតាលី Pirelli ដើម្បីការពារក្រុមហ៊ុនក្នុងស្រុក៕ 
 
អ្នកសរសេរអត្ថបទ

ធន់ សេងហុង (THUN Senghong) បានចាប់ផ្តើមការងារជាអ្នកសារព័ត៌មាននៅ សារព័ត៌មានថ្មីៗ ក្នុងឆ្នាំ២០២២។ បច្ចុប្បន្ននេះ សេងហុងកំពុងសិក្សាផ្នែកសេដ្ឋកិច្ចនយោបាយ នៅសកលវិទ្យាល័យសេដ្ឋកិច្ចទីក្រុងហូជីមិញ ប្រទេសវៀតណាម។ សេងហុង ជាអ្នកតាមដានព័ត៌មានជាតិ និងអន្តរជាតិ ផ្តោតសំខាន់លើផ្នែកសេដ្ឋកិច្ច ។ Thun Senghong is a freelancer national and international news reporter at Thmey Thmey. He is currently studying at UEH University in Vietnam. He aims to cover current issues in economy.

© រក្សាសិទ្ធិដោយ thmeythmey.com
Tag:

ធន់ សេងហុង