.jpg)
.jpg)
អូស្ត្រាលីរៀបចំច្បាប់ឱ្យបុគ្គលិកមិនឆ្លើយតបថៅកែនៅក្រៅម៉ោងធ្វើការ
- ថ្ងៃព្រហស្បតិ៍ ទី៨ ខែកុម្ភៈ ឆ្នាំ២០២៤ ម៉ោង ១០:០២ នាទី ព្រឹក
នាយករដ្ឋមន្ត្រីអូស្ត្រាលីលោក អាន់តូនី អាល់បានី។ រូបភាព AFP
អូស្ត្រាលី កំពុងរៀបចំច្បាប់ដែលផ្តល់ឱ្យអ្នកធ្វើការ ទទួលបានសិទ្ធិមិនអើពើពីការហៅទូរស័ព្ទ និងសារ ដែលមិនសមហេតុផលពីថៅកែ ឬអ្នកគ្រប់គ្រងរបស់ពួកគេ នៅខាងក្រៅម៉ោងធ្វើការ ដោយគ្មានការផាកពិន័យលើបុគ្គលិក។ សម្រាប់និយោជកវិញ ពួកគេអាចប្រឈមនឹងការផាកពិន័យ សម្រាប់ការបំពានច្បាប់ថ្មីនេះ។
សិទ្ធិក្នុងការផ្តាច់បណ្ដាញទំនាក់ទំនង ជាផ្នែកមួយនៃការកែប្រែច្បាប់ទំនាក់ទំនងឧស្សាហកម្ម ដែលស្នើឡើងដោយរដ្ឋាភិបាលសហព័ន្ធ ដើម្បីការពារសិទ្ធិបុគ្គលិក និងជួយស្ដារតុល្យភាពជីវិត និងការងារ។
រដ្ឋមន្ត្រីក្រសួងការងារអូស្ត្រាលី លោក Tony Burke មកពីបក្សពលករដែលកំពុងកាន់អំណាច បានបញ្ជាក់នៅក្នុងសេចក្តីថ្លែងការណ៍មួយ នៅថ្ងៃទី៧ ខែកុម្ភៈ ថា សមាជិកព្រឹទ្ធសភាភាគច្រើន បានប្រកាសគាំទ្រសេចក្តីស្នើច្បាប់នេះ។ លោក Burke កត់សម្គាល់ដែរថា ការផ្តល់នេះ បញ្ឈប់និយោជិតពីការធ្វើការថែមម៉ោង ដោយគ្មានប្រាក់ឈ្នួល តាមរយៈសិទ្ធិក្នុងការផ្តាច់ទំនាក់ទំនងមិនសមហេតុផលក្រៅម៉ោងធ្វើការ។
ជុំវិញរឿងនេះនាយករដ្ឋមន្ត្រីអូស្ត្រាលី លោក អាន់តូនី អាល់បានី បានបញ្ជាក់ពីការមិនសមស្រប ក្នុងការតម្រូវឱ្យឆ្លើយតបក្រៅម៉ោងធ្វើការផងដែរ។ «អ្វីដែលយើងនិយាយយ៉ាងសាមញ្ញនោះ គឺអ្នកណាដែលមិនត្រូវបានប្រាក់ឈ្នួល២៤ម៉ោង ក្នុងមួយថ្ងៃ មិនគួរត្រូវបានពិន័យ ប្រសិនបើពួកគេ មិនបើកប្រព័ន្ធអនឡាញ និងអាចទាក់ទងបាន២៤ ម៉ោងក្នុងមួយថ្ងៃ» ។ លោក អាល់បានី ប្រាប់អ្នកសារព័ត៌មានបែបនេះ នៅក្នុងថ្ងៃដដែល។
សេចក្តីស្នើច្បាប់នេះ ក៏រួមបញ្ចូលបទប្បញ្ញត្តិផ្សេងទៀត ដូចជាផ្លូវកាន់តែច្បាស់ពីការងារបណ្តោះអាសន្ន ទៅការងារអចិន្ត្រៃយ៍ និងស្តង់ដារអប្បបរមាសម្រាប់កម្មករបណ្តោះអាសន្ន និងអ្នកបើកបរឡានដឹកទំនិញ។ សេចក្តីស្នើច្បាប់នេះ នឹងដាក់ទៅសភានៅសប្តាហ៍នេះ។
យ៉ាងណាមិញ អ្នកនយោបាយ ក្រុមនិយោជក និងអ្នកដឹកនាំក្រុមហ៊ុនមួយចំនួន បានព្រមានថា សិទ្ធិក្នុងការផ្តាច់សេវាទំនាក់ទំនងក្រៅម៉ោងធ្វើការ ជាការហួសកម្រិត ហើយនឹងធ្វើឱ្យ ប៉ះពាល់ដល់ការផ្លាស់ប្តូរ ឆ្ពោះទៅរកការងារដែលអាចបត់បែនបាន និងការប្រកួតប្រជែង។
ឯក្រុមឆ្វេងនិយម នៃបក្សបៃតងដែលគាំទ្រច្បាប់នេះ និងជាបក្សដំបូងដែលស្នើច្បាប់កាលពីឆ្នាំមុន បាននិយាយថា វាជាការឈ្នះដ៏ធំមួយ សម្រាប់គណបក្ស។ មេដឹកនាំបៃតង លោក Adam Bandt បានបង្ហោះសារលើបណ្ដាញសង្គម X ថា ប្រជាជនអូស្ត្រាលី ធ្វើការជាមធ្យមក្នុងមួយឆ្នាំ ប្រាំមួយសប្តាហ៍ដោយគ្មានប្រាក់បន្ថែមម៉ោង ដែលស្មើនឹងជាង ៦០,១៣ ពាន់លានដុល្លារ នៅក្នុងប្រាក់ឈ្នួល ដែលមិនបានផ្ដល់ជូនអ្នកធ្វើការនៅទូទាំងប្រទេស។
មិនត្រឹមតែអូស្រ្តាលីឡើយ បារាំង អេស្ប៉ាញ និងប្រទេសផ្សេងទៀតនៅសហភាពអឺរ៉ុប ក៏បានដាក់ចេញរួចហើយ ច្បាប់ដែលអនុញ្ញាតឱ្យនិយោជិតមានសិទ្ធិបិទឧបករណ៍ទំនាក់ទំនង ដូចជាទូរស័ព្ទ ឬកំព្យូទ័រជាដើម នៅក្រៅម៉ោងធ្វើការ៕
© រក្សាសិទ្ធិដោយ thmeythmey.com
Tag:
