.png)
ទីលានទុកដាក់សំរាមតម្លៃជាង ៩លានដុល្លារនៅខេត្តស្ទឹងត្រែង និងក្រចេះ នឹងត្រូវបានដាក់ឱ្យពលរដ្ឋប្រើប្រាស់
- ថ្ងៃអាទិត្យ ទី១១ ខែកុម្ភៈ ឆ្នាំ២០២៤ ម៉ោង ៥:៥៩ នាទី ល្ងាច
ភ្នំពេញ៖ ទីលានទុកដាក់សំរាម ខេត្តខេត្តស្ទឹងត្រែង និងក្រចេះ ស្របតាមបទដ្ឋានបច្ចេកទេស នៃគម្រោងកែលម្អគ្រប់គ្រងបរិស្ថានជុំវិញបឹងទន្លេមេគង្គ ជំហានទី៤ នឹងត្រូវបានដាក់សម្ពោធដាក់ឱ្យប្រើប្រាស់ក្នុងពេលឆាប់នេះ ក្រោយបញ្ចប់ការសាងសង់កាលពីខែសីហា ឆ្នាំ២០២៣ ។ ទីលានដាក់សំរាមទាំងពីរនេះ ត្រូវបានចំណាយថវិកាសាងសង់ជាង ៩លានដុល្លារអាម៉េរិក។
ទីលានទុកដាក់សំរាមក្នុងខេត្តស្ទឹងត្រែង ត្រូវបានសាងសង់នៅលើផ្ទៃដីសរុបទំហំ ១៩,៤៦ ហិកតា ចំណាយថវិកាសាងសង់ជាង ៤លានដុល្លារអាម៉េរិក នៅចំណុចភូមិអូរត្រែល ឃុំថាឡា ស្រុកថាឡាបរិវ៉ាត់ នៃខេត្តស្ទឹងត្រែង។ ទីតាំងនោះ ត្រូវបានធ្វើឡើងក្នុងរណ្ដៅទី១ មានទំហំ ១៥ ៩៩៦ម៉ែត្រការ៉េអាចផ្ទុកសំរាមបានចំនួន ១៨៥ ១៥១ម៉ែត្រគីប និងស្រះប្រតិកម្មទឹកស្អុយចេញពីសំរាមចំនួន៤ ទំហំសរុបចំនួន១២ ០០០ម៉ែត្រគីប។ ដោយឡែក ទីលានទុកដាក់សំរាមខេត្តស្ទឹងត្រែងនេះ សាងសង់កាលថ្ងៃទី៨ ខែមេសា ឆ្នាំ២០២២ និងបានបញ្ចប់ការសាងសង់កាលពីថ្ងៃទី៣១ ខែសីហា ឆ្នាំ២០២៣។
រូបភាពពី៖ ក្រសួងសាធារណការ និងដឹកជញ្ជូន
ជាមួយគ្នានេះ ទីលានទុកដាក់សំរាមក្នុងខេត្តក្រចេះ ត្រូវបានសាងសង់នៅថ្ងៃទី២១ ខែមីនា ឆ្នាំ២០២២ និងបានបញ្ចប់ការសាងសង់នៅថ្ងៃទី១៣ ខែសីហាផងដែរ។ ទីលាននេះ លើផ្ទៃដីសរុបទំហំ ២៦,៨៨ ហិក ស្ថិតនៅភូមិខ្សារ ឃុំដារ ស្រុកចិត្របុរី ខេត្តក្រចេះ ចំណាយថវិកាចំនួន ៤,៩ ដុល្លារអាម៉េរិក។ ទឹកប្រាក់សម្រាប់សង់ទីលានទុកដាក់សំរាមក្នុងខេត្តក្រចេះនេះ ជាកម្ចីឥណទានធនាគារអភិវឌ្ឍន៍អាស៊ី (ADB)។
ការដាក់សម្ពោធទីលានទុកដាក់សំរាមទាំងពីរនេះ គឺសម្រាប់ប្រជាពលរដ្ឋឱ្យប្រើប្រាស់ ដើម្បីលើកកម្ពស់គុណភាពការរស់នៅរបស់ពលរដ្ឋក្នុងតំបន់ និងតំបន់ជុំវិញ ជាពិសេសកាត់បន្ថយបញ្ហាប្រឈមទៅលើកត្តាសុខភាព និងការបំពុលបរិស្ថាន៕
© រក្សាសិទ្ធិដោយ thmeythmey.com
Tag:
