.png)
អ្នកថតរូបអាជីពមួយរូប ជិះម៉ូតូជុំវិញបឹងទន្លេសាប រៃអង្គាសថវិកាជួយពេទ្យកុមារអង្គរ
- ថ្ងៃពុធ ទី២១ ខែកុម្ភៈ ឆ្នាំ២០២៤ ម៉ោង ៤:១៩ នាទី រសៀល
ផ្នែកមួយនៃសហគមន៍បឹងទន្លេសាប នៅខេត្តបាត់ដំបង។
សៀមរាប៖ លោក ថ្លាង ឌីណា ជាអ្នកថតរូបអាជីពមួយរូប បានប្រកាសរៀបចំកម្មវិធីសប្បុរសធម៌ ដោយធ្វើដំណើរថតរូបផ្សងព្រេងតាមខេត្តជាប់បឹងទន្លេសាប ក្នុងបំណង រៃអង្គាសថវិកាជួយមន្ទីរពេទ្យកុមារអង្គរ។ ចាប់ផ្តើមកម្មវិធីសប្បុរសធម៌នេះ ក៏ដើម្បីបំពេញសន្យារបស់ខ្លួន នៅពេលកំណើតកូនស្រីរបស់លោក កាលពី២ឆ្នាំមុន។ តែអកុសល កូនស្រីពៅរបស់ លោក ឌីណា បានស្លាប់ទៅវិញក្រោយចាប់កំណើតបាន៣ថ្ងៃ។
«ដំណើរថតរូបផ្សងព្រេងសប្បុរសធម៌ជាមួយនាឡិ» ជាឈ្មោះកម្មវិធីសប្បុរសធម៌ ដែលលោក ថ្លាង ឌីណា រៀបចំឡើងដើម្បីបំពេញសន្យារបស់ខ្លួន មុនកំណើតកូនស្រីពៅលោក នៅឆ្នាំ២០២២។ ក្នុងកម្មវិធីនេះ លោកនឹងធ្វើដំណើរតាមម៉ូតូរយៈពេលមួយសប្ដាហ៍ជុំវិញបឹងទន្លេសាប ដោយចាប់ផ្តើមពីថ្ងៃទី២០ កុម្ភៈ ដើម្បីផ្តិតរូបភាពជាច្រើនសម្រាប់ដាក់លក់។ ថវិកាដែលប្រមូលបាន នឹងប្រគល់ជូនដល់មន្ទីរពេទ្យកុមារអង្គរ។
លោក ឌីណា បានរំឭកប្រាប់សារព័ត៌មានឌីជីថលថ្មីៗថា កូនស្រីរបស់លោកកើតនៅថ្ងៃទី៩ ខែកុម្ភៈ ឆ្នាំ២០២២ ហើយពេលនោះលោកបានសន្យាថា នឹងរៀបចំកម្មវិធីសប្បុរសធម៌មួយ ដើម្បីអបអរកំណើតកូន។ ជាអកុសល កូនស្រី នាឡិ របស់លោក ឌីណា បានស្លាប់ទៅវិញក្រោយកំណើត៣ថ្ងៃ ដោយសារឈ្លក់ទឹកភ្លោះ។
លោក ថ្លាង ឌីណា ពេលធ្វើដំណើរទៅដល់ខេត្តបាត់ដំបង។ រូបភាពពីហ្វេសប៊ុក Dyna Pisith
លោក ឌីណា បានបន្ថែមថា៖«កាល៣ឆ្នាំមុន ប្រពន្ធគាត់ទម្ងន់បានកូនស្រី ខ្ញុំរំភើបចិត្ត ខ្ញុំគិតថាចង់ឱ្យកូនស្រីវាកើតមកឯករាជ្យ ចូលចិត្តធម្មជាតិ ចូលចិត្តដើរលេង ហើយដើម្បីស្វាគមន៍កំណើតគាត់ ក៏ចង់ធ្វើកម្មវិធីសប្បុរសធម៌ ជិះម៉ូតូជុំវិញបឹងទន្លេសាប និងលក់រូប ជូនពេទ្យកុមារ។ តែអកសុល គាត់កើតបាន៣ថ្ងៃស្លាប់ តែឱ្យតែដល់ថ្ងៃកំណើតគាត់ខែពីរ (កុម្ភៈ) ថ្ងៃទី៩ យើងនឹកឃើញសន្យាជាមួយគាត់រហូត»។
លោក ឌីណា ចាប់ផ្តើមចេញដំណើរដោយការជិះម៉ូតូ និងស្នាក់នៅតំបន់ជុំវិញបឹងទន្លេសាប នៅថ្ងៃទី២០កុម្ភៈ ដោយគ្រោងផ្តិតរូបភាពជាច្រើនដើម្បីដាក់ក្នុងកម្មវិធីសប្បុរសធម៌នេះ។ ក្រៅពីនោះ លោកក៏ត្រៀមរូបថតដែលលោកធ្លាប់បានថតកន្លងមក ដាក់លក់នៅទំព័រហ្វេសប៊ុករបស់ខ្លួន ឈ្មោះ Dyna Pisith ផងដែរ។ រូបភាពទាំងនោះមានប្រាសាទ ព្រះសង្ឃ សត្វស្លាប បឹងទន្លេសាប និងជីវភាពប្រចាំថ្ងៃរបស់ប្រជាជនខ្មែរជាដើម។ កម្មវិធីនេះ លោក ឌីណា រំពឹងថានឹងទទួលបានថវិកាចំនួន ២ ៥០០ដុល្លារ ដើម្បីជួយមន្ទីរពេទ្យកុមារអង្គរ។
លោក ថ្លាង ឌីណា ជាអ្នកថតរូបអាជីពមួយរូប ដែលមានការទទួលស្គាល់ពីមហាជនជាច្រើន។ ស្នាដៃរបស់លោក ភាគច្រើនផ្តោតលើប្រាសាទ មនុស្ស ជីវិតរស់នៅប្រចាំថ្ងៃ ជាដើម។ កាល២០១៩ លោកក៏ធ្លាប់លក់រូបថត ដើម្បីជួយដល់គ្លីនិកទន្លេផងដែរ៕
រូបភាពដែលលោក ថ្លាង ឌីណា ប្រកាសលក់ដើម្បីយកថវិកាជួយមន្ទីរពេទ្យកុមារអង្គរ។
រូបភាពដែលលោក ថ្លាង ឌីណា ប្រកាសលក់ដើម្បីយកថវិកាជួយមន្ទីរពេទ្យកុមារអង្គរ។
រូបភាពដែលលោក ថ្លាង ឌីណា ប្រកាសលក់ដើម្បីយកថវិកាជួយមន្ទីរពេទ្យកុមារអង្គរ។
© រក្សាសិទ្ធិដោយ thmeythmey.com
Tag:
