.png)
ប្រជាជនអូស្ត្រាលីជាច្រើនត្រូវជម្លៀស ព្រោះការគំរាមពីភ្លើងឆេះព្រៃនៅរដ្ឋVictoria
- ថ្ងៃសុក្រ ទី២៣ ខែកុម្ភៈ ឆ្នាំ២០២៤ ម៉ោង ១១:៣៩ នាទី ព្រឹក
រូបភាព AFP
ប្រជាជនរាប់រយនាក់នៅក្នុងរដ្ឋVictoria អូស្ត្រាលី នៅថ្ងៃទី២៣ ខែកុម្ភៈ ត្រូវបានអំពាវនាវឱ្យភៀសខ្លួន បន្ទាប់ពីភ្លើងឆេះព្រៃកាន់តែរីកធំ និងបានសម្លាប់សត្វពាហនៈ។ កម្លាំងពន្លត់អគ្គិភ័យ ដែលមានការគាំទ្រពីយន្តហោះចំនួន ៥០គ្រឿង កំពុងខិតខំទប់ស្កាត់ការរីកសាយភ្លើងឆេះព្រៃ។
មនុស្សច្រើនជាង ២ពាន់នាក់នៅថ្ងៃទី២២ ខែកុម្ភៈត្រូវបានជម្លៀសចេញពីក្រុងក្នុងរដ្ឋ Victoria ភាគខាងលិច បន្ទាប់ពីការបញ្ជាឱ្យជម្លៀសជាបន្ទាន់ បើទោះមានសុវត្ថិភាពក៏ដោយ។ ប្រជាជនទាំងនោះ បានភៀសខ្លួនទៅក្រុង Ballarat ដែលមានចម្ងាយ ៩៥ គីឡូម៉ែត្រពីភាគខាងលិចនៃទីក្រុង Melbourne។
ក្រុមអ្នកពន្លត់អគ្គីភ័យរាប់រយនាក់កំពុងប្រយុទ្ធនឹងការឆាបឆេះដ៏ធំនេះ ដោយមានជំនួយពីយន្តហោះ ៥០គ្រឿង ខណៈដែលរាយការណ៍អំពីការជម្លៀសថ្មីបានគ្របដណ្តប់ទីក្រុងជនបទចំនួន១៤ផ្សេងទៀត។ បន្ថែមពីនេះ ខ្យល់ខ្លាំងជាងការរំពឹងទុកកំពុងជំរុញឱ្យភ្លើងរាលដាលកាន់តែលឿន។ ភ្លើងឆេះព្រៃមានទំហំ ១១០០០ហិចតា។
«ខ្ញុំរំពឹងថាលក្ខខណ្ឌអគ្គីភ័យនឹងនៅតែប្រែប្រួលយ៉ាងខ្លាំងនៅថ្ងៃនេះ»។ ប្រធាននាយកដ្ឋានពន្លត់អគ្គិភ័យរដ្ឋ Victoria លោក Jason Heffernan បានលើកឡើងបែបនេះប្រាប់ស្ថានីយវិទ្យុ Australian Broadcasting នៅថ្ងៃទី២៣ ខែកុម្ភៈ ដោយបន្តប៉ាន់ប្រមាណថា ភ្លើងឆេះព្រៃនេះ អាចបំផ្លាញទ្រព្យសម្បត្តិក្នុងទំហំធំ។
យ៉ាងណាមិញ ខ្យល់ត្រជាក់ឆ្នេរសមុទ្រភាគខាងត្បូងនៃអូស្ត្រាលីនឹងរសាត់ទៅតំបន់នៅភាគខាង កើតដែលកំពុងរងដោយភ្លើងឆេះព្រៃ ហើយអាចជំរុញឱ្យសីតុណ្ហភាពធ្លាក់ចុះ។ តាមការព្យាករណ៍របស់ការិយាល័យអាកាសធាតុ ខ្យល់ត្រជាក់នេះអាចទំនងជាធ្វើឱ្យមានការធូរស្រាលខ្លះ។
ចំណែកសាលារៀនចំនួន ២ត្រូវបិទ និងសិស្សសាលាចំនួន ៤កន្លែង ត្រូវប្តូរទៅសាលាផ្សេង ខណៈផ្ទះចំនួន ៥ពាន់កន្លែង មិនមានអគ្គិសនីប្រើប្រាស់៕
© រក្សាសិទ្ធិដោយ thmeythmey.com
Tag:
.gif)
