.png)
កម្ពុជា សហការជាមួយកូរ៉េខាងត្បូង ដើម្បីពង្រីកកិច្ចសហការលើវិស័យការងារ
- ថ្ងៃអាទិត្យ ទី១៧ ខែមីនា ឆ្នាំ២០២៤ ម៉ោង ៩:២៩ នាទី ព្រឹក
លោក ហេង សួរ រដ្ឋមន្រ្តីក្រសួងការងារ បានចុះអនុស្សរណៈយោគយល់គ្នា ជាមួយលោក ឆ្វេ មូនស៊ូន អភិបាលស្រុកហ្វាឆន់ ខេត្តកាំងវ៉ុនដូនៃប្រទេសកូរ៉េ។
ភ្នំពេញ៖ កម្ពុជាបានពង្រីកកិច្ចសហការជាមួយប្រទេសកូរ៉េខាងត្បូងក្នុងការបញ្ចូនពលករទៅធ្វើការនៅក្នុងប្រទេសអភិវឌ្ឍមួយនេះ។ កិច្ចសហការនេះ ត្រូវបានចុះហត្ថលេខាលើអនុស្សរណៈយោគយល់គ្នារវាងលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ជាមួយលោក ឆ្វេ មូនស៊ូន អភិបាលស្រុកហ្វាឆន់ ខេត្តកាំងវ៉ុនដូនៃប្រទេសកូរ៉េ នាថ្ងៃទី១៥មីនា។
បន្ទាប់ពីអនុស្សរណៈយោគយល់គ្នានេះ រដ្ឋបាលស្រុកហ្វាឆន់ នឹងទទួលយកពលករពីកម្ពុជា។ ជាមួយនេះ លោក ហេង សួរ ក៏បានស្នើឱ្យលោក ឆ្វេ មូនស៊ូន ពិនិត្យលទ្ធភាពក្នុងការទទួលយកពលករជំនាញរបស់កម្ពុជា លើប្រភេទវីសា(E7)ពីសំណាក់វិស័យឯកជន ផងដែរ។
លើសពីនេះ លោករដ្ឋមន្ត្រីការងារ ក៏បានបានស្នើលោក ឆ្វេ មូនស៊ូន ឱ្យគិតគូនិងមើលថែពីសុខទុក្ខរបស់ពលរដ្ឋខ្មែរដែលនឹងត្រូវធ្វើការនៅក្នុងស្រុកហ្វាឆន់ នៃប្រទេសកូរ៉េខាងមុខក្រោយការចុះអនុស្សរណៈដ៏សំខាន់នាពេលនេះ។
សម្រាប់កិច្ចសហការនេះ លោក ឆ្វេ មូនស៊ូន ជឿជាក់លើក្រសួងការងារ ដែលមានបទពិសោធន៍គ្រប់គ្រាន់លើការបញ្ជូនពលករទៅបម្រើការងារនៅសាធារណរដ្ឋកូរ៉េក្រោមប្រព័ន្ធអនុញ្ញាតមុខរបរ(EPS)រួមទាំងការចុះអនុស្សរណៈនៃការយោគយល់គ្នាស្តីពីការបញ្ជូនពលកររដូវកាលជាមួយក្រុងនិងស្រុករបស់សាធារណរដ្ឋកូរ៉េជាច្រើន មកហើយ។
សូមបញ្ជាក់ថា រាល់ការបញ្ជូនពលករកម្ពុជាទៅក្រៅប្រទេសទាំងអស់ រួមទាំងកម្មវិធីពលកររដូវកាលទៅសាធារណរដ្ឋកូរ៉េ គឺត្រូវឆ្លងកាត់ក្រសួងការងារ និងបណ្តុះបណ្តាលវិជ្ជាជីវៈ ដើម្បីធានាពីប្រសិទ្ធភាព និងការគាំពារសិទ្ធិរបស់ពលករ៕
© រក្សាសិទ្ធិដោយ thmeythmey.com
Tag:
.gif)
