អន្តរជាតិ 
កូរ៉េខាងត្បូង ត្រៀមជំនួយ៣១៣ពាន់​លាន​ដុល្លារសម្រាប់គម្រោងកាត់បន្ថយកាបូន
  • ថ្ងៃពុធ ទី២០ ខែមីនា ឆ្នាំ២០២៤ ​​ ម៉ោង ៨:២៩ នាទី យប់
កូរ៉េខាងត្បូង ត្រៀមជំនួយ៣១៣ពាន់​លាន​ដុល្លារសម្រាប់គម្រោងកាត់បន្ថយកាបូន
រូបភាព Reuters
រដ្ឋាភិបាលកូរ៉េខាងត្បូង នៅថ្ងៃទី ១៩ ខែមីនា បានសន្យាផ្ដល់ថវិកាចំនួន៣១៣ ពាន់លានដុល្លារក្នុងគោលនយោបាយហិរញ្ញប្បទានដល់គម្រោងទាំងឡាយណាដែលជួយដល់ការកាត់បន្ថយការបំភាយកាបូន និងជួយសម្រេចបានគោលដៅកាត់បន្ថយការបំភាយឧស្ម័នផ្ទះកញ្ចក់ (GHG) ចំនួន៤០ ភាគរយពីកម្រិតឆ្នាំ២០១៨ ត្រឹមឆ្នាំ២០៣០។
TTN-Free-Banner-In-Article-PC
 
ផែនការបង្កើនការប្រយុទ្ធប្រឆាំងនឹងការប្រែប្រួលអាកាសធាតុត្រូវបានបង្ហាញនៅក្នុងកិច្ចប្រជុំរវាងមន្ត្រីរដ្ឋាភិបាល និងប្រធានធនាគារធំៗចំនួនប្រាំរបស់ប្រទេសដែលជាលទ្ធផលចេញជា សេចក្ដីថ្លែងការណ៍រួមគ្នាមួយ។ ក្នុងនោះរដ្ឋាភិបាលបានសម្គាល់ថា​ ធនាគារអភិវឌ្ឍន៍កូរ៉េ (KDB) ធនាគារនាំចេញ-នាំចូលនៃប្រទេសកូរ៉េ (Export-Import Bank of Korea) មូនិធិធានាឥណទានកូរ៉េ (Korean Guarantee Fund) Woori Bank និងKookmin Bank នឹងបង្កើតមូលនិធិថ្មីមួយដែលមានតម្លៃ ៦,៧ ពាន់លានដុល្លារសម្រាប់ការសាងសង់មធ្យោបាយ និងហេដ្ឋារចនាសម្ព័ន្ធថាមពលបៃតងថ្មី។
 
«បញ្ហាប្រឈមដែលមិនធ្លាប់មានពីមុនមកនៃការប្រែប្រួលអាកាសធាតុដែលយើងប្រឈមមុខនាពេលបច្ចុប្បន្ននេះទាមទារឱ្យមានសកម្មភាពជាបន្ទាន់ មិនត្រឹមតែលើកកម្ពស់ការប្រកួតប្រជែងរបស់ក្រុមហ៊ុនរបស់យើងប៉ុណ្ណោះទេ ប៉ុន្តែថែមទាំងធានាបាននូវអនាគតប្រកបដោយចីរភាពសម្រាប់មនុស្សជំនាន់ក្រោយផងដែរ»។ ប្រធានគណៈកម្មការសេវាកម្មហិរញ្ញវត្ថុ (FSC) លោក Kim Joo-hyun មានប្រសាសន៍នៅក្នុងកិច្ចប្រជុំបែបនេះ។ 
 
លោក Kim បានបន្តថាតាមរយៈកិច្ចសហការខាងលើ រដ្ឋាភិបាល ស្ថាប័នហិរញ្ញវត្ថុ និងធនាគារដែលគ្រប់គ្រងដោយរដ្ឋ បានចាប់ផ្ដើមជំហានដ៏មានអត្ថន័យមួយឆ្ពោះទៅរកការដោះស្រាយវិបត្តិអាកាសធាតុ។
 
ក្នុងកិច្ចប្រជុំខាងលើ អ្នកចូលរួមមានសហប្រធានគណៈកម្មការប្រធានាធិបតីស្តីពីអព្យាក្រឹតភាពកាបូន និងកំណើនបៃតងលោកKim Sang-hyup និងព្រមទាំងរដ្ឋមន្ត្រីបរិស្ថានលោកស្រីHan Wha-jin នាយកប្រតិបត្តិមកពីធនាគារពាណិជ្ជកំពូលទាំងប្រាំ និងប្រធានស្ថាប័នហិរញ្ញវត្ថុគ្រប់គ្រងដោយរដ្ឋ។
 
នៅឆ្នាំ ២០៣០ ស្ថាប័នហិរញ្ញវត្ថុដែលគ្រប់គ្រងដោយរដ្ឋ ដូចជា KDB ធនាគារឧស្សាហកម្មនៃប្រទេសកូរ៉េ (Industrial Bank of Korea) និងធនាគារនាំចេញ-នាំចូលនៃប្រទេសកូរ៉េ នឹងត្រូវបានកំណត់ ដើម្បីផ្គត់ផ្គង់សរុបចំនួន ៣១៤,៥ពាន់លានដុល្លាររៀបចំសម្រាប់ការវិនិយោគលើរោងចក្រផលិតកាបូនទាប ផលិតផលដែលមិនប៉ះពាល់ដល់បរិស្ថាន និងការគាំទ្របច្ចេកវិទ្យា។ បរិមាណនៃការគាំទ្រផ្នែកហិរញ្ញវត្ថុនេះតំណាងឱ្យការកើនឡើង ៦៧ភាគរយ បើប្រៀបធៀបទៅនឹងប្រាំឆ្នាំចុងក្រោយនេះ។
 
FSC ព្យាករណ៍ថាវិធានការទាំងនេះនឹងនាំទៅដល់ការកាត់បន្ថយឧស្ម័នផ្ទះកញ្ចក់ចំនួន ៨៥,៩៧លានតោននៅឆ្នាំ ២០៣០។ ការកាត់បន្ថយនេះនឹងបំពេញបាន ២៩,៥ភាគរយ នៃគោលដៅរបស់រដ្ឋាភិបាលក្នុងការកាត់បន្ថយការបំភាយឧស្ម័ន ២៩១ លានតោន៕
អ្នកសរសេរអត្ថបទ

ជា ពេជ្រដាឡែន គឺជាអ្នកសារព័ត៌មានក្រៅម៉ោង​នៃសារព័ត៌មានថ្មីៗ។ បច្ចុប្បន្ន ដាឡែន ជានិស្សិតឆ្នាំទីបី ផ្នែកសិក្សាអន្តរជាតិ នៅវិទ្យាស្ថានភាសាបរទេស សកលវិទ្យាល័យភូមិន្ទ ភ្នំពេញ។ ដាឡែន តាមដានព័ត៌មានទាក់ទង កិច្ចការអន្តរជាតិ ព្រមទាំងបញ្ហានយោបាយនៅក្នុងតំបន់អាស៊ីអាគ្នេយ៍។ CHEA Pichdalen is a part-time international news reporter at Thmey Thmey. Currently, she is also a junior student majoring in International Studies at Institute of Foreign Languages at Royal University of Phnom Penh. She covers current international affairs as well as ongoing political issues in the Southeast Asia region.

© រក្សាសិទ្ធិដោយ thmeythmey.com
Tag:

ជា ពេជ្រដាឡែន