.png)
សម្ដេច ហ៊ុន សែន៖«មរណភាពរបស់លោក សំបូរ មាណ្ណារ៉ា ជាការបាត់បង់ធនធានមនុស្សដ៏សំខាន់របស់ជាតិ»
- ថ្ងៃសៅរ៍ ទី២០ ខែមេសា ឆ្នាំ២០២៤ ម៉ោង ១២:០០ នាទី រសៀល
សម្ដេច ហ៊ុន សែន ប្រធានព្រឹទ្ធសភា។ រូបភាពពីហ្វេសប៊ុកសម្ដេច ហ៊ុន សែន
សម្ដេច ហ៊ុន សែន ប្រធានព្រឹទ្ធសភាព បានផ្ញើសារចូលរួមរំលែកទុក្ខដល់ក្រុមគ្រួសារសពលោក សំបូរ មាណ្ណារ៉ា សាស្រ្តាចារ្យប្រវត្តិសាស្រ្ត ដែលទទួលមរណភាពកាលពីព្រឹកមិញ។ បើតាមសម្ដេច ហ៊ុន សែន មរណភាពរបស់សាស្ត្រាចារ្យ សំបូរ មាណ្ណារ៉ា ជាការបាត់បង់នូវធនធានមនុស្សដ៏សំខាន់របស់ជាតិ។
ក្នុងសាររំលែកទុក្ខដែលផ្ញើទៅកាន់លោកស្រី អ៊ុំ ផារ៉ាន់ ភរិយាលោកសាស្ត្រាចារ្យ សំបូរ មាណ្ណារ៉ា សម្ដេច ហ៊ុន សែន បានបង្ហាញសេចក្តីក្រៀមក្រំ និងសោកស្តាយ ក្រោយពីបានទទួលដំណឹងមរណភាពនេះ។ សម្ដេច ហ៊ុន សែន ចាត់ទុកការបាត់បង់លោក សំបូរ មាណ្ណារ៉ា ជាការបាត់បង់ស្វាមី ឪពុក ជីតាជាទីគោរពស្រឡាញ់ប្រកបដោយព្រហ្មវិហារធម៌ និងសង្គហធម៌ចំពោះភរិយា កូនៗ ចៅៗ ព្រមទាំងញាតិមិត្តជិតឆ្ងាយទាំងអស់។
រូបភាពពីហ្វេសប៊ុកលោក សំបូរ មាណ្ណារ៉ា
លើសពីនេះ សម្ដេច ហ៊ុន សែន សង្កត់ធ្ងន់ថា៖«មរណភាពរបស់លោកសាស្ត្រាចារ្យ សំបូរ មាណ្ណារ៉ា ជាការបាត់បង់នូវធនធានមនុស្សដ៏សំខាន់របស់ជាតិ ដែលបានលះបង់កម្លាំងកាយចិត្ត និងបញ្ញាស្មារតីបម្រើប្រទេសជាតិគ្រប់កាលៈទេសៈ ក្នុងគោលដៅបម្រើដល់ឧត្តមប្រយោជន៍ជាតិមាតុភូមិនាពេលកន្លងមក»។
Relate
គួរជម្រាបថា លោក សំបូរ មាណ្ណារ៉ា បានបម្រើការងារក្នុងវិស័យអប់រំ ពិសេសលើជំនាញប្រវត្តិសាស្ត្រ ប្រមាណ៤០ឆ្នាំមកហើយ។ សាស្រ្តាចារ្យប្រវត្តិសាស្រ្តរូបនេះ ខិតខំបង្ហាត់បង្រៀន និងចែករំលែកចំណេះដឹងពីប្រវត្តិសាស្រ្តវប្បធម៌ខ្មែរ ដល់និស្សិត និងសាធារណជនជាច្រើននាក់។
លោក សំបូរ មាណ្ណារ៉ា បានទទួលមរណភាពនៅព្រឹកថ្ងៃទី២០ ខែមេសា ឆ្នាំ២០២៤ ក្នុងជន្មាយុ ៦៧ឆ្នាំ ដោយរោគាពាធ នៅមន្ទីរពេទ្យកាល់ម៉ែត។ សពរបស់លោក នឹងតម្កល់ធ្វើបុណ្យតាមប្រពៃណីព្រះពុទ្ធសាសនា នៅផ្ទះលេខ ១ ផ្លូវ ៥ A សង្កាត់សំបួរ ខណ្ឌដង្កោ រាជធានីភ្នំពេញ៕
© រក្សាសិទ្ធិដោយ thmeythmey.com
Tag:
.gif)
