កូរ៉េខាងជើងចោទអាម៉េរិកធ្វើនយោបាយលើបញ្ហាសិទ្ធិមនុស្ស
- ថ្ងៃសៅរ៍ ទី២៧ ខែមេសា ឆ្នាំ២០២៤ ម៉ោង ៩:៣៩ នាទី យប់

កូរ៉េខាងជើង នៅថ្ងៃទី២៧ ខែមេសា បានចោទអាម៉េរិកថាធ្វើនយោបាយលើបញ្ហាសិទ្ធិមនុស្ស បន្ទាប់ពីទីក្រុងវ៉ាស៊ីនតោនបង្ហាញការធ្លាក់ចុះកាន់តែខ្លាំងការគោរពសិទ្ធិមនុស្សក្នុងប្រទេសនេះ។

បើតាមទីភ្នាក់ងារព័ត៌មានរដ្ឋកូរ៉េខាងជើង (KCNA) ដែលស្រង់សម្តីអ្នកនាំពាក្យក្រសួងការបរទេស ទីក្រុងព្យុងយ៉ាងនឹងសម្រេចចិត្តយ៉ាងម៉ឺងម៉ាត់ដើម្បីការពារអធិបតេយ្យភាព និងសុវត្ថិភាពរបស់ខ្លួន ដើម្បីឆ្លើយតបនឹងទីក្រុងវ៉ាស៊ីនតោនដែលប្រើសិទ្ធិមនុស្សជាឧបករណ៍សម្រាប់ឈ្លានពាន គំរាមកំហែង និងបញ្ចេញអាកប្បកិរិយាប្រឆាំងនឹងកូរ៉េខាងជើង។
អ្នកនាំពាក្យរូបនេះដដែលនេះ ចង់សំដៅរបាយការណ៍របស់បេសកជនពិសេសទទួលបន្ទុកសិទ្ធិមនុស្សអាម៉េរិកលោកស្រី Julie Turner ដែលទៅទីក្រុងសេអ៊ូលនិងតូក្យូកាលពីខែកុម្ភៈដើម្បីពិភាក្សាអំពីបញ្ហានៅកូរ៉េខាងជើង។ ក្នុងដំណើរទស្សនកិច្ច លោកស្រី បញ្ជាក់ពីការបាត់ខ្លួនដោយបង្ខំតាមរយៈការចាប់ពង្រត់ និងសង្កត់ធ្ងន់លើតម្រូវការដោះស្រាយជាបន្ទាន់ចំពោះករណីនេះ។
ជាមួយគ្នានេះ របាយការណ៍របស់ក្រសួងការបរទេសអាម៉េរិកដែលចេញក្នុងសប្ដាហ៍នេះ បានរំលេចវិបត្តិមនុស្សធ្ងន់ធ្ងរនៅកូរ៉េខាងជើង។របាយការណ៍ប្រចាំឆ្នាំរបស់ក្រសួងការបរទេសអាម៉េរិក បានលើកឡើងពីការសម្លាប់មនុស្សដោយបំពាន ឬខុសច្បាប់រួមទាំងការសម្លាប់ក្រៅប្រព័ន្ធតុលាការ ការបាត់ខ្លួនដោយបង្ខំ ការធ្វើទារុណកម្ម អំពើឃោរឃៅ អមនុស្សធម៌ ឬការដាក់ទណ្ឌកម្មដោយអាជ្ញាធរ។
បន្ថែមពីលើរឿងសិទ្ធិមនុស្ស ប្រព័ន្ធផ្សព្វផ្សាយរដ្ឋកូរ៉េខាងជើង ក៏រិះគន់អាម៉េរិកដែលជំរុញឱ្បបញ្ឈប់ការ បាញ់មីស៊ីល និងគ្រាប់រ៉ុក្កែតផ្សេងទៀត។ ទីក្រុងវ៉ាស៊ីនតោនហៅការបាញ់នេះ ជាការរំលោភដំណោះស្រាយរបស់អង្គការសហប្រជាជាតិ។ ប៉ុន្តែកូរ៉េខាងជើងក៏ចោទសួរការបាញ់បង្ហោះផ្កាយរណបរបស់កូរ៉េខាងត្បូងកាលពីខែមេសាវិញដែរ។
«យើងនឹងអនុវត្តបេសកកម្មដ៏សំខាន់របស់យើងដូចដែលបានគ្រោងទុកដើម្បីបង្កើនសមត្ថភាពឈ្លបយកការណ៍អវកាសរបស់យើងដើម្បីធានាសុវត្ថិភាពរបស់ប្រទេសរបស់យើង»។ KCNA ស្រង់សម្តីអ្នកនាំពាក្យរបស់រដ្ឋបាលអភិវឌ្ឍន៍អវកាសជាតិរបស់កូរ៉េខាងជើងបែបនេះ៕
អ្នកសរសេរអត្ថបទ
ជា ពេជ្រដាឡែន គឺជាអ្នកសារព័ត៌មានក្រៅម៉ោងនៃសារព័ត៌មានថ្មីៗ។ បច្ចុប្បន្ន ដាឡែន ជានិស្សិតឆ្នាំទីបី ផ្នែកសិក្សាអន្តរជាតិ នៅវិទ្យាស្ថានភាសាបរទេស សកលវិទ្យាល័យភូមិន្ទ ភ្នំពេញ។ ដាឡែន តាមដានព័ត៌មានទាក់ទង កិច្ចការអន្តរជាតិ ព្រមទាំងបញ្ហានយោបាយនៅក្នុងតំបន់អាស៊ីអាគ្នេយ៍។ CHEA Pichdalen is a part-time international news reporter at Thmey Thmey. Currently, she is also a junior student majoring in International Studies at Institute of Foreign Languages at Royal University of Phnom Penh. She covers current international affairs as well as ongoing political issues in the Southeast Asia region.

© រក្សាសិទ្ធិដោយ thmeythmey.com
Tag:
ព័ត៌មានពេញនិយម
-
៤ ថ្ងៃ