.jpg)
.jpg)
តើប្រទេសណាខ្លះមានកម្រិតគុណភាពខ្យល់ប្រកបដោយសុវត្ថិភាព?
- ថ្ងៃអាទិត្យ ទី១២ ខែឧសភា ឆ្នាំ២០២៤ ម៉ោង ៨:៣៩ នាទី យប់
របាយការណ៍ថ្មីមួយរបស់ក្រុមហ៊ុនបច្ចេកវិជ្ជាគុណភាពខ្យល់របស់ស្វីស IQAir បង្ហាញថា មានប្រទេសតែប្រាំពីរប៉ុណ្ណោះក្នុងពិភពលោកបានជួបកម្រិតបរិយាកាសដោយសុវត្ថិភាពក្នុងឆ្នាំ ២០២៣។ ការសិក្សានេះបានទាញយកទិន្នន័យពីស្ថានីយ៍ត្រួតពិនិត្យជាង៣ម៉ឺនកន្លែងក្នុង ១៣៤ ប្រទេស ដែនដី និងតំបន់។
ក្នុងចំណោមនោះ ១២៤ ប្រទេស ដែនដី និងតំបន់ត្រូវរកឃើញថា បានបំពាន កម្រិតសុវត្ថិភាពខ្យល់ PM2.5 ដែលយោងតាមការណែនាំរបស់អង្គការសុខភាពពិភពលោក (WHO)។
ភាគល្អិតមីក្រូទស្សន៍ទាំងនេះដែលមានទំហំតូចជាង ២,៥ មីក្រូក្នុងអង្កត់ផ្ចិត អាចត្រូវបាន ស្រូបចូលជ្រៅទៅក្នុងសួត ហើយថែមទាំងទៅដល់ចរន្តឈាមទៀតផង។ ភាគល្អិតនេះត្រូវ បានផ្សារភ្ជាប់ទៅនឹងជំងឺបេះដូង និងសួត ជំងឺលើសឈាម ការកើនឡើងហានិភ័យនៃជំងឺហឺត ជំងឺធ្លាក់ទឹកចិត្ត និងការថប់បារម្ភ និងការស្លាប់មុនអាយុផងដែរ។
តើប្រទេសណាខ្លះដែលឆ្លើយតបនឹងកម្រិតគុណភាពខ្យល់ប្រកបដោយសុវត្ថិភាព?
ប្រទេសចំនួនប្រាំពីរដែលបានបំពេញតាមគោលការណ៍ណែនាំប្រកបដោយសុវត្ថិភាពចំនួន ប្រាំមីក្រូក្រាមក្នុងមួយម៉ែត្រគូបនៃខ្យល់ (µg/m3) ឬតិចជាងនេះគឺអូស្ត្រាលី អេស្តូនី ហ្វាំងឡង់ ហ្គ្រើណាដ អ៊ីស្លង់ ម៉ូរីស និងនូវែលសេឡង់។
ទឹកដី Puerto Rico, Bermuda និង French Polynesia ក៏ស្ថិតក្នុងកម្រិតសុវត្ថិភាពផងដែរ។ នៅអឺរ៉ុប អ៊ីស្លង់មានខ្យល់អាកាសបរិសុទ្ធបំផុតចំនួន៤មីក្រូក្រាមក្នុងមួយម៉ែត្រគូបនៃខ្យល់ បន្ទាប់មកអេស្តូនីមាន៤,៧មីក្រូក្រាមក្នុងមួយម៉ែត្រគូបនៃខ្យល់ និងហ្វាំងឡង់មាន៤,៩ មីក្រូក្រាមក្នុងមួយម៉ែត្រគូបនៃខ្យល់។
មាត្រដ្ឋានពណ៌ត្រូវបានប្រើដើម្បីចង្អុលបង្ហាញពីកម្រិតការបំពុលដោយប្រទេសនៅអឺរ៉ុបជាច្រើនបានធ្លាក់ក្នុងប្រភេទពណ៌បៃតងដោយបង្ហាញពីកម្រិតល្អរហូតដល់ទ្វេដងនៃស្តង់ដារសុវត្ថិភាព។
ចំណែកឯប្រទេសដែលមានការបំពុលតិចតួចបំផុតទាំងនេះរួមមាន ស៊ុយអែត អៀរឡង់ ន័រវែស ព័រទុយហ្កាល់ លិចតិនស្ដាញ ដាណឺម៉ាក ចក្រភពអង់គ្លេស អង់ដូរ៉ា ឡេតូនី អ៊ុយក្រែន ហូឡង់ លុចសំបួ ស្វីស អាល្លឺម៉ង់ បែលហ្សិក បារាំង អូទ្រីស អេស្ប៉ាញ និងរុស្ស៊ី។
ទីក្រុងនានានៅអឺរ៉ុបបានបង្ហាញពីភាពប្រសើរឡើងចាប់តាំងពីរបាយការណ៍ឆ្នាំ ២០២២ ដោយ ៥៤ ភាគរយត្រូវបានចាត់ថ្នាក់ពណ៌បៃតងនៅឆ្នាំ ២០២៣ ធៀបនឹង ៣៩ ភាគរយកាលពី ឆ្នាំមុន៕
© រក្សាសិទ្ធិដោយ thmeythmey.com
