.png)
.jpg)
.jpg)
ប្រឡងគ្រូអនុវិទ្យាល័យ៖ បេក្ខជន ១ ៣២៣នាក់ នឹងប្រឡងលើកទី២ នៅថ្ងៃទី១៨ឧសភានេះ
- ថ្ងៃអង្គារ ទី១៤ ខែឧសភា ឆ្នាំ២០២៤ ម៉ោង ១១:៥៩ នាទី ព្រឹក
លោក ហ៊ុន ម៉ានី ដើរពិនិត្យដំណើរការប្រឡងប្រជែងជ្រើសរើសគ្រូអនុវិទ្យាល័យ។ រូបភាពពីក្រសួងមុខងារសាធារណៈ
ការប្រឡងជ្រើសរើសគ្រូអនុវិទ្យាល័យ ដំណាក់កាលទី២ នឹងរៀបចំឡើងនៅថ្ងៃទី១៨ ខែឧសភានេះ។ ការប្រឡងដំណាក់កាលទី២នេះ មានបេក្ខជនចំនួន ១ ៣២៣នាក់ ដោយពួកគេជាអ្នកដែលបានជាប់លើវិញ្ញាសាសរសេរលើកទី១។ ការប្រឡងនេះ រៀបចំនៅសាកលវិទ្យាល័យភូមិន្ទភ្នំពេញ ចាប់ពីម៉ោង១២ និង៣០នាទីថ្ងៃត្រង់ ដល់ម៉ោង៥ល្ងាច។
ដំណើរការប្រឡងលើវិញ្ញាសាសរសេរលើកទី១ ដែលមានបេក្ខជនចូលប្រឡងជាង ៣ម៉ឺននាក់ បានរកឃើញបេក្ខជនជាប់សម្រាំងលើកទី១ ចំនួន ១ ៣២៣នាក់។ បេក្ខជនទាំង ១ ៣២៣នាក់នេះ នឹងត្រូវប្រជែងគ្នាលើកទី២ នៅថ្ងៃទី១៨ ឧសភានេះ ដោយក្រសួងមុខងារសាធារណៈ នឹងសម្រាំងយកបេក្ខជនតែ ៤៤១នាក់ប៉ុណ្ណោះ ឱ្យចូលបម្រើការងារ ក្នុងក្របខណ្ឌក្រសួងអប់រំ យុវជន និងកីឡា។
បើតាមសេចក្ដីជូនដំណឹងរបស់ក្រសួងមុខងារសាធារណៈ ការប្រឡងនេះ បានបែងចែកសម្រាប់បេក្ខជនប្រព័ន្ធបណ្តុះបណ្តាល បរិញ្ញាបត្រ + ១, ប្រព័ន្ធបណ្តុះបណ្តាល ១២ + ៤ និងប្រព័ន្ធបណ្តុះបណ្តាល ១២ + ២។ ក្នុងនោះ ប្រព័ន្ធបណ្តុះបណ្តាល បរិញ្ញាបត្រ + ១ (កម្រិតបរិញ្ញាបត្រ) ឯកទេសគណិតវិទ្យា ឬ រូបវិទ្យា នឹងប្រឡងរយៈពេល ២ម៉ោង និងភាសាអង់គ្លេស ឬ ភាសាបារាំង រយៈពេល ២ម៉ោងផងដែរ។
លោក ហ៊ុន ម៉ានី ដើរពិនិត្យដំណើរការប្រឡងប្រជែងជ្រើសរើសគ្រូអនុវិទ្យាល័យ។ រូបភាពពីក្រសួងមុខងារសាធារណៈ
ដោយឡែក ប្រព័ន្ធបណ្តុះបណ្តាល ១២ + ៤ (កម្រិតថ្នាក់ទី១២) ឯកទេសគីមីវិទ្យា ឬជីវវិទ្យា នឹងប្រឡងរយៈពេល ២ម៉ោង និងភាសាអង់គ្លេស ឬ ភាសាបារាំង រយៈពេល ២ម៉ោង។ ចំណែក ប្រព័ន្ធបណ្តុះបណ្តាល ១២ + ២ (កម្រិតថ្នាក់ទី១២) មានមុខវិជ្ជាឯកទេសទី១ រយៈពេល ២ម៉ោង (១២:៣០នាទី-១៤:៣០នាទី) និងមុខវិជ្ជាឯកទេសទី២ រយៈពេល ២ម៉ោង។
អត្ថបទទាក់ទង
សូមបញ្ជាក់ថា បេក្ខជនចំនួន ៤៤១នាក់ ប៉ុណ្ណោះ នឹងត្រូវជ្រើសរើសជាគ្រូបង្រៀនអនុវិទ្យាល័យ ក្រោយប្រឡងជាប់ដំណាក់កាលទី១ និងទី២។ ក្នុងបទសម្ភាសជាមួយអ្នកសារព័ត៌មាន នាដំណើរការប្រឡងប្រជែងជ្រើសរើសគ្រូបង្រៀន ក្នុងដំណាក់កាលទី១ លោក ហ៊ុន ម៉ានី រដ្ឋមន្រ្តីក្រសួងមុខងារសាធារណៈ បានមានប្រសាសន៍ថា ដោយសារកំណើននៃការចុះឈ្មោះច្រើន ទើបតម្រូវឱ្យមានការរៀបចំការប្រឡងជា ២ដំណាក់កាល៕
រូបភាពពីក្រសួងមុខងារសាធារណៈ
© រក្សាសិទ្ធិដោយ thmeythmey.com
Tag:
