.png)
.jpg)
.jpg)
លោក ថាវីស៊ីន អរគុណ FIFA ដែលជ្រើសថៃ ធ្វើសមាជ FIFA លើកទី៧៤
- ថ្ងៃព្រហស្បតិ៍ ទី១៦ ខែឧសភា ឆ្នាំ២០២៤ ម៉ោង ៨:២៩ នាទី យប់
ប្រតិភូជាង ៣ពាន់នាក់ មកពីសហព័ន្ធកីឡាបាល់ទាត់ជុំវិញវិញពិភពលោកចំនួន ២១១ នៃសហព័ន្ធកីឡាបាល់ទាត់អន្តរជាតិ (FIFA) ចូលរួមមហាសន្និបាត FIFA លើកទី ៧៤ ក្នុងក្រុងបាងកក ប្រទេសថៃ ចាប់ពីថ្ងៃទី១៣ ដល់ ១៧ ខែឧសភា។ នាយករដ្ឋមន្រ្តីថៃ លោក សេដ្ឋា ថាវីស៊ីន អរគុណ FIFA ដែលជ្រើសយកថៃ ធ្វើម្ចាស់ផ្ទះសមាជលំដាប់ពិភពលោកនេះ។
ថៃ ក្លាយជាប្រទេសអាស៊ីអាគ្នេយ៍ដំបូងគេ និងទី៥ នៅអាស៊ី បន្ទាប់ពីជប៉ុន កូរ៉េខាងត្បូង កាតា និងអូស្ត្រាលី ដែល FIFA ជ្រើសរើសជាប្រទេសម្ចាស់ផ្ទះ ធ្វើមហាសន្និបាត FIFA លើកទី ៧៤ ដែលជាព្រឹត្តិការណ៍ដ៏មានកិត្យានុភាពក្នុងវិស័យបាល់ទាត់។ កម្មវិធីនេះ មានការចូលរួមពីសំណាក់លោក Gianni Infantino ប្រធាន FIFA និងប្រធានប្រចាំទ្វីបទាំង៦ រួមជាមួយវIរបុរសក្នុងវិស័យបាល់ទាត់លំដាប់ពិភពលោកជាច្រើនរួបទៀត។
លោក ថាវីស៊ីន បានលើកសរសើរលោកស្រី Nualphan Lamsam ប្រធានសហព័ន្ធកីឡាបាល់ទាត់ថៃ (FAT) ដែលអាចទទួលប្រតិភូសំខាន់ៗពីជុំវិញពិភពលោក និងអរគុណ FIFA ដែលជ្រើសថៃជាប្រទេសអាស៊ានទី១ រៀបចំមហាសន្និបាទ FIFA លើកទី ៧៤។
នាយករដ្ឋមន្ត្រីថៃបានសរសេរលើផេកហ្វេសប៊ុកផ្លូវការរបស់ខ្លួនថា៖« ខ្ញុំមានកិត្តិយសក្នុងការស្វាគមន៍ប្រតិភូមកពីជុំវិញពិភពលោកមកកាន់ប្រទេសថៃ។ ខ្ញុំសូមថ្លែងអំណរគុណយ៉ាងស្មោះស្ម័គ្រចំពោះ FIFA ដែលបានជ្រើសរើសប្រទេសថៃជាកន្លែងសម្រាប់សមាជ FIFA លើកទី ៧៤»។
លោក ថាវីស៊ីន ចាត់ទុកសមាជនេះ ជាសមិទ្ធផលដ៏គួរឲ្យមោទនភាពសម្រាប់ប្រទេសខ្លួន ស្របពេលថៃ បានប្រឹងប្រែងក្នុងការផ្សព្វផ្សាយកីឡានេះ ទៅជាទេសចរណ៍កីឡា ដែលមានប្រជាប្រិយភាពដូចកីឡាប្រដាល់មួយថៃរបស់ខ្លួនដែរ។
ចំពោះសមាជដែលមានរយៈពេល៥ថ្ងៃ នៅឆ្នាំ២០២៤ នេះ នឹងផ្តោតលើបញ្ហាជាច្រើនដែលប្រឈមមុខនឹងវិស័យកីឡាបាល់ទាត់ ខណៈដែលការបោះឆ្នោតនៅថ្ងៃទី១៧ ខែឧសភា ដើម្បីសម្រេចថាតើប្រេស៊ីល ឬបែលហ្សិក ហូឡង់ និងអាល្លឺម៉ង់ នឹងធ្វើជាម្ចាស់ផ្ទះ FIFA Women's World Cup ឆ្នាំ ២០២៧។
© រក្សាសិទ្ធិដោយ thmeythmey.com
Tag:
