.png)
តើប្រទេសណាផលិតដែកថែបច្រើនជាងគេលើពិភពលោក?
- ថ្ងៃសៅរ៍ ទី១៥ ខែមិថុនា ឆ្នាំ២០២៤ ម៉ោង ៩:០០ នាទី យប់
ដែកថែបផលិតនៅក្រុមហ៊ុនចិនក្នុងខេត្ត Fujian។ រូបភាព ៖ Xinhua
ចិន ជាប្រទេសមានចំណែកផលិតដែកថែបច្រើនជាងគេលើលោកប្រហែល ១ពាន់លានតោនក្នុងឆ្នាំ២០២៣ តាមពីក្រោយដោយ ឥណ្ឌា ជប៉ុន អាម៉េរិក រុស្ស៊ី និងកូរ៉េខាងត្បូង។
ដែកថែប ជាសម្ភារៈដ៏សំខាន់សម្រាប់សេដ្ឋកិច្ចក្នុងការប្រើប្រាស់នៅវិស័យជាច្រើនចាប់ពីវិស័យសំណង់ ហេដ្ឋារចនាសម្ព័ន្ធរហូតដល់ការផលិត និងការដឹកជញ្ជូនផ្សេងៗទៀត។
ក្រាហ្វិកខាងក្រោម បានបង្ហាញពីប្រទេសផលិតដែកថែបធំៗជាងគេបំផុតរបស់ពិភពលោកក្នុងឆ្នាំ២០២៣ ដោយផ្អែកលើទិន្នន័យដែលបានចេញផ្សាយក្នុងខែមករា ឆ្នាំ២០២៤ ដោយទីភ្នាក់ងារស្ទង់មតិភូមិសាស្ត្រអាមេរិក (USGS)។
ប្រទេសផលិតដែកថែកធំៗប្រចាំឆ្នាំ២០២៣។ រូបភាព ៖ visualcapitalist
តាមក្រាហ្វិកខាងលើ ចិនកំពុងនាំមុខគេជាមួយនឹងទិន្នផល ១ពាន់លានតោនក្នុងឆ្នាំ ២០២៣ ដែលស្មើនឹងជាង ៥០ភាគរយនៃទិន្នផលសកល។ រយៈពេលប៉ុន្មានឆ្នាំចុងក្រោយនេះ ឧស្សាហកម្មដែកសកលបាននឹងកំពុងប្រឈមមុខនឹងបញ្ហាធំមួយគឺ ភាពលើសចំណុះនៅចិន។ ទិន្នផលដែករបស់ប្រទេសនេះតែងតែខ្ពស់ជាងតម្រូវការ ដោយដាក់សម្ពាធដល់ថ្លៃដែក និងប៉ះពាល់ដល់ប្រាក់ចំណេញរបស់ក្រុមហ៊ុនផលិតដែកជុំវិញពិភពលោក។
កាលពីមុន វិស័យអចលនទ្រព្យនៅចិនតែងតែប្រើប្រាស់ច្រើនជាង ៣០ភាគរយនៃទិន្នផលដែកក្នុងស្រុក។ យ៉ាងណាមិញ វិបត្តិអចលនទ្រព្យបានអូសបន្លាយ ៣ឆ្នាំកន្លងមកនេះ កំពុងធ្វើឱ្យតម្រូវការដែកនៅក្នុងប្រទេសនេះធ្លាក់ចុះ។
ដើម្បីដោះស្រាយជាមួយនឹងភាពលើសចំណុះ រដ្ឋាភិបាលចិនបានស្នើឱ្យរោងម៉ាស៊ីនកិនដែកកាត់បន្ថយការផលិតចាប់ពីឆ្នាំ ២០២១។ នេះក៏មានគោលបំណងកាត់បន្ថយការបំភាយកាបូនផងដែរ ដោយឆ្ពោះទៅរកគោលដៅនៃការបំភាយកាបូនសូន្យសុទ្ធរបស់ទីក្រុងប៉េកាំង។
ចំណាត់ថ្នាក់ទី២ និងទី៣ បន្ទាប់ពីចិនដែលមានគម្លាតធំ គឺឥណ្ឌាត្រឹម ១៤០លានតោន និងជប៉ុន ៨៧លានតោន។
ក្រៅពីនេះ មានអាម៉េរិកដែលផលិតដែកថែប ៨០លានតោន, រុស្ស៊ី (៧៥លានតោន), កូរ៉េខាងត្បូង (៦៨លានតោន) និងប្រទេសផ្សេងៗទៀតជុំវិញពិភពលោក (៤២០លានតោន)៕
© រក្សាសិទ្ធិដោយ thmeythmey.com
Tag:
.gif)
