.png)
.png)
.jpg)
.jpg)
ទីលានកែច្នៃ និងទុកដាក់សំរាមទំនើបរបស់ខេត្តកំពង់ចាម នឹងសាងសង់រួចរាល់មុនផែនការកំណត់
- ថ្ងៃសៅរ៍ ទី៦ ខែកក្កដា ឆ្នាំ២០២៤ ម៉ោង ១២:២៩ នាទី រសៀល
ទិដ្ឋភាពទីលានចាក់សំរាមនៅស្រុកកំពង់សៀម ខេត្តកំពង់ចាម។ រូបភាពពីរដ្ឋបាលខេត្តកំពង់ចាម
ភ្នំពេញ៖ រហូតមកដល់ខែកក្កដានេះ ការសាងសង់ទីលានកែច្នៃ និងទុកដាក់សំរាមស្ដង់ដារ នៅក្នុងខេត្តកំពង់ចាម សម្រេចបានការស្ថាបនាជាង ៨០ភាគរយហើយ។ ទីលានកែច្នៃ និងទុកដាក់សំរាម នឹងសាងសង់រួចរាល់មុនផែនការគ្រោងទុក។
ទីលានកែច្នៃ និងទុកដាក់សំរាមថ្មី ដែលស្ថិតនៅភូមិកោះរកាក្នុង ឃុំកោះរកា ស្រុកកំពង់សៀម មានផ្ទៃដី ៨.១៥ហិកតា ក្នុងនោះទីតាំងដាក់សំរាមទំហំ ១.៣ហិកតា និងមានអាងប្រព្រឹត្តិកម្មទឹករងៃចំនួន ៤អាង។ ទីលានទុកដាក់សំរាមនេះ ក៏មានអគារស្តុកទុកសំណល់ដែលគ្រោះថ្នាក់បណ្តោះអាសន្ន និង រណ្ដៅទុកដាក់សំរាមសំណល់គ្រោះថ្នាក់ផងដែរ។
រូបភាពពីរដ្ឋបាលខេត្តកំពង់ចាម
ក្នុងដំណើរពិនិត្យពីស្ថានភាពនៃការសាងសង់ទីលានកែច្នៃ និងទុកដាក់សំរាម លោក អ៊ុន ចាន់ដា អភិបាលខេត្តកំពង់ចាម បានជំរុញឱ្យមន្ត្រីពាក់ព័ន្ធ និងអាជ្ញាធរមូលដ្ឋានទាំងអស់ ផ្សព្វផ្សាយដល់ប្រជាពលរដ្ឋ តាមទីប្រជុំជន ឱ្យបានយល់ដឹងពីបញ្ហាសំរាម ពិសេសការវេចខ្ចប់ទុកដាក់សំរាមឱ្យបានត្រឹមត្រូវ។ បើតាមរដ្ឋបាលខេត្តកំពង់ចាម ទីលានកែច្នៃសំរាមនេះ សាងសង់បានជាង ៨០ភាគរយ។
សូមបញ្ជាក់ថា គម្រោងសាងសង់ទីលានទុកដាក់សំរាមនេះ បានដំណើរការសាងសង់កាលពីថ្ងៃទី៥ ខែមករា ឆ្នាំ២០២៤ និងបញ្ចប់នៅថ្ងៃទី២៨ ខែឧសភា ឆ្នាំ២០២៥ ដោយចំណាយរយៈពេល ១៧ខែ ប៉ុន្តែការងារសាងសង់នេះ ត្រូវបានសម្រេចមុនផែនការដែលបានគ្រោងទុក។ នេះបើតាមរដ្ឋបាលខេត្តកំពង់ចាម៕
រូបភាពពីរដ្ឋបាលខេត្តកំពង់ចាម
អភិបាលខេត្តកំពង់ចាម ចុះពិនិត្យស្ថានភាពការសាងសង់ទីលានដាក់សំរាមនៅស្រុកកំពង់សៀម។ រូបភាពពីរដ្ឋបាលខេត្តកំពង់ចាម
© រក្សាសិទ្ធិដោយ thmeythmey.com
Tag:
